ಬೆಂಗಳೂರು: ಕೆಜಿಎಫ್ ಚಾಪ್ಟರ್ 2’ ಚಿತ್ರದಲ್ಲಿ ದೇಶದ ಪ್ರಧಾನಿ ‘ರಮಿಕಾ ಸೆನ್’ ಎಂಬ ಬಲಿಷ್ಠ ಪಾತ್ರದ ಮೂಲಕ ಕನ್ನಡ ಪ್ರೇಕ್ಷಕರ ಮನಗೆದ್ದಿದ್ದ ಬಾಲಿವುಡ್ ನಟಿ ರವೀನಾ ಟಂಡನ್ (Raveena Tandon) , ಮತ್ತೆ ಸ್ಯಾಂಡಲ್‌ವುಡ್ ಅಂಗಳಕ್ಕೆ ಕಾಲಿಟ್ಟಿದ್ದಾರೆ. ಈ ಬಾರಿ ಹ್ಯಾಟ್ರಿಕ್ ಹೀರೋ ಕರುನಾಡ ಚಕ್ರವರ್ತಿ ಡಾ. ಶಿವರಾಜ್‌ಕುಮಾರ್ ಅವರ ಅಭಿನಯದ ನೂತನ ಚಿತ್ರದ ಮೂಲಕ ಅವರು ಕನ್ನಡಿಗರನ್ನು ರಂಜಿಸಲು ಸಜ್ಜಾಗಿದ್ದಾರೆ. ಈ ಪ್ರಮುಖ ಬೆಳವಣಿಗೆಯನ್ನು ಚಲನಚಿತ್ರ ತಂಡವೇ ಅಧಿಕೃತವಾಗಿ ಘೋಷಿಸಿದೆ.
ಡೈರೆಕ್ಟರ್ ಶ್ರೀನಿ ಕಾಂಬಿನೇಷನ್‌ನಲ್ಲಿ ಮೂಡಿಬರುತ್ತಿರುವ ನೂತನ ಸಿನಿಮಾ
‘ಘೋಸ್ಟ್’ ಎಂಬ ಬ್ಲಾಕ್‌ಬಸ್ಟರ್ ಹಿಟ್ ಸಿನಿಮಾ ನೀಡಿದ್ದ ನಿರ್ದೇಶಕ ಶ್ರೀನಿ ಹಾಗೂ ಶಿವರಾಜ್‌ಕುಮಾರ್ ಕಾಂಬಿನೇಷನ್‌ನಲ್ಲಿ ಈಗ ‘ಎ ಫಾರ್ ಆನಂದ್’ ಎಂಬ ಹೊಸ ಸಿನಿಮಾ ಸೆಟ್‌ೇರಿದೆ. ಈ ಯಶಸ್ವಿ ಜೋಡಿಯ ಜೊತೆಗೆ ರವೀನಾ ಟಂಡನ್ ಸಾಥ್ ನೀಡಿರುವುದು ಅಭಿಮಾನಿಗಳಲ್ಲಿ ಕುತೂಹಲವನ್ನು ಇಮ್ಮಡಿಗೊಳಿಸಿದೆ. ಪ್ರಸ್ತುತ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಈ ಚಿತ್ರದ ಚಿತ್ರೀಕರಣ ಶರವೇಗದಲ್ಲಿ ನಡೆಯುತ್ತಿದ್ದು, ಶೂಟಿಂಗ್ ಸೆಟ್‌ಗೆ ರವೀನಾ ಟಂಡನ್ ಆಗಮಿಸಿದ ವಿಶೇಷ ವೀಡಿಯೋವನ್ನು ಚಿತ್ರತಂಡ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದೆ. ವೀಡಿಯೋದಲ್ಲಿ ಕ್ಯಾರವಾನ್‌ನಿಂದ ಸೀರೆಯನ್ನುಟ್ಟು ಆಕರ್ಷಕ ಲುಕ್‌ನಲ್ಲಿ ಹೊರಬರುವ ರವೀನಾ ಅವರಿಗೆ ಚಿತ್ರತಂಡವು ಅದ್ಧೂರಿ ಸ್ವಾಗತ ಕೋರಿದೆ.
ಶಿವರಾಜ್‌ಕುಮಾರ್ ಹಾಗೂ ರವೀನಾ ಟಂಡನ್ ಟೀಚರ್ ಪಾತ್ರಗಳಲ್ಲಿ!
ಈ ಚಿತ್ರದ ಅತ್ಯಂತ ಸ್ವಾರಸ್ಯಕರ ವಿಷಯವೆಂದರೆ ನಟಿ ರವೀನಾ ಟಂಡನ್ ಅವರು ಶಿಕ್ಷಕಿಯ (ಟೀಚರ್) ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ವಿಶೇಷ ಎಂದರೆ, ನಟ ಶಿವರಾಜ್‌ಕುಮಾರ್ ಅವರು ಕೂಡ ಈ ಚಿತ್ರದಲ್ಲಿ ಶಿಕ್ಷಕನ ಪಾತ್ರವನ್ನೇ ನಿಭಾಯಿಸುತ್ತಿದ್ದಾರೆ. ಗೀತಾ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರವು ಮುಖ್ಯವಾಗಿ ಮಕ್ಕಳನ್ನು ಹಾಗೂ ಕುಟುಂಬವನ್ನು ಆಧರಿಸಿದ ಕಥಾವಸ್ತುವನ್ನು ಹೊಂದಿದೆ. ಆದರೆ, ಶ್ರೀನಿ ಅವರು ತಮ್ಮದೇ ಆದ ವಿಭಿನ್ನ ನಿರೂಪಣಾ ಶೈಲಿಯಲ್ಲಿ ಈ ಕಥೆಯನ್ನು ತರೆಗೆ ತರಲು ಸಜ್ಜಾಗಿದ್ದಾರೆ ಎಂಬುದು ಚಿತ್ರದ ಪೋಸ್ಟರ್‌ನಿಂದಲೇ ವ್ಯಕ್ತವಾಗುತ್ತದೆ.
‘ಬೇಲ್’ ಯಶಸ್ಸಿನ ಅಲೆಯಲ್ಲಿ ಶಿವಣ್ಣ: ‘ಎ ಫಾರ್ ಆನಂದ್’ ಶೂಟಿಂಗ್‌ನಲ್ಲಿ ಬ್ಯುಸಿ
ಇತ್ತೀಚೆಗಷ್ಟೇ ತೆರೆಕಂಡ ‘ಬೇಲ್’ ಚಿತ್ರಕ್ಕೆ ಪ್ರೇಕ್ಷಕರಿಂದ ಲಭಿಸಿದ ಅದ್ಭುತ ಪ್ರತಿಕ್ರಿಯೆಯಿಂದ ಶಿವರಾಜ್‌ಕುಮಾರ್ ಖುಷಿಯಲ್ಲಿದ್ದಾರೆ. ಚಿತ್ರಮಂದಿರಗಳಿಗೆ ಭೇಟಿ ನೀಡಿ ಅಭಿಮಾನಿಗಳ ಜೊತೆ ಯಶಸ್ಸನ್ನು ಆಚರಿಸಿದ ಶಿವಣ್ಣ, ಈಗ ತಕ್ಷಣವೇ ‘ಎ ಫಾರ್ ಆನಂದ್’ ಚಿತ್ರದ ಸೆಟ್‌ಗೆ ಹಾಜರಾಗಿದ್ದಾರೆ.
‘ಘೋಸ್ಟ್’ ಚಿತ್ರದ ನಂತರ ಶಿವಣ್ಣ ಮತ್ತು ಶ್ರೀನಿ ಜೋಡಿ ಮತ್ತೆ ಒಂದಾಗಿರುವುದು ಮತ್ತು ‘ಕೆಜಿಎಫ್’ ನಂತರ ರವೀನಾ ಟಂಡನ್ ಕನ್ನಡಕ್ಕೆ ಮರಳಿರುವುದು ‘ಎ ಫಾರ್ ಆನಂದ್’ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
ಇದನ್ನೂ ಓದಿ: ದಿನಕ್ಕೆ 60 ಸಿಗರೇಟ್ ಸೇದುತ್ತಿದ್ದ ನಟ ನಾನಾ ಪಾಟೇಕರ್: ಧೂಮಪಾನ ಬಿಡಲು ಕಾರಣವಾಯ್ತು ಆ ಒಂದು ಭಾವನಾತ್ಮಕ ಘಟನೆ!
