ನವದೆಹಲಿ: ಮಾನವ ಹಕ್ಕುಗಳ ರಕ್ಷಣೆ ಹಾಗೂ ಸಾರ್ವಜನಿಕ ಸೇವಾ ಕ್ಷೇತ್ರದಲ್ಲಿ ನಿಸ್ವಾರ್ಥ ಕೊಡುಗೆ ನೀಡಿದ ದಕ್ಷಿಣ ಆಫ್ರಿಕಾದ ಹಿರಿಯ ನ್ಯಾಯಶಾಸ್ತ್ರಜ್ಞೆ ನವನೀಥಮ್ “ನಾವಿ” ಪಿಳ್ಳೈ ಅವರಿಗೆ 2026ರ ಸಾಲಿನ ಪ್ರತಿಷ್ಠಿತ ನೊಬೆಲ್ ಶಾಂತಿ (Nobel Prize) ಪುರಸ್ಕಾರ ಲಭಿಸಿದೆ. ಭಾರತೀಯ ತಮಿಳು ಮೂಲದವರಾದ ನಾವಿ ಪಿಳ್ಳೈ ಅವರು ದಕ್ಷಿಣ ಆಫ್ರಿಕಾದ ಹೈಕೋರ್ಟ್‌ನಲ್ಲಿ ಸೇವೆ ಸಲ್ಲಿಸಿದ ಪ್ರಥಮ ಶ್ವೇತವರ್ಣೀಯೇತರ ಮಹಿಳಾ ನ್ಯಾಯಾಧೀಶೆ ಎಂಬ ಹೆಗ್ಗಳಿಕೆಗೆ ಪಾತ್ರರಾದವರು. 2008 ರಿಂದ 2014 ರವರೆಗೆ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಹೈಕಮಿಷನರ್ ಆಗಿ ಸೇವೆ ಸಲ್ಲಿಸಿರುವ ಇವರು, ಅಂತರರಾಷ್ಟ್ರೀಯ ಅಪರಾಧ ನ್ಯಾಯಾಲಯದ (ಐಸಿಸಿ) ನ್ಯಾಯಾಧೀಶೆಯಾಗಿ ಹಾಗೂ ರುವಾಂಡಾ ಅಂತರರಾಷ್ಟ್ರೀಯ ಅಪರಾಧ ನ್ಯಾಯಮಂಡಳಿಯ ಅಧ್ಯಕ್ಷೆಯಾಗಿಯೂ ಮಹತ್ವದ ಕಾರ್ಯನಿರ್ವಹಿಸಿದ್ದಾರೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಕಾನೂನು, ನ್ಯಾಯ ಮತ್ತು ಮಾನವ ಹಕ್ಕುಗಳ ಎತ್ತಿಹಿಡಿಯುವಲ್ಲಿ ಅವರ ಜೀವಮಾನದ ಕೊಡುಗೆಯನ್ನು ಗುರುತಿಸಿ ಈ ಮಹೋನ್ನತ ಗೌರವವನ್ನು ನೀಡಲಾಗಿದೆ.
ಪ್ರಬಲ ಸ್ಪರ್ಧೆಯಲ್ಲಿ ಗೆದ್ದು ಬೀಗಿದ ನಾವಿ
ವಿಶ್ವದ ಅತ್ಯಂತ ಗೌರವಾನ್ವಿತ ಮತ್ತು ಶ್ರೇಷ್ಠ ಪುರಸ್ಕಾರವೆಂದು ಪರಿಗಣಿಸಲಾದ ನೊಬೆಲ್ ಶಾಂತಿ ಪ್ರಶಸ್ತಿಯನ್ನು ನಾರ್ವೆಯ ಓಸ್ಲೋ ನಗರದಲ್ಲಿ ಶುಕ್ರವಾರ ಅಧಿಕೃತವಾಗಿ ಘೋಷಿಸಲಾಗಿದೆ. ಈ ಬಾರಿಯ ಪುರಸ್ಕಾರದ ರೇಸ್‌ನಲ್ಲಿ ಹಲವು ಪ್ರಮುಖ ಸಂಸ್ಥೆಗಳು ಮತ್ತು ವ್ಯಕ್ತಿಗಳ ಹೆಸರುಗಳು ಮುಂಚೂಣಿಯಲ್ಲಿದ್ದವು. ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ, ಸುಡಾನ್‌ನಲ್ಲಿ ತುರ್ತು ಸೇವೆ ಒದಗಿಸುತ್ತಿರುವ ರಕ್ಷಣಾ ತಂಡಗಳು, ಉಕ್ರೇನ್‌ನ ಮಕ್ಕಳ ಹಕ್ಕುಗಳ ಹೋರಾಟಗಾರರು ಹಾಗೂ ಎರಡು ಪ್ರಮುಖ ಅಂತರರಾಷ್ಟ್ರೀಯ ನ್ಯಾಯಾಲಯಗಳು ಈ ಸಾಲಿನ ಪ್ರಬಲ ಸ್ಪರ್ಧಿಗಳಾಗಿದ್ದವು. ಇದರ ಜೊತೆಗೆ ಕೆನಡಾದ ಪ್ರಧಾನಮಂತ್ರಿ ಮಾರ್ಕ್ ಕಾರ್ನಿ ಹಾಗೂ ಇರಾನ್ ವಿರುದ್ಧ ಮಿಲಿಟರಿ ಸಮರ ಸಾರಿರುವ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಹೆಸರುಗಳು ಸಹ ಭವಿಷ್ಯ ನುಡಿಯುವ ಮಾರುಕಟ್ಟೆಗಳಲ್ಲಿ ಹರಿದಾಡುತ್ತಿದ್ದವು.
Newly awarded peace laureate Navi Pillay has held states and national leaders accountable and brought hope to victims of violence and conflict. Navi Pillay is one of the great defenders of international legal principles in our time. Her distinguished career reminds us of the need to support, fortify and expand the global rule of law. Navi Pillay’s commitment to justice and human dignity is a source of hope and inspiration to all who seek to bring about a more peaceful world. Read more about the 2026 #NobelPeacePrize: https://t.co/JMjpp1jPKc #NobelPrize
— The Nobel Prize (@NobelPrize) October 9, 2026
ಈ ವರ್ಷದ ನೊಬೆಲ್ ಶಾಂತಿ ಪ್ರಶಸ್ತಿಗಾಗಿ ನಾರ್ವೇಜಿಯನ್ ನೊಬೆಲ್ ಸಮಿತಿಗೆ ಒಟ್ಟು 287 ನಾಮನಿರ್ದೇಶನಗಳು ಬಂದಿದ್ದವು. ಇವುಗಳಲ್ಲಿ ನಾಲ್ಕನೇ ಒಂದಕ್ಕಿಂತ ಹೆಚ್ಚು ನಾಮನಿರ್ದೇಶನಗಳು ವಿವಿಧ ಅಂತರರಾಷ್ಟ್ರೀಯ ಹಾಗೂ ಸ್ವಯಂಸೇವಾ ಸಂಸ್ಥೆಗಳಿಗೆ ಸಂಬಂಧಿಸಿದವುಗಳಾಗಿದ್ದವು. ಶಾಂತಿಯ ಸ್ಥಿರತೆ, ಅಂತರರಾಷ್ಟ್ರೀಯ ಸಹೋದರತ್ವದ ವೃದ್ಧಿ ಹಾಗೂ ಜಾಗತಿಕ ಶಾಂತಿಯನ್ನು ಬಲಪಡಿಸುವ ಸಂಸ್ಥೆಗಳ ಮೌನ ಸೇವೆಯನ್ನು ನೊಬೆಲ್ ಸಮಿತಿಯು ಪ್ರಮುಖ ಮಾನದಂಡವಾಗಿ ಪರಿಗಣಿಸುತ್ತದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಹಿಂದಿನ ವರ್ಷ ಯಾರಿಗೆ ಒಲಿದಿತ್ತು ಪ್ರಶಸ್ತಿ?
ಕಳೆದ ವರ್ಷದ (2025) ನೊಬೆಲ್ ಶಾಂತಿ ಪುರಸ್ಕಾರವು ವೆನೆಜುವೆಲಾದ ವಿಪಕ್ಷ ನಾಯಕಿ ಮರಿಯಾ ಕೊರಿನಾ ಮಚಾಡೊ ಅವರಿಗೆ ಲಭಿಸಿತ್ತು. ತಮ್ಮ ದೇಶದಲ್ಲಿ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಮರುಸ್ಥಾಪಿಸಲು ಅವರು ನಡೆಸಿದ ಅಪ್ರತಿಮ ಹೋರಾಟವನ್ನು ಗುರುತಿಸಿ, “ಗಾಢ ಕತ್ತಲೆಯ ನಡುವೆಯೂ ಪ್ರಜಾಪ್ರಭುತ್ವದ ಬೆಳಕನ್ನು ಕಾಯ್ದುಕೊಂಡ ಧೀರ ಮಹಿಳೆ” ಎಂದು ನೊಬೆಲ್ ಸಮಿತಿ ಅವರನ್ನು ಶ್ಲಾಘಿಸಿತ್ತು. ಅಮೆರಿಕವು ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಾಡುರೊ ಅವರನ್ನು ಅಧಿಕಾರದಿಂದ ಉರುಳಿಸಿದ ಕೆಲವೇ ದಿನಗಳಲ್ಲಿ, ಮಚಾಡೊ ತಮ್ಮ ನೊಬೆಲ್ ಪದಕವನ್ನು ಡೊನಾಲ್ಡ್ ಟ್ರಂಪ್ ಅವರಿಗೆ ಹಸ್ತಾಂತರಿಸಿದ್ದರು. ಆದರೆ ನೊಬೆಲ್ ಕಮಿಟಿಯ ನಿಯಮಾವಳಿಗಳ ಪ್ರಕಾರ, ನೊಬೆಲ್ ಪುರಸ್ಕಾರದ ಗೌರವ ಹಾಗೂ ಪ್ರಶಸ್ತಿಯನ್ನು ಮತ್ತೊಬ್ಬರಿಗೆ ವರ್ಗಾಯಿಸಲು ಅವಕಾಶವಿಲ್ಲದಿರುವುದರಿಂದ ಈ ಪ್ರಸಂಗವು ಕೇವಲ ಸಂಕೇತಾತ್ಮಕ ಘಟನೆಯಾಗಿ ಉಳಿಯಿತು.
ಇದನ್ನೂ ಓದಿ: ಸಿಇಸಿ ಜ್ಞಾನೇಶ್ ಕುಮಾರ್‌ಗೆ ‘ಝೆಡ್ ಪ್ಲಸ್’ ಭದ್ರತೆ ಇನ್ನಷ್ಟು ಬಿಗಿ: ‘ಮತ ಕಳವು’ ಆರೋಪಿಸಿ ಬೀದಿಗಿಳಿದ ರಾಹುಲ್ ಗಾಂಧಿ, ವಿಪಕ್ಷಗಳು!
