ಮುಂಬೈ: ಬಾಲಿವುಡ್‌ನ ಹಿರಿಯ ನಟಿ ಹಾಗೂ ಸಂಸದೆ ಜಯಾ ಬಚ್ಚನ್ (Jaya Bachchan ) ಮತ್ತು ಮಾಧ್ಯಮ ಪ್ರತಿನಿಧಿಗಳ ನಡುವಿನ ಮುನಿಸು ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಸಾರ್ವಜನಿಕ ಸ್ಥಳಗಳಲ್ಲಿ ತಮ್ಮ ಫೋಟೋಗಳನ್ನು ಕ್ಲಿಕ್ಕಿಸುವ ಪಾಪರಾಜಿಗಳ ವಿರುದ್ಧ ಜಯಾ ಬಚ್ಚನ್ ಆಕ್ರೋಶ ಹೊರಹಾಕುವುದು ಹೊಸದೇನಲ್ಲ. ಆದರೆ, ಇತ್ತೀಚೆಗೆ ನಡೆದ ಸಾರ್ವಜನಿಕ ಕಾರ್ಯವೊಂದರಲ್ಲಿ ಜಯಾ ಬಚ್ಚನ್ ಅವರು ಕ್ಯಾಮೆರಾ ಕಣ್ಣುಗಳಿಗೆ ಕೋಪದಿಂದ ದಿಟ್ಟಿಸಿ ನೋಡಿದಾಗ, ಕೆರಳಿದ ಫೋಟೋ ಶೂಟರ್‌ಗಳು ನೀಡಿದ ಕೆಲವೊಂದು ಆಕ್ರೋಶದ ಹಾಗೂ ವ್ಯಂಗ್ಯದ ಮಾತುಗಳು ಇಡೀ ಚಿತ್ರರಂಗದಲ್ಲಿ ಭಾರೀ ಚರ್ಚೆಗೆ ಹಾಗೂ ವಿವಾದಕ್ಕೆ ಗ್ರಾಸವಾಗಿವೆ. ಹಿರಿಯ ನಟ ಅಮಿತಾಭ್ ಬಚ್ಚನ್ ಅವರ ಪತ್ನಿಯಾಗಿ ದಶಕಗಳ ಕಾಲ ಸಿನಿಮಾರಂಗದಲ್ಲಿ ಗುರುತಿಸಿಕೊಂಡಿರುವ ಜಯಾ ಬಚ್ಚನ್, ಈಗ ರಾಜಕೀಯ ಜೀವನದಲ್ಲಿ ಬ್ಯುಸಿಯಾಗಿದ್ದು, ಪದೇ ಪದೇ ತಮ್ಮನ್ನು ಹಿಂಬಾಲಿಸುವ ಪಾಪರಾಜಿಗಳ ಅತಿಯಾದ ವರ್ತನೆಯನ್ನು ಎಂದಿಗೂ ಒಪ್ಪಿಕೊಂಡವರಲ್ಲ.
ಇತ್ತೀಚೆಗೆ ಜಯಾ ಬಚ್ಚನ್ ಅವರು ತಮ್ಮ ಮಗಳು ಶ್ವೇತಾ ಬಚ್ಚನ್ ನಂದಾ ಅವರೊಂದಿಗೆ ಸಾರ್ವಜನಿಕ ಸ್ಥಳದಲ್ಲಿ ಕಾಣಿಸಿಕೊಂಡಿದ್ದರು. ತಾಯಿ-ಮಗಳು ಇಬ್ಬರೂ ಒಂದೇ ರೀತಿಯ ಸರಳವಾದ ಕುರ್ತಾಗಳನ್ನು ಧರಿಸಿ ನಿಗದಿತ ಸ್ಥಳಕ್ಕೆ ಆಗಮಿಸಿದ್ದರು. ಈ ವೇಳೆ ಅಲ್ಲಿಗೆ ಆಗಮಿಸಿದ್ದ ಪಾಪರಾಜಿಗಳು ಹಿರಿಯ ನಟಿ ಹಾಗೂ ಅವರ ಮಗಳ ಸುಂದರ ಕ್ಷಣಗಳನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯಲು ಯತ್ನಿಸಿದರು. ಆದರೆ, ಎಂದಿನಂತೆ ಜಯಾ ಬಚ್ಚನ್ ಪೋಸ್ ನೀಡಲು ನಿರಾಕರಿಸಿದರು. ಮಗಳು ಶ್ವೇತಾ ಬಚ್ಚನ್ ಗೌರವಾನ್ವಿತರಾಗಿ ಮುಂದೆ ನಡೆದರೂ, ಜಯಾ ಬಚ್ಚನ್ ಮಾತ್ರ ಅಲ್ಲೇ ನಿಂತು ಮಾಧ್ಯಮದವರನ್ನು ಕೆರಳಿ ನೋಡುವಂತೆ ತೀವ್ರವಾಗಿ ದಿಟ್ಟಿಸಿ ನೋಡಿ ತಮ್ಮ ಅಸಮಾಧಾನ ಹೊರಹಾಕಿದರು. ಜಯಾ ಬಚ್ಚನ್ ಮುಖಕ್ಕೆ ಮಾಸ್ಕ್ ಧರಿಸಿದ್ದರಿಂದ ಅವರ ಕಣ್ಣುಗಳ ಕೋಪ ಹಾಗೂ ತೀವ್ರ ಅಸಮಾಧಾನವು ನೇರವಾಗಿ ಎಲ್ಲರಿಗೂ ಗೋಚರಿಸಿತ್ತು.
ಜಯಾ ಬಚ್ಚನ್‌ಗೆ ಟಾಂಗ್‌ ಕೊಟ್ಟ ಪಾಪರಾಜಿ
ನಟಿಯ ಈ ರೀತಿಯ ವರ್ತನೆಯಿಂದ ಆಕ್ರೋಶಗೊಂಡ ಅಲ್ಲಿದ್ದ ಪಾಪರಾಜಿಗಳ ಪೈಕಿ ಒಬ್ಬರು ನೇರವಾಗಿ ಪ್ರಶ್ನೆ ಮಾಡಲಾರಂಭಿಸಿದರು. “ನಾವು ನಮ್ಮ ಕರ್ತವ್ಯ ಮಾಡುತ್ತಿದ್ದೇವೆ, ನೀವ್ಯಾಕೆ ಹೀಗೆ ಕೋಪದಿಂದ ದಿಟ್ಟಿಸುತ್ತಿದ್ದೀರಿ? ನೀವು ಅಮಿತಾಭ್ ಬಚ್ಚನ್ ಅವರ ಧರ್ಮಪತ್ನಿ ಎಂಬ ಕಾರಣಕ್ಕೆ ಮಾತ್ರ ನಾವು ನಿಮ್ಮ ಫೋಟೋ ಕ್ಲಿಕ್ ಮಾಡುತ್ತಿದ್ದೇವೆ” ಎಂದು ಏಕವಚನದಲ್ಲೇ ತಿರುಗೇಟು ನೀಡಿದರು. ಈ ಮಧ್ಯೆ ಪರಿಸ್ಥಿತಿ ವಿಕೋಪಕ್ಕೆ ಹೋಗುವುದನ್ನು ತಡೆಯಲು ಮಗಳು ಶ್ವೇತಾ ಬಚ್ಚನ್ ಬಂದು ತಾಯಿಯ ಕೈ ಹಿಡಿದು ಮುಂದೆ ಕರೆದೊಯ್ಯಲು ಯತ್ನಿಸಿದರು. ಆಗ ಮತ್ತೊಬ್ಬ ಫೋಟೋ ಶೂಟರ್ ಶ್ವೇತಾಗೆ ಉದ್ದೇಶಿಸಿ, “ದಯವಿಟ್ಟು ನಿಮ್ಮ ಅಮ್ಮನನ್ನು ಇಲ್ಲಿಂದ ಕರೆದುಕೊಂಡು ಹೋಗಿ, ನಮಗೆ ಇನ್ನು ಮುಂದೆ ಇವರ ಫೋಟೋಗಳನ್ನು ತೆಗೆಯುವ ಯಾವುದೇ ಉತ್ಸಾಹವಿಲ್ಲ” ಎಂದು ಹರಿಹಾಯ್ದಿದ್ದಾರೆ. ಕೊನೆಯಲ್ಲಿ ಒಬ್ಬ ಪಾಪರಾಜಿ ಜಯಾ ಬಚ್ಚನ್ ಅವರನ್ನು ಉದ್ದೇಶಿಸಿ, “ಈ ಸಿಟ್ಟು ಹಾಗೂ ಕೋಪದ ನೋಟವನ್ನು ನಿಮ್ಮ ಪತಿ ಅಮಿತಾಭ್ ಬಚ್ಚನ್ ಅವರಿಗೆ ತೋರಿಸಿ, ನಮಗೆ ಅಲ್ಲ” ಎಂದು ಕಟುವಾದ ಶಬ್ದಗಳಿಂದ ಆಕ್ಷೇಪ ವ್ಯಕ್ತಪಡಿಸಿದ್ದು ವಿವಾದವನ್ನು ಮತ್ತಷ್ಟು ಉಲ್ಬಣಗೊಳಿಸಿದೆ.
ಜಯಾ ಬಚ್ಚನ್ ಮತ್ತು ಪಾಪರಾಜಿಗಳ ನಡುವೆ ಇಂತಹ ಮಾತಿನ ಚಕಮಕಿ ನಡೆದಿರುವುದು ಇದೇ ಮೊದಲೇನಲ್ಲ. ಕಳೆದ 2025ರ ಡಿಸೆಂಬರ್‌ನಲ್ಲಿ ಬರ್ಕಾ ದತ್ ಆಯೋಜಿಸಿದ್ದ ವಿಶೇಷ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಜಯಾ ಬಚ್ಚನ್, ತಾವು ಮಾಧ್ಯಮಗಳ ಮಗು ಎಂದು ಹೇಳಿಕೊಳ್ಳುತ್ತಲೇ, ಇಂದಿನ ಪಾಪರಾಜಿಗಳ ಜತೆ ತನಗೆ ಯಾವುದೇ ಸಂಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದರು. ಸಾರ್ವಜನಿಕರನ್ನು ಪ್ರತಿನಿಧಿಸಲು ಯಾವುದೇ ವೃತ್ತಿಪರ ತರಬೇತಿ ಇಲ್ಲದೆ, ಕೇವಲ ಕೈಯಲ್ಲಿ ಮೊಬೈಲ್ ಹಿಡಿದು ಯಾರ ಹಿಂದೆ ಬೇಕಾದರೂ ಬಿದ್ದು ಅಸಭ್ಯ ಕಾಮೆಂಟ್‌ಗಳನ್ನು ಪಾಪರಾಜಿಗಳು ಪಾಸ್ ಮಾಡುತ್ತಾರೆ ಎಂದು ತೀವ್ರವಾಗಿ ಟೀಕಿಸಿದ್ದರು. ಹೊರಗಡೆ ಹರಿದ ಬಟ್ಟೆಗಳನ್ನು ಧರಿಸಿ, ಕೇವಲ ಮೊಬೈಲ್ ಇದೆ ಎಂಬ ಕಾರಣಕ್ಕೆ ಸೆಲೆಬ್ರಿಟಿಗಳ ವೈಯಕ್ತಿಕ ಸ್ವಾತಂತ್ರ್ಯಕ್ಕೆ ಭಂಗ ತರುತ್ತಿದ್ದಾರೆ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದರು.
ಪಾಪರಾಜಿಗೂ-ಜಯ ಬಚ್ಚನ್‌ಗೂ ಇದೆ ಹಳೆಯ ವಿವಾದದ ನಂಟು
ಜಯಾ ಬಚ್ಚನ್ ಅವರ ಈ ಬಹಿರಂಗ ಹೇಳಿಕೆಗಳು ಆಗಿನಿಂದಲೂ ಮಾಧ್ಯಮ ಹಾಗೂ ಪಾಪರಾಜಿ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು. ವರಿಂದರ್ ಚಾವ್ಲಾ ಸೇರಿದಂತೆ ಮುಂಬೈನ ಪ್ರಮುಖ ಪಾಪರಾಜಿಗಳು, ತಾವು ದಶಕಗಳಿಂದ ವೃತ್ತಿಯಲ್ಲಿ ಪ್ರಾಮಾಣಿಕವಾಗಿ ಸೆಲೆಬ್ರಿಟಿಗಳಿಗೆ ಗೌರವ ನೀಡುತ್ತಾ ಬಂದಿದ್ದರೂ ಜಯಾ ಬಚ್ಚನ್ ಅವರಿಂದ ಮಾತ್ರ ಎಂದಿಗೂ ಉತ್ತಮ ಪ್ರತಿಕ್ರಿಯೆ ಸಿಕ್ಕಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದರು. ಇನ್ನು ಕೆಲವರು ಜಯಾ ಬಚ್ಚನ್ ಅವರ ಈ ಅಹಂಕಾರಿ ವರ್ತನೆ ಮುಂದುವರಿದರೆ ಅವರ ಮೊಮ್ಮಗನ ಸಿನಿಮಾದ ಪ್ರಚಾರ ಕಾರ್ಯಗಳನ್ನು ಬಹಿಷ್ಕರಿಸುವುದಾಗಿಯೂ ಎಚ್ಚರಿಕೆ ನೀಡಿದ್ದರು. ಒಟ್ಟಿನಲ್ಲಿ, ಬಾಲಿವುಡ್‌ನ ಹಿರಿಯ ನಟಿ ಜಯಾ ಬಚ್ಚನ್ ಹಾಗೂ ಫೋಟೋ ಶೂಟರ್‌ಗಳ ನಡುವಿನ ಈ ಶೀತಲ ಸಮರ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಇದನ್ನೂ ಓದಿ: ಬಿಗ್‌ಬಾಸ್ ಮನೆಯಲ್ಲಿ ತಾರಕಕ್ಕೇರಿದ ಜಗಳ: ಈ ವಾರ ವೀಕೆಂಡ್ ಪಂಚಾಯ್ತಿಯಲ್ಲಿ ಕಠಿಣ ನಿರ್ಧಾರದ ಸುಳಿವು ನೀಡಿದ ಸುದೀಪ್!
