ಬೆಂಗಳೂರು: ಬಹುನಿರೀಕ್ಷಿತ (Bengaluru) ಉಪನಗರ ರೈಲು ಯೋಜನೆಗೆ ಈಗ ಹೊಸ ವೇಗ ಸಿಕ್ಕಿದ್ದು, ರೈಲು ಬೋಗಿಗಳ ಪೂರೈಕೆಗೆ ಸಂಬಂಧಿಸಿದಂತೆ ಮಹತ್ವದ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಕೆ-ರೈಡ್ ಸಂಸ್ಥೆಯ ಅಂಗಸಂಸ್ಥೆಯಾದ ಬಿ-ರೈಡ್, ಚೆನ್ನೈ ಮೂಲದ ಇಂಟೆಗ್ರಲ್ ಕೋಚ್ ಫ್ಯಾಕ್ಟರಿ (ICF) ಗೆ ಬರೋಬ್ಬರಿ 1,513.75 ಕೋಟಿ ರೂಪಾಯಿಗಳ ಬೃಹತ್ ಕಾರ್ಯಾದೇಶವನ್ನು ನೀಡಿದೆ. ಈ ಒಪ್ಪಂದದ ಅಡಿಯಲ್ಲಿ ಐಸಿಎಫ್ ಸಂಸ್ಥೆಯು ಮೆಟ್ರೋ ಮಾದರಿಯ 153 ಅತ್ಯಾಧುನಿಕ ಹವಾನಿಯಂತ್ರಿತ ಬೋಗಿಗಳನ್ನು ತಯಾರಿಸಿ ಪೂರೈಸಲಿದೆ.
18 ತಿಂಗಳ ಒಳಗೆ ವಿತರಣೆ ಆರಂಭ
ಒಟ್ಟು 51 ರೈಲು ಸೆಟ್ಗಳನ್ನು ನಿರ್ಮಿಸಲು ಉದ್ದೇಶಿಸಲಾಗಿದ್ದು, ಪ್ರತಿ ಸೆಟ್ ಮೂರು ಬೋಗಿಗಳನ್ನು ಒಳಗೊಂಡಿರುತ್ತದೆ. ಈ ರೈಲುಗಳನ್ನು ವಿಶೇಷವಾಗಿ ಬೆಂಗಳೂರು ಉಪನಗರ ರೈಲು ಯೋಜನೆಯ ಕಾರಿಡಾರ್ 2 ಮತ್ತು ಕಾರಿಡಾರ್ 4 ಮಾರ್ಗಗಳಲ್ಲಿ ಓಡಿಸಲು ನಿರ್ಧರಿಸಲಾಗಿದೆ. ಮುಂದಿನ 18 ತಿಂಗಳ ಒಳಗಾಗಿ ಈ ಬೋಗಿಗಳ ಹಂತ ಹಂತದ ವಿತರಣೆ ಆರಂಭವಾಗಲಿದ್ದು, ಯೋಜನೆಯ ಉದ್ಘಾಟನಾ ಹಂತಕ್ಕೆ ಸರಿಯಾಗಿ ಇವು ಲಭ್ಯವಾಗಲಿವೆ. ಈ ನೂತನ ರೈಲುಗಳು ಮೆಟ್ರೋದಂತೆಯೇ ಸುಸಜ್ಜಿತ ಒಳಾಂಗಣ ಮತ್ತು ಆಧುನಿಕ ಸೌಲಭ್ಯಗಳನ್ನು ಹೊಂದಿರಲಿದ್ದು, ನಗರದ ನಿವಾಸಿಗಳಿಗೆ ವೇಗದ ಮತ್ತು ಆರಾಮದಾಯಕ ಪ್ರಯಾಣದ ಅನುಭವ ನೀಡಲಿವೆ ಎಂದು ಕೆ-ರೈಡ್ ವ್ಯವಸ್ಥಾಪಕ ನಿರ್ದೇಶಕ ಲಕ್ಷ್ಮಣ್ ಸಿಂಗ್ ತಿಳಿಸಿದ್ದಾರೆ.
ಈ ಬೋಗಿಗಳನ್ನು ಪ್ರಮುಖವಾಗಿ ಬೆನ್ನಿಗಾನಹಳ್ಳಿ ಮತ್ತು ಚಿಕ್ಕಬಾಣಾವರ ನಡುವಿನ ‘ಮಲ್ಲಿಗೆ ಮಾರ್ಗ’ (ಕಾರಿಡಾರ್ 2) ಹಾಗೂ ಹೀಲಲಿಗೆ ಮತ್ತು ರಾಜನಕುಂಟೆ ನಡುವಿನ ಮಾರ್ಗದಲ್ಲಿ (ಕಾರಿಡಾರ್ 4) ಬಳಸಲಾಗುತ್ತದೆ. ಈ ರೈಲು ಸಂಚಾರ ಆರಂಭವಾದರೆ ಬೆಂಗಳೂರಿನ ರಸ್ತೆಗಳಲ್ಲಿನ ಟ್ರಾಫಿಕ್ ದಟ್ಟಣೆ ಗಣನೀಯವಾಗಿ ಕಡಿಮೆಯಾಗುವ ನಿರೀಕ್ಷೆಯಿದೆ. ಅಲ್ಲದೆ, ಇದು ನಗರದ ವಿವಿಧ ವಸತಿ ಪ್ರದೇಶಗಳು, ವಾಣಿಜ್ಯ ಕೇಂದ್ರಗಳು ಮತ್ತು ರೈಲ್ವೆ ನಿಲ್ದಾಣಗಳ ನಡುವೆ ಉತ್ತಮ ಸಂಪರ್ಕವನ್ನು ಕಲ್ಪಿಸಲಿದೆ.
2020ರಲ್ಲಿ ಈ ಯೋಜನೆಗೆ ಅನುಮೋದನೆ ಸಿಕ್ಕಿದ್ದರೂ, ಭೂಸ್ವಾಧೀನ ಮತ್ತು ಟೆಂಡರ್ ಪ್ರಕ್ರಿಯೆಗಳಲ್ಲಿನ ಸವಾಲುಗಳಿಂದಾಗಿ ವಿಳಂಬವಾಗಿತ್ತು. ಆರಂಭದಲ್ಲಿ ಖಾಸಗಿ ಸಂಸ್ಥೆಗಳಿಂದ ಬೋಗಿಗಳನ್ನು ಗುತ್ತಿಗೆ ಪಡೆಯುವ ಚಿಂತನೆ ಇತ್ತಾದರೂ, ಅದು ಸಾಧ್ಯವಾಗದ ಕಾರಣ ಈಗ ಕರ್ನಾಟಕ ಸರ್ಕಾರವು ನೇರವಾಗಿ ಐಸಿಎಫ್ ಮೂಲಕ ಬೋಗಿಗಳನ್ನು ಖರೀದಿಸಲು ಮುಂದಾಗಿದೆ. ಹಳಿ ಮತ್ತು ನಿಲ್ದಾಣಗಳ ಕಾಮಗಾರಿ ಮುಗಿಯುವ ಹೊತ್ತಿಗೆ ರೈಲುಗಳು ಸಿದ್ಧವಾಗಿರಲಿವೆ ಎಂದು ಅಧಿಕಾರಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಬೆಂಗಳೂರಿನಂತಹ ವೇಗವಾಗಿ ಬೆಳೆಯುತ್ತಿರುವ ನಗರಕ್ಕೆ ಈ ಸಾರಿಗೆ ವ್ಯವಸ್ಥೆಯು ಭವಿಷ್ಯದಲ್ಲಿ ಅತ್ಯಂತ ಅವಶ್ಯಕವಾದ ಮೈಲುಗಲ್ಲಾಗಲಿದೆ.
ಇದನ್ನೂ ಓದಿ: ನಾಳೆ ಬೆಂಗಳೂರು ನಿವಾಸಿಗಳಿಗೆ ಸಿಗಲಿದೆ ಗುಡ್ನ್ಯೂಸ್, ಏನಿದು ಡಿಕೆಶಿ ಗ್ಯಾರಂಟಿ?
