ಗ್ರೇಟರ್ ನೋಯ್ಡಾ: ಉತ್ತರ ಪ್ರದೇಶದ ಗ್ರೇಟರ್ ನೋಯ್ಡಾದಲ್ಲಿ ಶುಕ್ರವಾರ ಆರಂಭಗೊಂಡ ಉತ್ತರ ಪ್ರದೇಶ ಅಂತರರಾಷ್ಟ್ರೀಯ ವ್ಯಾಪಾರ ಮೇಳದ (ಯುಪಿಐಟಿಎಸ್) ನಾಲ್ಕನೇ ಆವೃತ್ತಿಯನ್ನು ಕೇಂದ್ರ ಗೃಹ ಸಚಿವ ಅಮಿತ್ ಶಾ (Amit Shah) ಅವರು ಅಧಿಕೃತವಾಗಿ ಉದ್ಘಾಟಿಸಿದರು. ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅವರು, ದೇಶದ ರಕ್ಷಣಾ ಉತ್ಪಾದನಾ ಕ್ಷೇತ್ರದಲ್ಲಿ ಉತ್ತರ ಪ್ರದೇಶದ ಪಾತ್ರ ದಿನದಿಂದ ದಿನಕ್ಕೆ ಗಣನೀಯವಾಗಿ ಹೆಚ್ಚುತ್ತಿದೆ ಎಂದರು. ರಾಜ್ಯದಲ್ಲಿ ತಯಾರಾಗುತ್ತಿರುವ ಬ್ರಹ್ಮೋಸ್ ಕ್ಷಿಪಣಿಗಳು ಗಡಿಪಾರಿನ ಶತ್ರು ದೇಶವಾದ ಪಾಕಿಸ್ತಾನಕ್ಕೆ ನಿದ್ದೆಗೆಡಿಸಿದ್ದರೆ, ಅಮೇಥಿಯಲ್ಲಿ ಉತ್ಪಾದನೆಯಾಗುತ್ತಿರುವ ಎಕೆ-203 ಅಸಾಲ್ಟ್ ರೈಫಲ್ಗಳು ನಕ್ಸಲೀಯರು ಹಾಗೂ ಉಗ್ರರ ನಿದ್ದೆಗೆಡಿಸಿವೆ ಎಂದು ಬಣ್ಣಿಸಿದರು.
ಯೋಗಿ ಕಾರ್ಯವನ್ನ ಹೊಗಳಿದ ಅಮಿತ್ ಶಾ
ಹಳೆಯ ಆಡಳಿತಾವಧಿಯ ದುರಾಡಳಿತವನ್ನು ಸ್ಮರಿಸಿದ ಗೃಹ ಸಚಿವರು, ಹಿಂದೆ ಸಮಾಜವಾದಿ ಪಕ್ಷ (ಎಸ್ಪಿ) ಮತ್ತು ಬಹುಜನ ಸಮಾಜ ಪಕ್ಷ (ಬಿಎಸ್ಪಿ) ರಾಜ್ಯದಲ್ಲಿ ಅಧಿಕಾರದಲ್ಲಿದ್ದಾಗ ಅಪರಾಧ ಕೃತ್ಯಗಳೇ ಒಂದು ದೊಡ್ಡ ಉದ್ಯಮವಾಗಿ ಬೆಳೆದಿದ್ದವು. ಪ್ರತಿಯೊಂದು ಮೂಲೆಯಲ್ಲೂ ಕಾನೂನುಬಾಹಿರ ಹಾಗೂ ಕಚ್ಚಾ ನಾಡಪಿಸ್ತೂಲುಗಳ ವ್ಯಾಪಾರ ವಿಜೃಂಭಿಸುತ್ತಿತ್ತು. ರಾಜ್ಯದಾದ್ಯಂತ ಮಾಫಿಯಾ ಮತ್ತು ರೌಡಿಗಳ ಸಾಮ್ರಾಜ್ಯವೇ ಆಡಳಿತ ನಡೆಸುತ್ತಿತ್ತು. ಆದರೆ 2017ರಲ್ಲಿ ಭಾರತೀಯ ಜನತಾ ಪಾರ್ಟಿ ಅಧಿಕಾರಕ್ಕೆ ಬಂದು ಯೋಗಿ ಆದಿತ್ಯನಾಥ್ ಅವರು ಮುಖ್ಯಮಂತ್ರಿಯಾದ ನಂತರ ರಾಜ್ಯದ ಚಿತ್ರಣ ಸಂಪೂರ್ಣ ಬದಲಾಗಿದೆ. ಯೋಗಿ ನೇತೃತ್ವದ ಸರ್ಕಾರವು ರಾಜ್ಯದಿಂದ ಮಾಫಿಯಾವನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡಿದ್ದು, ಇದು ಬಂಡವಾಳ ಹೂಡಿಕೆಗೆ ಅತ್ಯಂತ ಸೂಕ್ತವಾದ ಹಾಗೂ ಶಾಂತಿಯುತ ವಾತಾವರಣವನ್ನು ನಿರ್ಮಿಸಿದೆ ಎಂದರು.
ಒಂದು ಕಾಲದಲ್ಲಿ ಭೀತಿಯ ವಾತಾವರಣದಲ್ಲಿದ್ದ ಉತ್ತರ ಪ್ರದೇಶ, ಇಂದು ಭಯಮುಕ್ತವಾಗಿ ದೇಶದ ಪ್ರಮುಖ ಹೂಡಿಕೆ ಕೇಂದ್ರ ಹಾಗೂ ರಾಷ್ಟ್ರೀಯ ಪ್ರಗತಿಯ ಎಂಜಿನ್ ಆಗಿ ಹೊರಹೊಮ್ಮಿದೆ. ಈ ಅದ್ಭುತ ಪರಿವರ್ತನೆಯು ಕೇಂದ್ರ ಮತ್ತು ರಾಜ್ಯದ ‘ಡಬಲ್ ಎಂಜಿನ್’ ಸರ್ಕಾರದ ಆಡಳಿತಕ್ಕೆ ಸಿಕ್ಕ ಜಯವಾಗಿದೆ. ಈ ಧನಾತ್ಮಕ ಬದಲಾವಣೆಯ ಬಲದಿಂದಲೇ ಉತ್ತರ ಪ್ರದೇಶವು ಇಂದು 1 ಟ್ರಿಲಿಯನ್ ಡಾಲರ್ ಆರ್ಥಿಕತೆಯಾಗುವ ಬೃಹತ್ ಮತ್ತು ಮಹತ್ವಾಕಾಂಕ್ಷೆಯ ಗುರಿಯನ್ನು ಹೊಂದಲು ಸಾಧ್ಯವಾಗಿದೆ ಎಂದು ಅಮಿತ್ ಶಾ ವಿಶ್ವಾಸ ವ್ಯಕ್ತಪಡಿಸಿದರು.
ಏನೆಲ್ಲಾ ಇರಲಿದೆ ಈ ಕಾರ್ಯಕ್ರಮದಲ್ಲಿ?
ಸೆಪ್ಟೆಂಬರ್ 25 ರಿಂದ 29 ರವರೆಗೆ ಗ್ರೇಟರ್ ನೋಯ್ಡಾದ ಇಂಡಿಯಾ ಎಕ್ಸ್ಪೋ ಸೆಂಟರ್ ಅಂಡ್ ಮಾರ್ಟ್ನಲ್ಲಿ ಐದು ದಿನಗಳ ಕಾಲ ನಡೆಯಲಿರುವ ಈ ಬೃಹತ್ ವ್ಯಾಪಾರ ಮೇಳವನ್ನು ಉತ್ತರ ಪ್ರದೇಶ ಸರ್ಕಾರ ಮತ್ತು ಇಂಡಿಯಾ ಎಕ್ಸ್ಪೋಸಿಷನ್ ಮಾರ್ಟ್ ಲಿಮಿಟೆಡ್ ಜಂಟಿಯಾಗಿ ಆಯೋಜಿಸಿವೆ. ಈ ಬಾರಿಯ ಪ್ರದರ್ಶನದಲ್ಲಿ 2,400ಕ್ಕೂ ಹೆಚ್ಚು ಪ್ರದರ್ಶಕರು ಭಾಗವಹಿಸುತ್ತಿದ್ದಾರೆ. ಆಸ್ಟ್ರಿಯಾ, ಜಪಾನ್, ರಷ್ಯಾ, ಸಿಂಗಾಪುರ, ಬೆಲಾರಸ್ ಮತ್ತು ವಿಯೆಟ್ನಾಂ ದೇಶಗಳು ಈ ಮೇಳದ ಪಾಲುದಾರ ದೇಶಗಳಾಗಿ ಸಾಥ್ ನೀಡಿವೆ. ಜಾಗತಿಕ ಮಟ್ಟದಲ್ಲಿ 85 ದೇಶಗಳ 550ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ಖರೀದಿಗಾರರು ಸೇರಿದಂತೆ ಒಟ್ಟು 1.5 ಲಕ್ಷ ಬಿ2ಬಿ ಖರೀದಿಗಾರರು ಹಾಗೂ ಸುಮಾರು 4.5 ಲಕ್ಷ ಸಾರ್ವಜನಿಕ ವೀಕ್ಷಕರು ಭಾಗವಹಿಸುವ ನಿರೀಕ್ಷೆಯಿದೆ.
ಈ ಬಾರಿಯ ಪ್ರದರ್ಶನದಲ್ಲಿ ರಾಜ್ಯದ ಅತ್ಯಂತ ಜನಪ್ರಿಯ ‘ಒಂದು ಜಿಲ್ಲೆ, ಒಂದು ಉತ್ಪನ್ನ’ (ODOP) ಯೋಜನೆಯ ಜೊತೆಗೆ ಹೊಸದಾಗಿ ‘ಒಂದು ಜಿಲ್ಲೆ, ಒಂದು ಖಾದ್ಯ’ (ODOC) ಉಪಕ್ರಮಕ್ಕೂ ವಿಶೇಷ ಒತ್ತು ನೀಡಲಾಗುತ್ತಿದೆ. ಇದು ಉತ್ತರ ಪ್ರದೇಶದ ಸಮಗ್ರ ಆರ್ಥಿಕ ವ್ಯವಸ್ಥೆ ಹಾಗೂ ವೈವಿಧ್ಯಮಯ ಸಂಸ್ಕೃತಿಯನ್ನು ಜಗತ್ತಿಗೆ ಪರಿಚಯಿಸಲು ಪ್ರಮುಖ ವೇದಿಕೆಯಾಗಿದೆ.
ಇದನ್ನೂ ಓದಿ: ಏರ್ ಇಂಡಿಯಾ ಸಹ-ಪೈಲಟ್ ಅಮಾನತು: ಜ್ಯೂರಿಚ್ ವಿಮಾನ ನಿಲ್ದಾಣದಲ್ಲಿ ಮದ್ಯಪಾನ ಮಾಡಿ ಸಿಕ್ಕಿಬಿದ್ದ ಸಿಬ್ಬಂದಿ
