ಚೀನ: ಬಾಹ್ಯಾಕಾಶ ಕ್ಷೇತ್ರದಲ್ಲಿ ಜಾಗತಿಕವಾಗಿ ಅಧಿಪತ್ಯ ಸಾಧಿಸಲು ಮುನ್ನುಗ್ಗುತ್ತಿರುವ ಚೀನಾಕ್ಕೆ(China) ಭಾರಿ ಹಿನ್ನಡೆಯಾಗಿದೆ. ಚೀನಾದ (China) ಪ್ರತಿಷ್ಠಿತ ‘ಲಾಂಗ್ ಮಾರ್ಚ್ 7ಎ’ (CZ-7A) ರಾಕೆಟ್ ಉಡಾವಣೆಯಾದ ಕೆಲವೇ ಸೆಕೆಂಡುಗಳಲ್ಲಿ ಆಕಾಶದಲ್ಲೇ ಭೀಕರವಾಗಿ ಸ್ಫೋಟಗೊಂಡಿದೆ. ಹೈನಾನ್ ಪ್ರಾಂತ್ಯದ ವೆನ್ಚಾಂಗ್ ಉಪಗ್ರಹ ಉಡಾವಣಾ ಕೇಂದ್ರದಿಂದ ಜಿಗಿದ ಈ ರಾಕೆಟ್, ಮೇಲಕ್ಕೆ ಹಾರಿದ ಕೇವಲ 85 ಸೆಕೆಂಡುಗಳ ಅವಧಿಯಲ್ಲಿ ತಾಂತ್ರಿಕ ದೋಷಕ್ಕೆ ಒಳಗಾಗಿ ಸ್ಫೋಟಿಸಿದೆ. ರಾಕೆಟ್ನ ಮೊದಲ ಹಂತದ ಪ್ರಯಾಣದಲ್ಲೇ ಈ ದುರಂತ ಸಂಭವಿಸಿದ್ದು, ಇದರೊಂದಿಗೆ ಉಡಾವಣೆ ಮಾಡಲಾಗಿದ್ದ ಉಪಗ್ರಹ ಮತ್ತು ಇಡೀ ಮಿಷನ್ ಸಂಪೂರ್ಣವಾಗಿ ನಾಶವಾಗಿದೆ. ಈ ವೈಫಲ್ಯವು ಚೀನಾದ ಇತ್ತೀಚಿನ ಸರಣಿ ಯಶಸ್ಸಿನ ಬಾಹ್ಯಾಕಾಶ ಯೋಜನೆಗಳಿಗೆ ದೊಡ್ಡ ಆಘಾತ ನೀಡಿದೆ.
ಎರಡನೇ ವೈಫಲ್ಯ ಇದು
ಚೀನಾ ಅಕಾಡೆಮಿ ಆಫ್ ಲಾಂಚ್ ವೆಹಿಕಲ್ ಟೆಕ್ನಾಲಜಿ ಅಭಿವೃದ್ಧಿಪಡಿಸಿರುವ ಈ ‘ಲಾಂಗ್ ಮಾರ್ಚ್ 7ಎ’, ಮಧ್ಯಮದಿಂದ ಭಾರಿ ತೂಕದ ಉಪಗ್ರಹಗಳನ್ನು ಹೊತ್ತೊಯ್ಯುವ ಶಕ್ತಿಶಾಲಿ ರಾಕೆಟ್ ಆಗಿದೆ. ಮುಖ್ಯವಾಗಿ ಭೂಸ್ಥಿರ ಕಕ್ಷೆಗೆ (GTO) ಭಾರೀ ತೂಕದ ಉಪಗ್ರಹಗಳನ್ನು ತಲುಪಿಸಲು ಚೀನಾ ಇವುಗಳನ್ನು ಬಳಸುತ್ತದೆ. ದ್ರವ ಇಂಧನ ತಂತ್ರಜ್ಞಾನ ಹೊಂದಿರುವ ಈ ರಾಕೆಟ್ನ 18ನೇ ಉಡಾವಣೆ ಇದಾಗಿತ್ತು. ಇದುವರೆಗೆ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿದ್ದ ಈ ಸರಣಿಯ ರಾಕೆಟ್ಗಳಲ್ಲಿ ಸಂಭವಿಸಿದ ಕೇವಲ ಎರಡನೇ ವೈಫಲ್ಯ ಇದಾಗಿದ್ದು, ಒಟ್ಟಾರೆ ಇತಿಹಾಸದಲ್ಲಿ ಇದು ಉತ್ತಮ ಯಶಸ್ಸಿನ ಪ್ರಮಾಣವನ್ನೇ ಹೊಂದಿದೆ. ಸದ್ಯಕ್ಕೆ ಈ ಭೀಕರ ಸ್ಫೋಟಕ್ಕೆ ನಿಖರವಾದ ಕಾರಣವೇನೆಂಬುದು ತಿಳಿದುಬಂದಿಲ್ಲ. ರಾಕೆಟ್ನಿಂದ ಕೊನೆಯ ಕ್ಷಣದವರೆಗೆ ಲಭ್ಯವಾದ ತಾಂತ್ರಿಕ ದತ್ತಾಂಶಗಳನ್ನು (Telemetry) ವಿಜ್ಞಾನಿಗಳು ಸೂಕ್ಷ್ಮವಾಗಿ ಪರಿಶೀಲಿಸುತ್ತಿದ್ದು, ತನಿಖೆ ಆರಂಭಿಸಿದ್ದಾರೆ.
ಅತ್ಯಂತ ಸವಾಲಿನಿಂದ ಕೂಡಿದ್ದ ಉಡಾವಣೆ
ಸಾಮಾನ್ಯವಾಗಿ ರಾಕೆಟ್ ಉಡಾವಣೆಯಾದ ಆರಂಭಿಕ ಹಂತವು ಅತ್ಯಂತ ಸವಾಲಿನಿಂದ ಕೂಡಿರುತ್ತದೆ. ಈ ಸಮಯದಲ್ಲಿ ರಾಕೆಟ್ ವಾತಾವರಣದ ತೀವ್ರ ಒತ್ತಡ, ಭಾರಿ ಕಂಪನ ಮತ್ತು ಅತಿ ವೇಗದ ಗಾಳಿಯನ್ನು ಸೀಳಿಕೊಂಡು ಮುನ್ನುಗ್ಗಬೇಕಿರುತ್ತದೆ. ಇಂತಹ ಸೂಕ್ಷ್ಮ ಹಂತದಲ್ಲೇ ಚೀನಾದ ರಾಕೆಟ್ ದುರಂತಕ್ಕೀಡಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಚೀನಾ ತನ್ನ ರಾಕೆಟ್ ಉಡಾವಣೆಗಳ ವೇಗವನ್ನು ಗಣನೀಯವಾಗಿ ಹೆಚ್ಚಿಸಿದ್ದು, ಲಾಂಗ್ ಮಾರ್ಚ್ ಸರಣಿಯ ರಾಕೆಟ್ಗಳು ಅದಕ್ಕೆ ಬೆನ್ನೆಲುಬಾಗಿ ನಿಂತಿವೆ. ಈ ದುರಂತದಿಂದ ಚೀನಾದ ಒಟ್ಟಾರೆ ಬಾಹ್ಯಾಕಾಶ ಯೋಜನೆಗಳು ಸಂಪೂರ್ಣವಾಗಿ ನಿಲ್ಲದಿದ್ದರೂ, ಮುಂದಿನ ದಿನಗಳಲ್ಲಿ ಈ ಸರಣಿಯ ರಾಕೆಟ್ಗಳನ್ನು ಬಳಸುವ ಮುನ್ನ ವಿಜ್ಞಾನಿಗಳು ನೂರಕ್ಕೆ ನೂರರಷ್ಟು ಎಚ್ಚರಿಕೆ ವಹಿಸಬೇಕಾದ ಅನಿವಾರ್ಯತೆ ಎದುರಾಗಿದೆ. ಸುಧಾರಿತ ತಂತ್ರಜ್ಞಾನವಿದ್ದರೂ ಬಾಹ್ಯಾಕಾಶ ರಂಗದಲ್ಲಿ ಕ್ಷಣಾರ್ಧದ ತಪ್ಪು ಹೇಗೆ ಮಹಾ ದುರಂತಕ್ಕೆ ಕಾರಣವಾಗುತ್ತದೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿಯಾಗಿದೆ.
ಇದನ್ನೂ ಓದಿ: ಖಾಸಗಿ ಬಾಹ್ಯಾಕಾಶ ರಂಗದಲ್ಲಿ ಭಾರತದ ಇತಿಹಾಸ: ‘ವಿಕ್ರಮ್-1’ ಮೊದಲ ಯತ್ನದಲ್ಲೇ ಸೂಪರ್ ಸಕ್ಸಸ್
