ನವದೆಹಲಿ: ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಲೆಗ್ ಸ್ಪಿನ್ನರ್ ಅಮಿತ್ ಮಿಶ್ರಾ (Amit Mishra) ತಮ್ಮ ಅಂತರರಾಷ್ಟ್ರೀಯ ಕ್ರಿಕೆಟ್ ಜೀವನದ ಅಂತ್ಯದ ಕುರಿತು ಅತ್ಯಂತ ಕಹಿ ಸತ್ಯಗಳನ್ನು ಬಿಚ್ಚಿಟ್ಟಿದ್ದಾರೆ. 2017ರಲ್ಲಿ ಇಂಗ್ಲೆಂಡ್ ವಿರುದ್ಧ ಬೆಂಗಳೂರಿನಲ್ಲಿ ನಡೆದ ಟಿ20 ಪಂದ್ಯವೇ ಭಾರತ ತಂಡದ ಪರ ತಾವು ಆಡಿದ ಕೊನೆಯ ಪಂದ್ಯವಾಗುತ್ತದೆ ಎಂದು ತಾವೆಂದೂ ಭಾವಿಸಿರಲಿಲ್ಲ ಎಂದು ಮಿಶ್ರಾ ಹೇಳಿಕೊಂಡಿದ್ದಾರೆ. ಪಂದ್ಯದ ವೇಳೆ ಸಂಭವಿಸಿದ ಗಾಯದ ಬಳಿಕ ಆಗಿನ ನಾಯಕ ವಿರಾಟ್ ಕೊಹ್ಲಿ ಮತ್ತು ಮುಖ್ಯ ತರಬೇತುದಾರ ಅನಿಲ್ ಕುಂಬ್ಳೆ ತಮ್ಮನ್ನು ತಂಡಕ್ಕೆ ಮರಳಿ ಕರೆಸಿಕೊಳ್ಳುವ ಭರವಸೆ ನೀಡಿದ್ದರು. ಆದರೆ, ಸಂಪೂರ್ಣ ಚೇತರಿಸಿಕೊಂಡ ನಂತರ ವಿರಾಟ್ ಕೊಹ್ಲಿ ತಮ್ಮ ಕರೆಗಳನ್ನು ಸ್ವೀಕರಿಸಲಿಲ್ಲ ಹಾಗೂ ಸಂದೇಶಗಳಿಗೂ ಉತ್ತರಿಸಲಿಲ್ಲ ಎಂದು ಮಿಶ್ರಾ ಗಂಭೀರ ಆರೋಪ ಮಾಡಿದ್ದಾರೆ.
ಅಮಿತ್ ಮಿಶ್ರಾ ಹೇಳಿದ್ದೇನು?
ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ಅವರ ‘ಬೈಠ್ ಅಂಡ್ ಬೋಲ್’ ಪಾಡ್‌ಕಾಸ್ಟ್ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅಮಿತ್ ಮಿಶ್ರಾ, ಬೆಂಗಳೂರು ಪಂದ್ಯದ ಸಂದರ್ಭದಲ್ಲಿ ಕಾಲಿನ ಗಾಯಕ್ಕೆ ತುತ್ತಾಗಿದ್ದಾಗ ಅನಿಲ್ ಕುಂಬ್ಳೆ ಅವರು, “ನೀವು ಸಂಪೂರ್ಣ ಗುಣಮುಖರಾದ ತಕ್ಷಣ ಸಹಜವಾಗಿಯೇ ತಂಡಕ್ಕೆ ವಾಪಸ್ ಬರಲಿದ್ದೀರಿ, ಯಾವುದಕ್ಕೂ ಚಿಂತಿಸಬೇಡಿ” ಎಂದು ಭರವಸೆ ನೀಡಿದ್ದರು ಎಂದಿದ್ದಾರೆ. ಇದರ ಬೆನ್ನಲ್ಲೇ ತಂಡದ ನಾಯಕತ್ವ ವಹಿಸಿಕೊಂಡಿದ್ದ ವಿರಾಟ್ ಕೊಹ್ಲಿ ಅವರ ಬಳಿಯೂ ಈ ಬಗ್ಗೆ ಚರ್ಚಿಸಿದ್ದಾಗಿ ಮಿಶ್ರಾ ತಿಳಿಸಿದ್ದಾರೆ. ಆಗ ಕೊಹ್ಲಿ ಕೂಡ, “ಮಿಶ್ರಾ ಭಾಯ್, ನೀವು ಸಂಪೂರ್ಣ ಫಿಟ್ ಆಗಿ ಸಿದ್ಧರಾಗಿ, ನೀವು ತಂಡದಲ್ಲಿ ಇರಲಿದ್ದೀರಿ” ಎಂದು ಅಭಯ ನೀಡಿದ್ದರು ಎಂದು ಮಿಶ್ರಾ ನೆನಪಿಸಿಕೊಂಡಿದ್ದಾರೆ.
ಫೋನ್ ಕಟ್, ಮೆಸೇಜ್‌ಗೆ ಪ್ರತಿಕ್ರಿಯೆಯಿಲ್ಲ: ಕೊಹ್ಲಿ ವಿರುದ್ಧ ಮಿಶ್ರಾ ಬೇಸರ!
ಗಾಯದಿಂದ ಸಂಪೂರ್ಣ ಗುಣಮುಖರಾದ ನಂತರ ತಂಡಕ್ಕೆ ಮರಳುವ ಕುರಿತು ತಿಳಿಯಲು ಅಮಿತ್ ಮಿಶ್ರಾ ವಿರಾಟ್ ಕೊಹ್ಲಿ ಅವರಿಗೆ ಮೆಸೇಜ್ ಮಾಡಿದ್ದರು. ಆಗ ಕೊಹ್ಲಿ, “ಇನ್ನೊಂದು ವಾರ ಅಥವಾ ಹತ್ತು ದಿನಗಳಲ್ಲಿ ಪರಿಸ್ಥಿತಿಯನ್ನು ತಿಳಿಸುತ್ತೇನೆ” ಎಂದು ಹೇಳಿದ್ದರು. ಆದರೆ, ವಾರಗಳು ಕಳೆದರೂ ಕೊಹ್ಲಿ ಕಡೆಯಿಂದ ಯಾವುದೇ ಪ್ರತಿಕ್ರಿಯೆ ಬರಲಿಲ್ಲ. ನಂತರ ಮಿಶ್ರಾ ಹಲವು ಬಾರಿ ಫೋನ್ ಕರೆಗಳನ್ನು ಮಾಡಿದರೂ ಕೊಹ್ಲಿ ಕರೆಗಳನ್ನು ಸ್ವೀಕರಿಸಲಿಲ್ಲ, ಮೆಸೇಜ್‌ಗಳಿಗೂ ಉತ್ತರ ನೀಡಲಿಲ್ಲ. ಕೊನೆಗೆ ಕೊಹ್ಲಿ ತಮಗೆ ಉತ್ತರ ನೀಡಲು ಬಯಸುತ್ತಿಲ್ಲ ಎಂಬುದನ್ನು ಅರಿತು ತಾವು ಕೂಡ ಪ್ರಯತ್ನಿಸುವುದನ್ನೇ ಕೈಬಿಟ್ಟಿದ್ದಾಗಿ ಮಿಶ್ರಾ ಕಣ್ಣೀರಿಡದ ಕೊರಗಿನಲ್ಲಿ ಹೇಳಿಕೊಂಡಿದ್ದಾರೆ.
ತಮಗಿಂತ ಗಂಭೀರವಾಗಿ ಗಾಯಗೊಂಡು ದೀರ್ಘಕಾಲ ಕ್ರಿಕೆಟ್‌ನಿಂದ ದೂರವಿದ್ದ ಹಲವು ಆಟಗಾರರನ್ನು ಗುಣಮುಖರಾದ ತಕ್ಷಣವೇ ಯಾವುದೇ ಹಿಂಜರಿಕೆಯಿಲ್ಲದೆ ರಾಷ್ಟ್ರೀಯ ತಂಡಕ್ಕೆ ಮರಳಿ ಸೇರಿಸಿಕೊಳ್ಳಲಾಗಿತ್ತು. ಆದರೆ, ತಮ್ಮ ವಿಚಾರದಲ್ಲಿ ಮಾತ್ರ ಈ ನಿಯಮ ಅನ್ವಯವಾಗಲಿಲ್ಲ ಮತ್ತು ಇಂದಿನವರೆಗೂ ತಮಗೆ ಈ ಅನ್ಯಾಯಕ್ಕೆ ಉತ್ತರವೇ ಸಿಗಲಿಲ್ಲ ಎಂದು ಮಿಶ್ರಾ ತೀವ್ರ ನಿರಾಶೆ ವ್ಯಕ್ತಪಡಿಸಿದ್ದಾರೆ. 2017ರ ಆ ಒಂದು ಪಂದ್ಯವೇ ತಮ್ಮ ಕ್ರೀಡಾ ಬದುಕಿನ ಕೊನೆಯ ಪಂದ್ಯವಾಯಿತು ಎಂಬ ಬೇಸರ ಇಂದಿಗೂ ಅವರನ್ನು ಕಾಡುತ್ತಿದೆ.
