ಬೆಂಗಳೂರು: ತೂಕ ಇಳಿಸಿಕೊಳ್ಳುವುದು ತಿಂಗಳುಗಳ ಕಾಲ ಪಟ್ಟ ಶ್ರಮದ ಫಲವಾದರೆ, ಇಳಿಸಿಕೊಂಡ ತೂಕವನ್ನು ಅದೇ ಮಟ್ಟದಲ್ಲಿ ಕಾಯ್ದುಕೊಳ್ಳುವುದು ಅದಕ್ಕಿಂತಲೂ ದೊಡ್ಡ (Weight Loss) ಸವಾಲಾಗುತ್ತದೆ. ದೇಹದ ತೂಕ ಕಡಿಮೆಯಾಗುತ್ತಿದ್ದಂತೆ ಹಸಿವು ಹೆಚ್ಚಾಗುವುದು, ಶಕ್ತಿಯ ಮಟ್ಟದಲ್ಲಿ ಬದಲಾವಣೆಯಾಗುವುದು ಹಾಗೂ ದೇಹವು ಕಡಿಮೆ ಕ್ಯಾಲೊರಿಗಳನ್ನು ಬಳಸಲು ಪ್ರಾರಂಭಿಸುವುದು ಇದಕ್ಕೆ ಮುಖ್ಯ ಕಾರಣವಾಗಿದೆ. ತಮ್ಮ ಹಳೆಯ ಆಹಾರ ಪದ್ಧತಿ ಹಾಗೂ ವ್ಯಾಯಾಮದ ದಿನಚರಿಯನ್ನು ಮುಂದುವರಿಸಿದರೂ ಸಹ, ಹಲವರು ಮತ್ತೆ ತೂಕವನ್ನು ಪಡೆದುಕೊಳ್ಳುವ ಸ್ಥಿತಿ ನಿರ್ಮಾಣವಾಗುತ್ತದೆ.
ನಾವು ತೂಕವನ್ನು ಕಳೆದುಕೊಂಡಾಗ ನಮ್ಮ ದೇಹದ ಹಾರ್ಮೋನು ವ್ಯವಸ್ಥೆ, ಹಸಿವಿನ ಮಟ್ಟ ಹಾಗೂ ಚಯಾಪಚಯ ಕ್ರಿಯೆ (ಮ್ಯಾಟಬಾಲಿಸಂ) ಸಂಪೂರ್ಣವಾಗಿ ಬದಲಾಗುತ್ತದೆ. ಆಹಾರದ ಅಭಾವವಿದ್ದಾಗ ಶಕ್ತಿಯನ್ನು ಕಾಯ್ದುಕೊಳ್ಳಲು ಮಾನವ ದೇಹವು ವಿಕಸನಗೊಂಡಿರುವ ಶಾರೀರಿಕ ವ್ಯವಸ್ಥೆಯೇ ಇದಕ್ಕೆ ಕಾರಣ. ತೂಕ ಕಡಿಮೆಯಾದ ತಕ್ಷಣ, ಕಳೆದುಕೊಂಡ ಶಕ್ತಿಯನ್ನು ಮತ್ತೆ ತುಂಬಿಕೊಳ್ಳಲು ಮೆದುಳು ಮತ್ತು ಹಾರ್ಮೋನು ವ್ಯವಸ್ಥೆಗಳು ಜಾಗೃತಗೊಂಡು ನಿರಂತರವಾಗಿ ಹಸಿವನ್ನು ಹೆಚ್ಚಿಸುತ್ತವೆ. ಕೊಬ್ಬಿನ ಕೋಶಗಳಿಂದ ಸ್ರವಿಸುವ ‘ಲೆಪ್ಟಿನ್’ ಹಾರ್ಮೋನ್ ಮಟ್ಟ ಕಡಿಮೆಯಾಗುವುದರಿಂದ ಹಸಿವು ಹೆಚ್ಚಾಗುತ್ತದೆ ಮತ್ತು ಶಕ್ತಿ ವ್ಯಯವಾಗುವುದು ಕಡಿಮೆಯಾಗುತ್ತದೆ. ಇದರ ಜೊತೆಗೆ ‘ಗ್ರೆಲಿನ್’ ಎಂಬ ಹಸಿವನ್ನು ಪ್ರಚೋದಿಸುವ ಹಾರ್ಮೋನ್ ಹೆಚ್ಚಾಗಿ, ಊಟ ಮಾಡಿದ ನಂತರವೂ ಹೊಟ್ಟೆ ತುಂಬಿದ ಅನುಭವವಾಗುವುದಿಲ್ಲ. ಸಣ್ಣ ಶರೀರಕ್ಕೆ ಕಡಿಮೆ ಕ್ಯಾಲೊರಿಗಳು ಸಾಕಿರುವುದರಿಂದ ದೇಹವು ಇಂಧನ ಬಳಕೆಯಲ್ಲಿ ಹೆಚ್ಚು ಪರಿಣಾಮಕಾರಿಯಾಗುತ್ತದೆ, ಇದನ್ನು ‘ಅಡಾಪ್ಟಿವ್ ಥರ್ಮೋಜೆನೆಸಿಸ್’ ಎಂದು ಕರೆಯಲಾಗುತ್ತದೆ.
ಕಠಿಣ ಪಥ್ಯದ ಅಪಾಯ ಮತ್ತು ದೀರ್ಘಕಾಲೀನ ತೂಕ ನಿರ್ವಹಣೆಗೆ ಸರಿಯಾದ ಮಾರ್ಗ!
ಅತಿಯಾದ ಕ್ಯಾಲೊರಿ ಕಡಿತ, ಸುದೀರ್ಘ ಉಪವಾಸ ಹಾಗೂ ಕೆಲವು ನಿಗದಿತ ಆಹಾರ ಗುಂಪುಗಳನ್ನು ಸಂಪೂರ್ಣವಾಗಿ ತ್ಯಜಿಸುವ ಕಠಿಣ ಪಥ್ಯಗಳು ಜನರನ್ನು ಇನ್ನಷ್ಟು ದಣಿಯುವಂತೆ ಮತ್ತು ಹಸಿಯುವಂತೆ ಮಾಡುತ್ತವೆ. ಶಕ್ತಿಯ ಮಟ್ಟ ಕುಸಿದಂತೆ ದಿನನಿತ್ಯದ ಚಟುವಟಿಕೆಗಳು ಕಡಿಮೆಯಾಗಿ ಕ್ಯಾಲೊರಿ ದಹನ ಕುಂಠಿತಗೊಳ್ಳುತ್ತದೆ. ಸೂಕ್ತ ಪ್ರೋಟೀನ್ ಮತ್ತು ವೇಟ್ ಲಿಫ್ಟಿಂಗ್ ವ್ಯಾಯಾಮಗಳಿಲ್ಲದೆ ಮಾಡುವ ಪಥ್ಯದಿಂದ ಕೊಬ್ಬಿನ ಜೊತೆಗೆ ಸ್ನಾಯುಗಳ ಪ್ರಮಾಣವೂ (ಮಸಲ್ ಮಾಸ್) ಕಡಿಮೆಯಾಗಿ ಶಕ್ತಿ ಕುಗ್ಗುತ್ತದೆ. ದಕ್ಷಿಣ ಏಷ್ಯಾದ ಜನಸಂಖ್ಯೆಯಲ್ಲಿ ಕಡಿಮೆ ಬಿಎಂಐ (BMI) ಹಂತದಲ್ಲೇ ಮಧುಮೇಹ, ಕೊಬ್ಬಿನ ಪಿತ್ತಜನಕಾಂಗ ಮತ್ತು ರಕ್ತದೊತ್ತಡದಂತಹ ಚಯಾಪಚಯ ಸಮಸ್ಯೆಗಳು ಕಾಣಿಸಿಕೊಳ್ಳುವುದರಿಂದ, ಕೇವಲ ದೇಹದ ತೂಕವಲ್ಲದೆ ಸೊಂಟದ ಸುತ್ತಳತೆ ಹಾಗೂ ರಕ್ತದ ತಪಾಸಣೆಗಳನ್ನು ಮಾಡಿಸಿಕೊಳ್ಳುವುದು ಅತ್ಯಗತ್ಯ.
ದೀರ್ಘಕಾಲೀನ ತೂಕ ನಿರ್ವಹಣೆಗೆ ನಿಧಾನವಾಗಿ ಕೊಬ್ಬನ್ನು ಕರಗಿಸುವ ಮತ್ತು ಸ್ನಾಯುಗಳನ್ನು ಕಾಯ್ದುಕೊಳ್ಳುವ ಸುಸ್ಥಿರ ಆಹಾರ ಪದ್ಧತಿ ಅಗತ್ಯ. ಪ್ರತಿರೋಧಕ ವ್ಯಾಯಾಮಗಳು (ವೈಟ್‌ ಟ್ರೈನಿಂಗ್), ವಾಕಿಂಗ್, ಸೈಕ್ಲಿಂಗ್, ಈಜು ಹಾಗೂ ಪ್ರೋಟೀನ್ ಭರಿತ ಆಹಾರವು ಸ್ನಾಯುಗಳನ್ನು ರಕ್ಷಿಸಿ ಇನ್ಸುಲಿನ್ ಸೂಕ್ಷ್ಮತೆಯನ್ನು ಹೆಚ್ಚಿಸುತ್ತದೆ. ಸೂಕ್ತ ನಿದ್ರೆ ಮತ್ತು ಮಾನಸಿಕ ಒತ್ತಡ ನಿರ್ವಹಣೆ ಕೂಡ ಹಸಿವನ್ನು ನಿಯಂತ್ರಿಸಲು ನೆರವಾಗುತ್ತವೆ. ತೀವ್ರ ಸ್ಥೂಲಕಾಯತೆ ಹಾಗೂ ಮಧುಮೇಹ, ನಿದ್ರಾಹೀನತೆಯಂತಹ ಕಾಯಿಲೆಗಳಿರುವ ವ್ಯಕ್ತಿಗಳಿಗೆ ವೈದ್ಯಕೀಯ ಸಲಹೆಯಂತೆ ಬ್ಯಾಟರಿಯಾಟ್ರಿಕ್ ಶಸ್ತ್ರಚಿಕಿತ್ಸೆ ಅಥವಾ ಆಧುನಿಕ ರೋಬೋಟಿಕ್ ಸರ್ಜರಿಗಳು ಪರಿಣಾಮಕಾರಿ ಪರಿಹಾರ ನೀಡಬಲ್ಲವು. ತೂಕ ನಿರ್ವಹಣೆಯು ನಿರಂತರ ಆರೋಗ್ಯ ಆರೈಕೆಯಾಗಿದ್ದು, ಜೀವನಶೈಲಿ ಬದಲಾವಣೆ, ವೈದ್ಯಕೀಯ ಚಿಕಿತ್ಸೆ ಮತ್ತು ಸೂಕ್ತ ಮಾರ್ಗದರ್ಶನದ ಮೂಲಕ ಮಾತ್ರ ಇದನ್ನು ಸಾಧಿಸಲು ಸಾಧ್ಯ.
ಇದನ್ನೂ ಓದಿ: ಹದಿಹರೆಯದವರಲ್ಲಿ ಹೆಚ್ಚುತ್ತಿದೆ ಅನಿಯಮಿತ ಮುಟ್ಟಿನ ಸಮಸ್ಯೆ: ಏಮ್ಸ್ ಸಮೀಕ್ಷೆಯಲ್ಲಿ ಆಘಾತಕಾರಿ ಮಾಹಿತಿ!
