ಟೆಹರಾನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಅವರ ವಿಶಿಷ್ಟ ರಾಜತಾಂತ್ರಿಕ ಶೈಲಿ ಮತ್ತು ಮನಸ್ಥಿತಿಯನ್ನು ಎದುರಿಸಲು ಇರಾನ್ ಸರ್ಕಾರ ಅತ್ಯಂತ ರೋಚಕ ಕಾರ್ಯತಂತ್ರವೊಂದನ್ನು ಹೆಣೆದಿದೆ. ವಾಷಿಂಗ್ಟನ್ ಹಾಗೂ ಟೆಹರಾನ್ ನಡುವೆ ನಡೆಯುತ್ತಿರುವ ಪರೋಕ್ಷ ಸಂಧಾನ ಮಾತುಕತೆಗಳಲ್ಲಿ ಮೇಲುಗೈ ಸಾಧಿಸಲು ಇರಾನ್ ತನ್ನ ಉನ್ನತ ಮಟ್ಟದ ರಾಜತಾಂತ್ರಿಕ ಸಲಹಾ ಸಮಿತಿಗೆ ಇಬ್ಬರು ಹಿರಿಯ ಮನಶ್ಶಾಸ್ತ್ರಜ್ಞರನ್ನು (Psychologists) ನೇಮಿಸಿಕೊಂಡಿದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮವೊಂದು ವರದಿ ಮಾಡಿದೆ. ‘ಡ್ರಾಪ್ ಸೈಟ್’ ಪ್ರಕಟಿಸಿರುವ ವರದಿಯ ಪ್ರಕಾರ, ಕಳೆದ ಏಪ್ರಿಲ್ ತಿಂಗಳಿನಲ್ಲಿ ಇಸ್ಲಾಮಾಬಾದ್ನಲ್ಲಿ ನಡೆದ ಉಭಯ ದೇಶಗಳ ಮೊದಲ ಸುತ್ತಿನ ಮಾತುಕತೆಯ ಬೆನ್ನಲ್ಲೇ ಇರಾನ್ ಈ ವಿಭಿನ್ನ ನಿರ್ಧಾರ ಕೈಗೊಂಡಿತ್ತು.
ಮನೋವಿಜ್ಞಾನಿಗಳ ಪ್ರಮುಖ ಜವಾಬ್ದಾರಿ ಏನು?
ಅಮೆರಿಕ ಅಧ್ಯಕ್ಷರ ನಿಗೂಢ ನಡವಳಿಕೆಯನ್ನು ಸೂಕ್ಷ್ಮವಾಗಿ ಅಧ್ಯಯನ ಮಾಡುವುದು ಹಾಗೂ ಪ್ರಾದೇಶಿಕ ಮಧ್ಯಸ್ಥಗಾರರ ಮುಖಾಂತರ ಟ್ರಂಪ್ ಅವರಿಗೆ ತಲುಪಿಸುವ ಲಿಖಿತ ಸಂದೇಶಗಳನ್ನು ಹೆಚ್ಚು ಆಕರ್ಷಕವಾಗಿ ರೂಪಿಸುವುದು ಈ ಮನೋವಿಜ್ಞಾನಿಗಳ ಪ್ರಮುಖ ಜವಾಬ್ದಾರಿಯಾಗಿತ್ತು. ಈ ಕುರಿತು ಮಾಹಿತಿ ನೀಡಿರುವ ಇರಾನ್ನ ಉನ್ನತ ರಾಜತಾಂತ್ರಿಕ ಅಧಿಕಾರಿಯೊಬ್ಬರು, “ಅಧ್ಯಕ್ಷ ಟ್ರಂಪ್ ಅವರಲ್ಲಿ ನಾವು ಕಂಡುಕೊಂಡಿರುವ ‘ಸೈಕೋಪಥಿಕ್’ (ವಿಕೃತ) ನಡವಳಿಕೆಯ ಶೈಲಿಯನ್ನು ಅತ್ಯಂತ ಚಾಣಾಕ್ಷತನದಿಂದ ನಿಭಾಯಿಸುವ ಸಲುವಾಗಿ ಇಬ್ಬರು ಹಿರಿಯ ಮನಶ್ಶಾಸ್ತ್ರಜ್ಞರನ್ನು ನಮ್ಮ ಆಂತರಿಕ ಸಮಾಲೋಚನಾ ತಂಡಕ್ಕೆ ಸೇರಿಸಿಕೊಂಡಿದ್ದೆವು. ಟ್ರಂಪ್ ಅವರ ಮನಸ್ಸನ್ನು ಓದಿ ಅದಕ್ಕೆ ತಕ್ಕಂತೆ ಸಂದೇಶಗಳನ್ನು ಸಿದ್ಧಪಡಿಸುವುದು ನಮ್ಮ ಉದ್ದೇಶವಾಗಿತ್ತು” ಎಂದು ಒಪ್ಪಿಕೊಂಡಿದ್ದಾರೆ.
ಮ್ಯಾಜಿಕ್ ಮಾಡಿದ ಇರಾನ್ ತಂತ್ರ
ವಿಶೇಷವೆಂದರೆ ಇರಾನ್ ಹೂಡಿದ ಈ ಜಾಲವು ಅಮೆರಿಕದೊಂದಿಗಿನ ಮಾತುಕತೆಯಲ್ಲಿ ಭಾರಿ ಮ್ಯಾಜಿಕ್ ಮಾಡಿದೆ. ಮನಶ್ಶಾಸ್ತ್ರಜ್ಞರ ಶಿಫಾರಸುಗಳನ್ನು ಇರಾನ್ ತನ್ನ ಲಿಖಿತ ಸಂವಹನ ಹಾಗೂ ಒಟ್ಟಾರೆ ರಾಜತಾಂತ್ರಿಕ ತಂತ್ರಗಾರಿಕೆಯಲ್ಲಿ ಅಳವಡಿಸಿಕೊಂಡ ನಂತರ, ಅಮೆರಿಕ ಅಧ್ಯಕ್ಷ ಟ್ರಂಪ್ ಕಡೆಯಿಂದ ಮೂಡಿಬಂದ ಪ್ರತಿಕ್ರಿಯೆಗಳು ಹೆಚ್ಚು ಸಕಾರಾತ್ಮಕ ಹಾಗೂ ಶಾಂತಿಯುತವಾಗಿದ್ದವು ಎಂದು ಇರಾನ್ ಅಧಿಕಾರಿ ಬಹಿರಂಗಪಡಿಸಿದ್ದಾರೆ. ಅಷ್ಟೇ ಅಲ್ಲದೆ, ಭವಿಷ್ಯದಲ್ಲಿ ಈ ಎಲ್ಲಾ ರಹಸ್ಯ ಪತ್ರ ವ್ಯವಹಾರಗಳು ಸಾರ್ವಜನಿಕವಾಗಿ ಇತಿಹಾಸದ ಪುಟ ಸೇರಲಿವೆ ಎಂಬ ಅರಿವು ಇರಾನ್ಗೆ ಇತ್ತು. ಹಾಗಾಗಿಯೇ ಮುಂದಿನ ದಿನಗಳಲ್ಲಿ ಈ ದಾಖಲೆಗಳು ಜಗತ್ತಿನ ಮುಂದೆ ತೆರೆದುಕೊಂಡರೆ, ಇರಾನ್ನ ರಾಜತಾಂತ್ರಿಕ ತಂತ್ರಜ್ಞಾನ ಎಷ್ಟೊಂದು ಪ್ರಬುದ್ಧ ಮತ್ತು ತೂಕದ ನಡವಳಿಕೆಯಿಂದ ಕೂಡಿತ್ತು ಎನ್ನುವುದು ಇಡೀ ವಿಶ್ವಕ್ಕೆ ಸಾಬೀತಾಗಬೇಕು ಎಂಬ ನಿಟ್ಟಿನಲ್ಲೇ ಮಾತುಕತೆಗಳನ್ನು ನಡೆಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಅಮೆರಿಕದ ಒಳಗೆ ಅಧ್ಯಕ್ಷ ಟ್ರಂಪ್ ಅವರ ಆರೋಗ್ಯ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯದ ಕುರಿತು ಭಾರಿ ಚರ್ಚೆಗಳು ನಡೆಯುತ್ತಿರುವ ಬೆನ್ನಲ್ಲೇ ಈ ಕುತೂಹಲಕಾರಿ ವರದಿ ಹೊರಬಿದ್ದಿದೆ. ಪ್ರಸ್ತುತ ಉಭಯ ದೇಶಗಳ ನಡುವಿನ ಭೀಕರ ವೈಷಮ್ಯ ಮತ್ತು ಯುದ್ಧದ ವಾತಾವರಣವನ್ನು ಕೊನೆಗೊಳಿಸುವ ನಿಟ್ಟಿನಲ್ಲಿ ಇರಾನ್ ಮತ್ತು ಅಮೆರಿಕ ಮಹತ್ವದ ತಾತ್ಕಾಲಿಕ ಒಪ್ಪಂದಕ್ಕೆ (MoU) ಸಹಿ ಹಾಕಿವೆ. ಜೂನ್ 19 ರಂದು ಜಿನೇವಾದಲ್ಲಿ ಈ ಐತಿಹಾಸಿಕ ಶಾಂತಿ ಒಪ್ಪಂದಕ್ಕೆ ಅಧಿಕೃತ ಮುದ್ರೆ ಬೀಳಲಿದ್ದು, ಈ ಯಶಸ್ಸಿನ ಹಿಂದೆ ಇರಾನ್ ನಡೆಸಿದ ವಿಭಿನ್ನ ಮನೋವೈಜ್ಞಾನಿಕ ರಾಜತಾಂತ್ರಿಕತೆಯೇ ಪ್ರಮುಖ ಪಾತ್ರ ವಹಿಸಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ: ಅನ್ನದಾತನ ಮನವಿಗೆ ಸ್ಪಂದಿಸಿದ ವಿಜಯ್ ಸರ್ಕಾರ: 75 ಸಾವಿರಕ್ಕೂ ಮೀರಿದ ಸಾಲಕ್ಕೆ ₹35,000 ವಿನಾಯಿತಿ!
