ಬೆಂಗಳೂರು: ಬರಗಾಲ ಮತ್ತು ಬೆಲೆ ಏರಿಕೆಯಿಂದ ಈಗಾಗಲೇ ತತ್ತರಿಸಿರುವ ರಾಜ್ಯದ ಸಾರ್ವಜನಿಕರಿಗೆ ಕರ್ನಾಟಕ ಸರ್ಕಾರ ಹಾಗೂ ಕೆಎಂಎಫ್ (KMF) ಬಿಗ್ ಶಾಕ್ ನೀಡಿವೆ. ನಾಳೆಯಿಂದ ಜಾರಿಗೆ ಬರುವಂತೆ ರಾಜ್ಯದಲ್ಲಿ ನಂದಿನಿ ಹಾಲಿನ ಬೆಲೆಯನ್ನು ಲೀಟರ್‌ಗೆ ೮ ರೂಪಾಯಿವರೆಗೆ ಏರಿಕೆ ಮಾಡಲು ನಿರ್ಧರಿಸಲಾಗಿದೆ. ರೈತರಿಗೆ ನೆರವಾಗುವ ನೆಪದಲ್ಲಿ ಗ್ರಾಹಕರ ಜೇಬಿಗೆ ಕತ್ತರಿ ಹಾಕಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದ್ದು, ರಾಜ್ಯ ಸರ್ಕಾರದ ಈ ನಿರ್ಧಾರದ ವಿರುದ್ಧ ಜನಸಾಮಾನ್ಯರಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದ ದಿನದಿಂದ ಇಲ್ಲಿಯವರೆಗೆ ಲೀಟರ್ ಹಾಲಿನ ದರ ಬರೋಬ್ಬರಿ ೧೭ ರೂಪಾಯಿ ಏರಿಕೆಯಾಗಿದ್ದು, ಗ್ರಾಹಕರ ಮೇಲೆ ಭಾರಿ ಹೊರೆ ಬಿದ್ದಿದೆ.
ಬ್ಲೂ ಪಾಕೆಟ್‌ಗೆ ಮಾತ್ರವಲ್ಲ; ಶುಭಂ ಹಾಲು ಮತ್ತು (KMF) ಮೊಸರಿನ ದರದಲ್ಲೂ ಭಾರಿ ಏರಿಕೆ!
ಸರ್ಕಾರದ ಪ್ರಕಾರ ೮ ರೂಪಾಯಿ ಏರಿಕೆಯಾಗಿರುವುದು ಕೇವಲ ನಂದಿನಿ ಬ್ಲೂ ಪಾಕೆಟ್ ಹಾಲಿನ ಲೀಟರ್‌ಗೆ ಮಾತ್ರ. ಆದರೆ, ಮಾರುಕಟ್ಟೆಯಲ್ಲಿ ಹೆಚ್ಚು ಬಳಕೆಯಾಗುವ ಸ್ಪೆಷಲ್ ಟೋನ್ಡ್ ಮಿಲ್ಕ್, ಶುಭಂ ಹಾಲು ಹಾಗೂ ಹೋಮೋಜೆನೈಸ್ಡ್ ಶುಭಂ ಹಾಲಿನ ದರ ಲೀಟರ್‌ಗೆ ಬರೋಬ್ಬರಿ ೧೨ ರೂಪಾಯಿ ಹೆಚ್ಚಳವಾಗಿದೆ.
- ಮೊಸರಿನ ದರ ಏರಿಕೆ: ೧ ಕೆಜಿ ಮೊಸರಿನ ಪ್ಯಾಕೆಟ್ ಬೆಲೆಯಲ್ಲಿ ೧೪ ರೂಪಾಯಿ ಹಾಗೂ ಅರ್ಧ ಲೀಟರ್ ಮೊಸರಿನ ಮೇಲೆ ೬ ರೂಪಾಯಿ ಏರಿಕೆ ಮಾಡಲಾಗಿದೆ.
ಹಾಲಿನ ದರ ಏರಿಕೆಯ ಪೈಕಿ ೭ ರೂಪಾಯಿ ರೈತರ ಖಾತೆಗೆ ತಲುಪುತ್ತದೆ ಎಂದು ಸರ್ಕಾರ ಹೇಳಿಕೊಳ್ಳುತ್ತಿದೆಯಾದರೂ, ಉಳಿದ ಹೆಚ್ಚುವರಿ ೫ ರೂಪಾಯಿ ಹಾಗೂ ಮೊಸರಿನಿಂದ ಬರುವ ಸಂಪೂರ್ಣ ಆದಾಯ ಕೆಎಂಎಫ್ ಪಾಲಾಗಲಿದೆ. ಇದು ಸಂಸ್ಥೆಯ ಆಡಳಿತಾತ್ಮಕ ವೆಚ್ಚ ಮತ್ತು ನಷ್ಟ ಸರಿದೂಗಿಸಲು ಬಡಜನರ ಜೇಬಿಗೆ ಕೈಹಾಕುತ್ತಿರುವ ನಿದರ್ಶನ ಎಂದು ಸಾರ್ವಜನಿಕರು ಆಪಾದಿಸುತ್ತಿದ್ದಾರೆ.
ನೆರೆಯ ತಮಿಳುನಾಡಿನ ‘ಆವಿನ್’ ಮಾದರಿ ಕರ್ನಾಟಕಕ್ಕೆ ಏಕಿಲ್ಲ?
ಗುಜರಾತ್ ಹಾಗೂ ರಾಜಸ್ಥಾನದಂತಹ ರಾಜ್ಯಗಳಲ್ಲಿ ಹಾಲಿನ ದರ ಹೆಚ್ಚಿದೆ ಎಂದು ಉದಾಹರಣೆ ನೀಡುವ ಕೆಎಂಎಫ್ ಮತ್ತು ರಾಜ್ಯ ಸರ್ಕಾರ, ನೆರೆಯ ತಮಿಳುನಾಡಿನ ಉದಾಹರಣೆಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸುತ್ತಿದೆ. ತಮಿಳುನಾಡು ಸಹಕಾರ ಹಾಲು ಉತ್ಪಾದಕರ ಒಕ್ಕೂಟದ ‘ಆವಿನ್’ (Aavin) ಬ್ರ್ಯಾಂಡ್ ಹಾಲು ಪ್ರಸ್ತುತ ಅರ್ಧ ಲೀಟರ್ ಟೋನ್ಡ್ ಹಾಲನ್ನು ಕೇವಲ ೨೦ ರೂಪಾಯಿಗೆ ಹಾಗೂ ಲೀಟರ್‌ಗೆ ೪೦ ರೂಪಾಯಿಗೆ ಮಾರಾಟ ಮಾಡುತ್ತಿದೆ. ಗ್ರೀನ್ ಮ್ಯಾಜಿಕ್ ಹಾಲು ಅರ್ಧ ಲೀಟರ್‌ಗೆ ೨೨ ರೂಪಾಯಿ ಹಾಗೂ ಫುಲ್ ಕ್ರೀಮ್ ಹಾಲು ಅರ್ಧ ಲೀಟರ್‌ಗೆ ೩೦ ರೂಪಾಯಿ ಬೆಲೆ ಹೊಂದಿದೆ.
ಹಾಲು ಖರೀದಿ ದರ ಹೆಚ್ಚಿದ್ದರೂ ಗ್ರಾಹಕರಿಗೆ (KMF) ರಕ್ಷಣೆ ನೀಡಿದ ತಮಿಳುನಾಡು
ತಮಿಳುನಾಡು ಸರ್ಕಾರ ಹಾಲು ಉತ್ಪಾದಕರಿಗೆ ಕಡಿಮೆ ಬೆಲೆ ನೀಡುತ್ತಿಲ್ಲ. ಹಸುವಿನ ಹಾಲಿಗೆ ಲೀಟರ್‌ಗೆ ೪೪ ರೂಪಾಯಿ ಹಾಗೂ ಎಮ್ಮೆ ಹಾಲಿಗೆ ೫೩ ರೂಪಾಯಿ ನೀಡುವ ಮೂಲಕ ರೈತರ ಹಿತ ಕಾಯುತ್ತಿದೆ. ಅಂದರೆ, ರೈತರಿಂದ ಖರೀದಿ ಮಾಡುವ ದರಕ್ಕಿಂತಲೂ ಕಡಿಮೆ ದರದಲ್ಲಿ ಗ್ರಾಹಕರಿಗೆ ಹಾಲನ್ನು ಪೂರೈಸುತ್ತಿದೆ.
- ಸವಾಲುಗಳಿದ್ದರೂ ಸರ್ಕಾರದ ಬೆಂಬಲ: ತಮಿಳುನಾಡಿನಲ್ಲೂ ಮಳೆ ಅಭಾವ, ಕಾವೇರಿ ನೀರಿನ ಕೊರತೆ, ಪಶು ಮೇವಿನ ದರ ಏರಿಕೆ, ಸಾರಿಗೆ ವೆಚ್ಚ ಹಾಗೂ ಟೋಲ್ ದರ ಹೆಚ್ಚಳದಂತಹ ಸವಾಲುಗಳಿವೆ. ಸಾಲದ ಹೊರೆ ಕರ್ನಾಟಕಕ್ಕಿಂತ ಹೆಚ್ಚಿದ್ದರೂ, ದಿನನಿತ್ಯದ ಅಗತ್ಯ ವಸ್ತುವಾದ ಹಾಲಿನ ದರವನ್ನು ಗ್ರಾಹಕರಿಗೆ ಹೊರೆಯಾಗದಂತೆ ತಮಿಳುನಾಡು ಸರ್ಕಾರವೇ ಆ ಹೊರೆಯನ್ನು ಹೊತ್ತುಕೊಂಡಿದೆ.
‘ಆವಿನ್’ ಲಾಭಾಂಶ ನಿರ್ವಹಣೆ ಹೇಗೆ? ಕೆಎಂಎಫ್‌ಗೆ ಪಾಠವೇನು?
ತಮಿಳುನಾಡಿನ ಸರ್ಕಾರಿ ಸ್ವಾಮ್ಯದ ‘ಆವಿನ್’ ಸಂಸ್ಥೆಯು ಹಾಲಿನ ಮಾರಾಟದಿಂದಾಗುವ ಅಂತರವನ್ನು ಭರಿಸಲು ಪ್ರಮುಖ ತಂತ್ರಗಳನ್ನು ಬಳಸುತ್ತದೆ:
- ಉಪ ಉತ್ಪನ್ನಗಳ ಮಾರಾಟ: ಶೇಕಡಾ ೧೦೦ ರಷ್ಟು ಲಾಭಾಂಶ ನೀಡುವ ತುಪ್ಪ, ಬೆಣ್ಣೆ, ಐಸ್‌ಕ್ರೀಮ್, ಸಿಹಿತಿಂಡಿಗಳಂತಹ ಉಪ ಉತ್ಪನ್ನಗಳ (Sub-products) ಮಾರಾಟದಿಂದ ಬರುವ ಆದಾಯವನ್ನು ಹಾಲಿನ ಸಬ್ಸಿಡಿಯಾಗಿ ಬಳಸುತ್ತದೆ.
- ಹಾಲಿನ ಸಮೃದ್ಧ ರಾಜ್ಯ ಕರ್ನಾಟಕ: ರಾಜಸ್ಥಾನದಂತೆ ಕರ್ನಾಟಕ ಹಾಲಿನ ಅಭಾವವಿರುವ ರಾಜ್ಯವಲ್ಲ. ರಾಜಸ್ಥಾನವು ಹೊರರಾಜ್ಯಗಳಿಂದ ಹಾಲು ಖರೀದಿಸುವುದರಿಂದ ಅಲ್ಲಿ ದರ ಹೆಚ್ಚಿರುವುದು ಸಹಜ. ಆದರೆ ಕರ್ನಾಟಕ ಹಾಲಿನ ಉತ್ಪಾದನೆಯಲ್ಲಿ ಸಮೃದ್ಧವಾಗಿದ್ದರೂ, ಕೆಎಂಎಫ್‌ನ ವೆಚ್ಚಗಳನ್ನು ಸರಿದೂಗಿಸಲು ದರ ಏರಿಕೆ ಮಾಡುತ್ತಿರುವುದು ದುರದೃಷ್ಟಕರ.
ಇದನ್ನೂ ಓದಿ: ಸಿದ್ದರಾಮಯ್ಯಗೆ ಅಂದೇ ಗೌರವ ಕೊಟ್ಟಿದ್ದರೆ ಜೆಡಿಎಸ್ ಈ ಸ್ಥಿತಿಗೆ ತಲುಪುತ್ತಿರಲಿಲ್ಲ: ಬಾಲಕೃಷ್ಣ ವಾಗ್ದಾಳಿ
