ಬೆಂಗಳೂರು: ಸ್ಯಾಂಡಲ್‌ವುಡ್ ನಟಿ ಮೇಘನಾ ರಾಜ್ ಸರ್ಜಾ (Meghana Raj) ಅವರಿಗೆ ಅಕ್ಟೋಬರ್ ತಿಂಗಳು ಎಂದರೆ ಯಾವಾಗಲೂ ಅತ್ಯಂತ ಭಾವನಾತ್ಮಕ ಹಾಗೂ ವಿಶೇಷವಾದದ್ದು. ದಿವಂಗತ ಪತಿ, ನಟ ಚಿరంಜೀವಿ ಸರ್ಜಾ ಹಾಗೂ ಪ್ರೀತಿಯ ಮಗ ರಾಯನ್ ರಾಜ್ ಸರ್ಜಾ ಇಬ್ಬರ ಜನ್ಮದಿನಗಳೂ ಇದೇ ತಿಂಗಳಿನಲ್ಲಿ ಬರುವುದರಿಂದ ಮೇಘನಾ ಅವರಿಗೆ ಈ ಸಮಯವು ಸದಾ ನೆನಪುಗಳ ಬೊಗಸೆಯಾಗಿರುತ್ತದೆ. ಆದರೆ, ಈ ಬಾರಿಯ ಅಕ್ಟೋಬರ್ ತಿಂಗಳು ಮೇಘನಾ ಅವರ ಜೀವನದಲ್ಲಿ ಮತ್ತಷ್ಟು ಅವಿಸ್ಮರಣೀಯ ಹಾಗೂ ಹೆಮ್ಮೆಯ ಕ್ಷಣವೊಂದನ್ನು ಹೊತ್ತು ತಂದಿದೆ. ಭಾರತೀಯ ಚಿತ್ರರಂಗದ ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ಬಹುನಿರೀಕ್ಷಿತ ‘ಜೈಲರ್ 2’ ಸಿನಿಮಾದಲ್ಲಿ ತಮಗಿರುವ ಪ್ರಮುಖ ಪಾತ್ರದ ವಿಷಯವನ್ನು ಬಿಚ್ಚಿಡುವ ಮೂಲಕ ಮೇಘನಾ ರಾಜ್ ತಮ್ಮ ಅಭಿಮಾನಿಗಳಿಗೆ ಬಿಗ್ ಸರ್‌ಪ್ರೈಸ್ ನೀಡಿದ್ದಾರೆ.
ಸೋಷಿಯಲ್‌ ಮೀಡಿಯಾದಲ್ಲಿ ನಟಿ ಭಾವುಕ ಪೋಸ್ಟ್
ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಪಾರ ಸಂತಸವನ್ನು ಹಂಚಿಕೊಂಡಿರುವ ನಟಿ ಮೇಘನಾ ರಾಜ್, ಸೂಪರ್‌ಸ್ಟಾರ್ ರಜನಿಕಾಂತ್ ಅವರೊಂದಿಗಿನ ಕೆಲವು ಸುಂದರ ಕ್ಷಣಗಳ ವಿಶೇಷ ಫೋಟೋಗಳನ್ನು ಪೋಸ್ಟ್ ಮಾಡಿದ್ದಾರೆ. “ನನಗೆ ಅಕ್ಟೋಬರ್ ತಿಂಗಳು ಯಾವಾಗಲೂ ಹೃದಯಕ್ಕೆ ಹತ್ತಿರವಾದದ್ದು. ಚಿರು ಮತ್ತು ನನ್ನ ಮಗ ರಾಯನ್ ಜನ್ಮದಿನಗಳು ಇದೇ ತಿಂಗಳಲ್ಲಿ ಬರುವುದರಿಂದ ಈ ಸಮಯ ನನಗೆ ಬಹಳ ವಿಶೇಷ. ಆದರೆ ಈಗ ಅಕ್ಟೋಬರ್ 15ನೇ ದಿನವು ನನ್ನ ಪಾಲಿಗೆ ಮತ್ತಷ್ಟು ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತಹ ಮಹತ್ವದ ದಿನವಾಗಿದೆ. ಏಕೆಂದರೆ ಇಂದು ‘ಜೈಲರ್ 2’ ದಿನ!” ಎಂದು ಅವರು ಅತ್ಯಂತ ಸಂಭ್ರಮದಿಂದ ಬರೆದುಕೊಂಡಿದ್ದಾರೆ.
ಭಾರತೀಯ ಚಿತ್ರರಂಗದ ‘ದೇವರೆಂದೇ’ ಖ್ಯಾತರಾಗಿರುವ, ಒನ್ ಅಂಡ್ ಓನ್ಲಿ ಸೂಪರ್‌ಸ್ಟಾರ್ ರಜನಿಕಾಂತ್ ಅವರ ಜೊತೆ ತೆರೆ ಹಂಚಿಕೊಳ್ಳುವುದು ಪ್ರತಿಯೊಬ್ಬ ನಟ-ನಟಿಯರ ಜೀವಮಾನದ ದೊಡ್ಡ ಕನಸಾಗಿರುತ್ತದೆ. ಆ ಕನಸು ಈಗ ನನಸಾಗಿರುವುದಕ್ಕೆ ಮೇಘನಾ ರಾಜ್ ಭಾವುಕರಾಗಿದ್ದಾರೆ. “ಇಂಡಿಯನ್ ಸಿನಿಮಾದ ಗಾಡ್, ಏಕೈಕ ಸೂಪರ್‌ಸ್ಟಾರ್ ರಜಿನಿ ಸರ್ ಅವರ ಜೊತೆ ಸ್ಕ್ರೀನ್ ಶೇರ್ ಮಾಡುತ್ತಿರುವುದು ನನ್ನೊಬ್ಬಳ ಕನಸಷ್ಟೇ ಅಲ್ಲ, ನನ್ನಿಡೀ ಕುಟುಂಬದ ಕನಸಾಗಿತ್ತು. ಕೆಲವು ಅದ್ಭುತ ನೆನಪುಗಳನ್ನು ತಕ್ಷಣವೇ ಜಗತ್ತಿನ ಮುಂದೆ ಹಂಚಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಈ ವಿಶೇಷ ಫೋಟೋಗಳನ್ನು ನಾನು ಕಳೆದ ಒಂದು ವರ್ಷದಿಂದ ಅತ್ಯಂತ ಜಾಗರೂಕತೆಯಿಂದ ಕಾಯ್ದಿರಿಸಿಕೊಂಡು ಬಂದಿದ್ದೆ. ಸದ್ಯದಲ್ಲೇ ನಿಮ್ಮ ಮುಂದೆ ಬರಲು ಇನ್ನಷ್ಟು ಕೌತುಕದ ವಿಷಯಗಳಿವೆ” ಎಂದು ತಮ್ಮ ಪೋಸ್ಟ್‌ನಲ್ಲಿ ಸೂಚ್ಯವಾಗಿ ತಿಳಿಸಿದ್ದಾರೆ.
ಸೋಷಿಯಲ್‌ ಮೀಡಿಯಾದಲ್ಲಿ ಪೋಸ್ಟ್ ವೈರಲ್
ತಮ್ಮ ಪತಿ ಚಿರು ಸರ್ಜಾ ಅವರನ್ನು ನೆನೆದು ಭಾವುಕರಾಗಿರುವ ಮೇಘನಾ, ಈ ‘ಜೈಲರ್ 2’ ಸಿನಿಮಾದ ಅಪ್‌ಡೇಟ್ ತಮ್ಮ ಪತಿ ಚಿರು ಜನ್ಮದಿನದ ಆಸುಪಾಸಿನಲ್ಲೇ ಹೊರಬಿದ್ದಿರುವುದು ತಮಗೆ ಇನ್ನಷ್ಟು ಭಾವನಾತ್ಮಕ ಕ್ಷಣವಾಗಿದೆ ಎಂದಿದ್ದಾರೆ. “ಚಿರು ಹುಟ್ಟುಹಬ್ಬದ ಹತ್ತಿರದಲ್ಲೇ ಈ ಮಹತ್ವದ ಸಿನಿಮಾ ವಿಚಾರ ಪ್ರಕಟವಾಗುತ್ತಿರುವುದು ನನ್ನ ಪಾಲಿಗೆ ಅಪಾರ ಭಾವನೆಗಳಿಂದ ಕೂಡಿದೆ. ನನ್ನ ಜೀವನದ ಮೈಲಿಗಲ್ಲುಗಳಲ್ಲಿ ಇದು ಎಂದಿಗೂ ಚಿರಸ್ಥಾಯಿಯಾಗಿ ಉಳಿಯಲಿದೆ” ಎಂದು ಮೇಘನಾ ರಾಜ್ ಹೇಳಿದ್ದಾರೆ. ಮೇಘನಾ ಅವರ ಈ ಪೋಸ್ಟ್ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಅಭಿಮಾನಿಗಳು ಹಾಗೂ ಚಿತ್ರರಂಗದ ಗಣ್ಯರು ಅವರಿಗೆ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತಿದ್ದಾರೆ. ‘ಜೈಲರ್ 2’ ಚಿತ್ರದಲ್ಲಿ ಮೇಘನಾ ಅವರ ಪಾತ್ರ ಹೇಗಿರಲಿದೆ ಎಂಬುದನ್ನು ನೋಡಲು ಅಭಿಮಾನಿಗಳು ಈಗ ಕಾತರದಿಂದ ಕಾಯುತ್ತಿದ್ದಾರೆ.
ಇದನ್ನೂ ಓದಿ: “ತೆಲುಗಿನಲ್ಲಿ ಅಲ್ಲ, ಕನ್ನಡದಲ್ಲೇ ನೋಡುವೆ”: ‘ಪ್ರೇಮದ ಊರಲಿ’ ಚಿತ್ರದ ಬಗ್ಗೆ ನಟ ವಿಜಯ್ ದೇವರಕೊಂಡ ಮಾತು!
