ದುಬೈ: ದುಬೈನಿಂದ ಇಸ್ರೇಲ್‌ನ ಟೆಲ್ ಅವೀವ್‌ಗೆ ಪ್ರಯಾಣಿಸುತ್ತಿದ್ದ ‘ಫ್ಲೈದುಬೈ’ (Flydubai) ಸಂಸ್ಥೆಯ ವಿಮಾನವನ್ನು ಬುಧವಾರ ದಿಢೀರನೆ ಸೌದಿ ಅರೇಬಿಯಾಗೆ ಮಾರ್ಗ ಬದಲಾಯಿಸಿ (ಡೈವರ್ಟ್) ಇಳಿಸಿದ ಘಟನೆಗೆ ಸಂಬಂಧಿಸಿದಂತೆ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಸರ್ಕಾರ ತೀವ್ರ ಸ್ವರೂಪದ ತನಿಖೆಗೆ ಆದೇಶಿಸಿದೆ. ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿ, ಯುಎಇ ಅಟಾರ್ನಿ ಜನರಲ್ ಕೌನ್ಸಿಲರ್ ಡಾ. ಹಮದ್ ಅಲ್ ಶಂಸಿ ಅವರ ನೇರ ನಿರ್ದೇಶನದ ಮೇರೆಗೆ ಉನ್ನತ ಮಟ್ಟದ ತನಿಖೆಯನ್ನು ಪ್ರಾರಂಭಿಸಲಾಗಿದೆ.
ವಿಶೇಷ ತನಿಖಾ ತಂಡ ರಚಿಸಿದ ಯುಎಇ
ಈ ಸಂಬಂಧ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿರುವ ಯುಎಇ ವಿದೇಶಾಂಗ ಸಚಿವಾಲಯ (MoFA), ಈ ಹಠಾತ್ ಘಟನೆಯ ಹಿಂದಿನ ಎಲ್ಲಾ ಆಯಾಮಗಳನ್ನು ಆಳವಾಗಿ ಪರಿಶೀಲಿಸಲು ಸಾರ್ವಜನಿಕ ಅಭಿಯೋಗ ಇಲಾಖೆಯ (Public Prosecution) ತಜ್ಞ ಅಧಿಕಾರಿಗಳನ್ನೊಳಗೊಂಡ ವಿಶೇಷ ತನಿಖಾ ತಂಡವನ್ನು ರಚಿಸಲಾಗಿದೆ ಎಂದು ತಿಳಿಸಿದೆ. ಪ್ರಮುಖವಾಗಿ ಈ ಘಟನೆಯಲ್ಲಿ ಯಾವುದೇ ರೀತಿಯ “ಸಂಭಾವ್ಯ ಭಯೋತ್ಪಾದಕ ಚಟುವಟಿಕೆ” ಅಥವಾ ಸಂಚು ಅಡಗಿದೆಯೇ ಎಂಬುದನ್ನು ಈ ಸೂಕ್ಷ್ಮ ತನಿಖಾ ತಂಡವು ಕೂಲಂಕಷವಾಗಿ ಪರಿಶೀಲಿಸಲಿದೆ.
ಮಾರ್ಗ ಬದಲಾಯಿಸಿದ FZ1073 ವಿಮಾನವು ಯುಎಇನಲ್ಲಿ ನೋಂದಾಯಿತಗೊಂಡಿದ್ದು, ದೇಶದ ಅಧಿಕೃತ ಧ್ವಜವನ್ನು ಹೊಂದಿರುವ ಕಾರಣ ಈ ಘಟನೆಯ ತನಿಖೆ ನಡೆಸುವ ಸಂಪೂರ್ಣ ಕಾನೂನು ಅಧಿಕಾರ ಯುಎಇ ನ್ಯಾಯಾಂಗ ಸಂಸ್ಥೆಗಳಿಗಿದೆ. ಯುಎಇ ದೇಶದ ನಿಯಮಾವಳಿಗಳ ಪ್ರಕಾರ, ತಮ್ಮ ದೇಶದ ವಿಮಾನಗಳಲ್ಲಿ ಯಾವುದೇ ಅಪರಾಧ ಅಥವಾ ಅಕ್ರಮ ಘಟನೆಗಳು ನಡೆದರೆ, ಅದು ಯುಎಇ ಗಡಿಯಿಂದ ಹೊರಗೆ ಸಂಭವಿಸಿದ್ದರೂ ಸಹ ದೇಶದ ಕಾನೂನೇ ಅನ್ವಯವಾಗುತ್ತದೆ ಎಂದು ವಿದೇಶಾಂಗ ಸಚಿವಾಲಯ ಸ್ಪಷ್ಟಪಡಿಸಿದೆ.
ಮಾಧ್ಯಮಗಳಿಗೆ ಸೂಚನೆ ನೀಡಿದ ಸರ್ಕಾರ
ಈ ದಿಢೀರ್ ಡೈವರ್ಷನ್ ಘಟನೆಗೆ ಕಾರಣವಾದ ಎಲ್ಲಾ ಸಂದರ್ಭಗಳು, ದುರುದ್ದೇಶಗಳು ಹಾಗೂ ಅದರ ಹಿಂದೆ ಯಾವುದೇ ಪೂರ್ವಾಪರ ಯೋಜನೆ ಅಥವಾ ಭಯೋತ್ಪಾದಕ ಸಂಘಟನೆಗಳ ಕೈವಾಡವಿದೆಯೇ ಎಂಬುದನ್ನು ತನಿಖಾ ತಂಡವು ಶೋಧಿಸಲಿದೆ. ಇಂತಹ ಸೂಕ್ಷ್ಮ ಸಮಯದಲ್ಲಿ ಸಾರ್ವಜನಿಕರು ಮತ್ತು ಮಾಧ್ಯಮಗಳು ಆಧಾರರಹಿತ ಊಹಾಪೋಹಗಳನ್ನು ಹರಡುವುದನ್ನು ತಪ್ಪಿಸಬೇಕು ಹಾಗೂ ಅಧಿಕೃತ ಮೂಲಗಳಿಂದ ಬರುವ ಮಾಹಿತಿಯನ್ನು ಮಾತ್ರ ನಂಬಬೇಕು ಎಂದು ಯುಎಇ ಸರ್ಕಾರ ಮನವಿ ಮಾಡಿದೆ. ಜೊತೆಗೆ, ವಿಮಾನ ಸೌದಿಯಲ್ಲಿ ಇಳಿದ ತಕ್ಷಣವೇ ಅಗತ್ಯ ಸಹಕಾರ ನೀಡಿ ಪರಿಸ್ಥಿತಿಯನ್ನು ಸಮರ್ಥವಾಗಿ ನಿಭಾಯಿಸಿದ ಸೌದಿ ಅರೇಬಿಯಾ ಸರ್ಕಾರಕ್ಕೆ ಯುಎಇ ವಿದೇಶಾಂಗ ಸಚಿವಾಲಯ ವಿಶೇಷ ಕೃತಜ್ಞತೆ ಸಲ್ಲಿಸಿದೆ.
ಇದನ್ನೂ ಓದಿ: ಯುದ್ಧಗಳು ಹಾಗೂ ಹವಾಮಾನ ವೈಪರೀತ್ಯದ ಹೊಡೆತ: ಜಾಗತಿಕ ದಕ್ಷಿಣದ ದೇಶಗಳಿಗೆ ಕಾದಿದೆ ಭಾರಿ ಆಹಾರ ಮತ್ತು ಇಂಧನ ಬಿಕ್ಕಟ್ಟು
