ಬೆಂಗಳೂರು: ದೇಶದಲ್ಲಿ ಬೃಹತ್ ಮಟ್ಟದ ಯುಪಿಐ (UPI) ವಹಿವಾಟುಗಳಿಗೆ ಶೇಕಡಾ 0.4 ರಷ್ಟು ಆಡಳಿತಾತ್ಮಕ merchant discount rate (MDR) ಅಂದರೆ ವಹಿವಾಟು ಶುಲ್ಕ ವಿಧಿಸುವ ನೂತನ ನಿಯಮ ಜಾರಿಯಾಗಲಿರುವ ಬೆನ್ನಲ್ಲೇ, ಆಗಸ್ಟ್ ತಿಂಗಳಿಗೆ ಹೋಲಿಸಿದರೆ ಸೆಪ್ಟೆಂಬರ್‌ನಲ್ಲಿ ಯುಪಿಐ ಡಿಜಿಟಲ್ ವಹಿವಾಟುಗಳಲ್ಲಿ ಶೇಕಡಾ 1.8 ರಷ್ಟು ಕುಸಿತ ದಾಖಲಾಗಿದೆ ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಬಿಡುಗಡೆ ಮಾಡಿರುವ ಹೊಸ ಅಂಕಿ-ಅಂಶಗಳು ತಿಳಿಸಿವೆ.
ಭಾರೀ ಪ್ರಮಾಣದಲ್ಲಿ ಇಳಿಕೆ ಕಂಡ ವಹಿವಾಟು
ಆರ್‌ಬಿಐ ನೀಡಿರುವ ಅಧಿಕೃತ ಮಾಹಿತಿಯ ಪ್ರಕಾರ, ಕಳೆದ ಆಗಸ್ಟ್ ತಿಂಗಳಿನಲ್ಲಿ ದೇಶಾದ್ಯಂತ ಒಟ್ಟು 2,450 ಕೋಟಿ ಯುಪಿಐ ವಹಿವಾಟುಗಳು ಜರುಗಿದ್ದವು. ಆದರೆ ಸೆಪ್ಟೆಂಬರ್ ತಿಂಗಳಿನಲ್ಲಿ ಈ ಪ್ರಮಾಣ 2,407 ಕೋಟಿ ವಹಿವಾಟುಗಳಿಗೆ ಇಳಿಕೆಯಾಗಿದೆ. ಕೇವಲ ಪ್ರಮಾಣ ಮಾತ್ರವಲ್ಲದೆ, ವಹಿವಾಟಿನ ಒಟ್ಟು ಮೊತ್ತದಲ್ಲೂ ಶೇಕಡಾ 1.50 ರಷ್ಟು ಇಳಿಕೆ ಕಂಡುಬಂದಿದೆ. ಆಗಸ್ಟ್‌ನಲ್ಲಿ ಬರೋಬ್ಬರಿ 29.82 ಲಕ್ಷ ಕೋಟಿ ರೂಪಾಯಿ ಮೌಲ್ಯದ ವಹಿವಾಟುಗಳು ನಡೆದಿದ್ದರೆ, ಸೆಪ್ಟೆಂಬರ್‌ನಲ್ಲಿ ಈ ಮೌಲ್ಯ 29.37 ಲಕ್ಷ ಕೋಟಿ ರೂಪಾಯಿಗೆ ತಗ್ಗಿದೆ. ಆದಾಗ್ಯೂ, ಆಗಸ್ಟ್ ತಿಂಗಳಿನಲ್ಲಿ 31 ದಿನಗಳಿದ್ದರೆ ಸೆಪ್ಟೆಂಬರ್‌ನಲ್ಲಿ 30 ದಿನಗಳು ಮಾತ್ರ ಇದ್ದ ಕಾರಣ ಈ ಅಂಕಿ-ಅಂಶಗಳಲ್ಲಿ ಸಣ್ಣ ಮಟ್ಟದ ವ್ಯತ್ಯಾಸ ಕಾಣಿಸಿಕೊಂಡಿದೆ ಎಂದು ಉದ್ಯಮ ತಜ್ಞರು ವಿಶ್ಲೇಷಿಸಿದ್ದಾರೆ. ದೈನಂದಿನ ಸರಾಸರಿ ವಹಿವಾಟನ್ನು ಗಮನಿಸಿದರೆ ಆಗಸ್ಟ್‌ನಲ್ಲಿ ದಿನಕ್ಕೆ 79.1 ಕೋಟಿ ವಹಿವಾಟುಗಳು ನಡೆದಿದ್ದರೆ, ಸೆಪ್ಟೆಂಬರ್‌ನಲ್ಲಿ ದಿನಕ್ಕೆ 80.2 ಕೋಟಿ ವಹಿವಾಟುಗಳು ಜರುಗಿವೆ.
ಇನ್ನು ಎನ್‌ಪಿಸಿಐ (NPCI) ನಿರ್ವಹಿಸುವ ಐಎಂಪಿಎಸ್ (IMPS) ಪ್ಲಾಟ್‌ಫಾರ್ಮ್‌ನಲ್ಲಿ ಸೆಪ್ಟೆಂಬರ್‌ನಲ್ಲಿ 7.05 ಲಕ್ಷ ಕೋಟಿ ರೂಪಾಯಿ ಮೌಲ್ಯದ 35.40 ಕೋಟಿ ವಹಿವಾಟುಗಳು ನಡೆದಿವೆ. ಆರ್‌ಬಿಐ ನೇರ ನಿಯಂತ್ರಣದ ಆರ್‌ಟಿಜಿಎಸ್ (RTGS) ವ್ಯವಸ್ಥೆಯಲ್ಲಿ 235.71 ಲಕ್ಷ ಕೋಟಿ ರೂಪಾಯಿ ಮೌಲ್ಯದ 3.25 ಕೋಟಿ ಬೃಹತ್ ವಹಿವಾಟುಗಳು ಜರುಗಿದ್ದರೆ, ಎನ್‌ಇಎಫ್‌ಟಿ (NEFT) ಜಾಲದ ಮೂಲಕ 46.75 ಲಕ್ಷ ಕೋಟಿ ರೂಪಾಯಿ ಮೌಲ್ಯದ 86.2 ಕೋಟಿ ವಹಿವಾಟುಗಳು ನಡೆದಿವೆ.
ಮತ್ತೊಂದೆಡೆ, ಕಳೆದ ಆರು ವರ್ಷಗಳಿಂದ ಸಂಪೂರ್ಣ ಉಚಿತವಾಗಿದ್ದ ಯುಪಿಐ ಪಾವತಿ ವ್ಯವಸ್ಥೆಯಲ್ಲಿ ಸರ್ಕಾರ ಮಹತ್ವದ ಬದಲಾವಣೆ ತಂದಿದೆ. ಅಕ್ಟೋಬರ್ 15 ರಿಂದ ಜಾರಿಗೆ ಬರಲಿರುವ ಹೊಸ ನಿಯಮದಂತೆ, ವ್ಯಾಪಾರಿಗಳಿಗೆ ಸಾರ್ವಜನಿಕರು ಮಾಡುವ 2,000 ರೂಪಾಯಿಗಿಂತ ಹೆಚ್ಚಿನ ಮೌಲ್ಯದ ಯುಪಿಐ ಪಾವತಿಗಳ ಮೇಲೆ ಶೇಕಡಾ 0.4 ರಷ್ಟು ಎಂಡಿಆರ್ ಶುಲ್ಕ ವಿಧಿಸಲಾಗುತ್ತದೆ. ಆದರೆ ಸಾಮಾನ್ಯ ಸಾರ್ವಜನಿಕರು ಪರಸ್ಪರ ಮಾಡಿಕೊಳ್ಳುವ ದೈನಂದಿನ ವ್ಯಕ್ತಿಯಿಂದ ವ್ಯಕ್ತಿಗೆ (P2P) ಪಾವತಿಗಳು ಹಾಗೂ ಸಣ್ಣ ಪಾವತಿಗಳಿಗೆ ಯಾವುದೇ ಶುಲ್ಕ ಇರುವುದಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ. 75,000 ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚಿನ ವಹಿವಾಟುಗಳಿಗೆ ಗರಿಷ್ಠ ಶುಲ್ಕದ ಮಿತಿಯನ್ನು 300 ರೂಪಾಯಿಗಳಿಗೆ ನಿಗದಿಪಡಿಸಲಾಗಿದೆ. ರೈಲ್ವೆ, ಟೆಲಿಕಾಂ, ಇನ್ಶೂರೆನ್ಸ್, ಇಂಧನ ಮತ್ತು ಕೃಷಿ ವಲಯಗಳಂತಹ ಅಗತ್ಯ ಸೇವೆಗಳಿಗೆ 2,000 ರೂಪಾಯಿಗಿಂತ ಹೆಚ್ಚಿನ ಪಾವತಿಗೆ ಕೇವಲ 5 ರೂಪಾಯಿ ಸ್ಥಿರ ಶುಲ್ಕ ಇರಲಿದೆ. ಹಾಗೆಯೇ ಮ್ಯೂಚುಯಲ್ ಫಂಡ್ ಹಾಗೂ ಶೇರ್ ಮಾರುಕಟ್ಟೆ ಹೂಡಿಕೆಗಳಿಗೆ ಶೇ. 0.02 ಶುಲ್ಕ ಅನ್ವಯವಾಗಲಿದೆ.
ಹೆಚ್ಚಿನ ಶುಲ್ಕಕ್ಕೆ ವರ್ತಕರ ಆಕ್ರೋಶ
ಸರ್ಕಾರದ ಈ ನೂತನ ಶುಲ್ಕ ನೀತಿಯನ್ನು ತೀವ್ರವಾಗಿ ವಿರೋಧಿಸಿರುವ ಅಖಿಲ ಭಾರತ ಮೊಬೈಲ್ ಚಿಲ್ಲರೆ ವರ್ತಕರ ಸಂಘವು (AIMRA), ಅಕ್ಟೋಬರ್ 2 ರಂದು ದೇಶಾದ್ಯಂತ ‘ನೋ ಯುಪಿಐ ಡೇ’ ಪ್ರತಿಭಟನೆಗೆ ಕರೆ ನೀಡಿದೆ. ಈ ನೂತನ ಶುಲ್ಕವು ಸಣ್ಣ ಚಿಲ್ಲರೆ ವ್ಯಾಪಾರಿಗಳ ಮೇಲೆ ಹೆಚ್ಚಿನ ಹಣಕಾಸಿನ ಹೊರೆ ಹೊರಿಸಲಿದೆ ಎಂದು ಸಂಘಟನೆಯು ಆಕ್ರೋಶ ವ್ಯಕ್ತಪಡಿಸಿದೆ. ಈ ವಿನೂತನ ಪ್ರತಿಭಟನೆಯ ಭಾಗವಾಗಿ ದೇಶದಾದ್ಯಂತ ಇರುವ ಕೋಟ್ಯಂತರ ಅಂಗಡಿದಾರರು ತಮ್ಮ ಯುಪಿಐ ಕ್ಯೂಆರ್ ಕೋಡ್‌‌ಗಳು, ಸೌಂಡ್ ಬಾಕ್ಸ್‌ಗಳು ಹಾಗೂ ಪಾವತಿ ಸ್ಕ್ಯಾನರ್‌ಗಳನ್ನು ಕಪ್ಪು ಬಟ್ಟೆಯಿಂದ ಮುಚ್ಚಿ ಸರ್ಕಾರದ ನಿರ್ಧಾರದ ವಿರುದ್ಧ ತಮ್ಮ ಸಾಂಕೇತಿಕ ಅಸಮಾಧಾನವನ್ನು ದಾಖಲಿಸಲಿದ್ದಾರೆ.
ಇದನ್ನೂ ಓದಿ: ಮನೆ ಖರೀದಿದಾರರಿಗೆ ನೂರಾರು ಕೋಟಿ ವಂಚನೆ ಆರೋಪ: ‘ಓಝೋನ್ ಅರ್ಬಾನಾ’ ಸಿಎಂಡಿ ವಾಸುದೇವನ್ ಇಡಿ ಬಲೆಗೆ!
