ಹೈದರಾಬಾದ್: ಗ್ಲಾಮರಸ್ ನಟಿ ಜಾನ್ವಿ ಕಪೂರ್ (Janhvi Kapoor) ಅವರದ್ದೆನ್ನಲಾದ ಕೆಲವು ಖಾಸಗಿ ಚಾಟ್ಗಳ ಸ್ಕ್ರೀನ್ಶಾಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಹೊಸ ವಿವಾದಕ್ಕೆ ಕಾರಣವಾಗಿವೆ. ಸ್ಟಾರ್ ನಟ ರಾಮ್ ಚರಣ್ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಸ್ಪೋರ್ಟ್ಸ್ ಡ್ರಾಮಾ ಸಿನಿಮಾ ‘ಪೆದ್ದಿ’ ಚಿತ್ರೀಕರಣದ ವೇಳೆ ನಡೆದಿದೆ ಎನ್ನಲಾದ ಕೆಲವು ಆಘಾತಕಾರಿ ವಿಷಯಗಳು ಈ ಲೀಕ್ಡ್ ಚಾಟ್ಗಳ ಮೂಲಕ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿವೆ.
ಅಸಮಾಧಾನ ವ್ಯಕ್ತಪಡಿಸಿದ್ದ ನಟಿ
ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳ ಅಕೌಂಟ್ಗಳಿಂದ ಹರಿದಾಡುತ್ತಿರುವ ಈ ಅಪರಿಚಿತ ಚಾಟ್ಗಳ ಪ್ರಕಾರ, ಸಿನಿಮಾದ ಕೆಲವು ದೃಶ್ಯಗಳ ಚಿತ್ರೀಕರಣದ ಶೈಲಿ ಹಾಗೂ ತಮ್ಮ ಪಾತ್ರವನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯುತ್ತಿದ್ದ ವಿಧಾನದ ಬಗ್ಗೆ ಜಾನ್ವಿ ಕಪೂರ್ ತೀವ್ರ ಅಸಮಾಧಾನ ಮತ್ತು ಆಕ್ಷೇಪ ವ್ಯಕ್ತಪಡಿಸಿದ್ದರು ಎನ್ನಲಾಗಿದೆ. ಶೂಟಿಂಗ್ ವೇಳೆ ಬಳಸಲಾಗುತ್ತಿದ್ದ ಕೆಲವು ನಿರ್ದಿಷ್ಟ ಕ್ಯಾಮೆರಾ ಆಂಗಲ್ಗಳು (Camera Angles) ತಮಗೆ ತೀವ್ರ ಮುಜುಗರ ಉಂಟುಮಾಡಿದ್ದವು. ಹೀಗಾಗಿ ಅಂತಹ ವಿಶ್ಯುಯಲ್ ಫ್ರೇಮಿಂಗ್ಗಳನ್ನು ತಕ್ಷಣವೇ ನಿಲ್ಲಿಸಬೇಕು ಮತ್ತು ತಮ್ಮ ದೇಹದ ಭಾಗಗಳ ಮೇಲೆ ಅತಿಯಾಗಿ ಫೋಕಸ್ ಮಾಡುವಂತಹ ಶಾಟ್ಗಳನ್ನು ತಗೆಯಬಾರದು ಎಂದು ಜಾನ್ವಿ ಶೂಟಿಂಗ್ ಸೆಟ್ನಲ್ಲಿ ಸ್ಪಷ್ಟ ಗಡಿಗಳನ್ನು ಹಾಕಿದ್ದರು ಎಂಬ ವಿಷಯ ಈ ಸ್ಕ್ರೀನ್ಶಾಟ್ಗಳಿಂದ ತಿಳಿದುಬಂದಿದೆ.
ಇದೇ ವೇಳೆ, ಜಾನ್ವಿ ಕಪೂರ್ ಅವರ ಈ ಆಕ್ಷೇಪ ಮತ್ತು ಕಳಕಳಿಗೆ ಚಿತ್ರದ ನಾಯಕ ನಟ ರಾಮ್ ಚರಣ್ ಸೆಟ್ನಲ್ಲಿ ಸಂಪೂರ್ಣ ಬೆಂಬಲ ನೀಡಿದ್ದರು ಎಂಬ ಕುತೂಹಲಕಾರಿ ವಿಷಯವೂ ಹೊರಬಿದ್ದಿದೆ. ವೈರಲ್ ಆಗಿರುವ ಚಾಟ್ನಲ್ಲಿ ಜಾನ್ವಿ ಅವರದ್ದೇ ಎನ್ನಲಾದ ಸಂದೇಶವೊಂದಿದ್ದು, ಅದರಲ್ಲಿ “ನಿರ್ದಿಷ್ಟ ದೃಶ್ಯಗಳ ಚಿತ್ರೀಕರಣದ ವೇಳೆ ಉಂಟಾದ ಮುಜುಗರದ ಸಂದರ್ಭದಲ್ಲಿ ಚಿತ್ರದ ನಾಯಕ ನಟ ರಾಮ್ ಚರಣ್ ಮಧ್ಯಪ್ರವೇಶಿಸಿ, ನನ್ನ ಪರವಾಗಿ ನಿಂತು ದೃಶ್ಯಗಳನ್ನು ಬದಲಾಯಿಸುವಂತೆ ನಿರ್ದೇಶಕರಿಗೆ ಬೆಂಬಲ ನೀಡಿದ್ದರು” ಎಂದು ಬರೆದುಕೊಳ್ಳಲಾಗಿದೆ. ಕೋ-ಸ್ಟಾರ್ ಜಾನ್ವಿ ಕಪೂರ್ ಅವರ ಗೌರವಕ್ಕೆ ಧಕ್ಕೆಯಾಗದಂತೆ ರಾಮ್ ಚರಣ್ ನಡೆದುಕೊಂಡಿರುವ ರೀತಿಗೆ ಅಭಿಮಾನಿಗಳಿಂದ ಮೆಚ್ಚುಗೆಯೂ ವ್ಯಕ್ತವಾಗುತ್ತಿದೆ.
ನಟಿ ಪಾತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ
ಮತ್ತೊಂದೆಡೆ, ‘ಪೆದ್ದಿ’ ಚಿತ್ರದಲ್ಲಿ ಜಾನ್ವಿ ಕಪೂರ್ ನಿರ್ವಹಿಸುತ್ತಿರುವ ‘ಅಚ್ಚಿಯಮ್ಮ’ ಎಂಬ ಪಾತ್ರದ ಚಿತ್ರಣದ ಬಗ್ಗೆ ಈಗಾಗಲೇ ಸೋಷಿಯಲ್ ಮೀಡಿಯಾದಲ್ಲಿ ವೀಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಸಿನಿಮಾದಲ್ಲಿ ಅವರ ಪಾತ್ರದ ಎಂಟ್ರಿ ಹಾಗೂ ಪ್ರೆಸೆಂಟೇಶನ್ ಕೇವಲ ಗ್ಲಾಮರ್ ಮತ್ತು ಬಾಹ್ಯ ಸೌಂದರ್ಯಕ್ಕೆ ಮಾತ್ರ ಅತಿಯಾದ ಆದ್ಯತೆ ನೀಡುವಂತಿದೆ ಎಂದು ನೆಟ್ಟಿಗರು ಟೀಕಿಸುತ್ತಿದ್ದಾರೆ. ಹೆಣ್ಣು ಮಕ್ಕಳನ್ನು ಕ್ಯಾಮೆರಾದಲ್ಲಿ ತೋರಿಸುವ ಸಿನಿಮಾದ ದೃಶ್ಯ ವೈಭವದ ಶೈಲಿಯನ್ನು ಹಲವರು ಪ್ರಶ್ನಿಸುತ್ತಿರುವ ಬೆನ್ನಲ್ಲೇ ಈ ಚಾಟ್ ವಿವಾದ ಮುಂಚೂಣಿಗೆ ಬಂದಿದೆ. ಆದರೆ, ವೈರಲ್ ಆಗಿರುವ ಈ ಖಾಸಗಿ ಚಾಟ್ಗಳ ಸ್ಕ್ರೀನ್ಶಾಟ್ಗಳ ಬಗ್ಗೆ ನಟಿ ಜಾನ್ವಿ ಕಪೂರ್ ಆಗಲಿ ಅಥವಾ ‘ಪೆದ್ದಿ’ ಚಿತ್ರತಂಡವಾಗಲಿ ಇದುವರೆಗೆ ಯಾವುದೇ ಅಧಿಕೃತ ಸ್ಪಷ್ಟನೆ ನೀಡಿಲ್ಲ.
