ಬೆಂಗಳೂರು: ಭಾರತೀಯ ಚಿತ್ರರಂಗದಲ್ಲಿ ಭಾರಿ ಸದ್ದು ಮಾಡಿದ್ದ ಬಹುನಿರೀಕ್ಷಿತ ‘ಕಲ್ಕಿ 2898 ಎಡಿ’ (Kalki 2898 AD) ಸಿನಿಮಾದ ಎರಡನೇ ಭಾಗದ ಚಿತ್ರೀಕರಣವು ಪ್ರಸ್ತುತ ಭರದಿಂದ ಸಾಗುತ್ತಿದ್ದು, ಚಿತ್ರತಂಡಕ್ಕೆ ಸಂಬಂಧಿಸಿದಂತೆ ಅತ್ಯಂತ ಕುತೂಹಲಕಾರಿ ಮತ್ತು ಮಹತ್ವದ ಸುದ್ದಿಯೊಂದು ಹೊರಬಿದ್ದಿದೆ. ಈ ಬ್ಲಾಕ್ಬಸ್ಟರ್ ಪ್ರಾಂಚೈಸಿಯ ಮೊದಲ ಭಾಗದಲ್ಲಿ ಮುಖ್ಯ ನಾಯಕಿಯಾಗಿ ನಟಿಸಿ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ್ದ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಅವರು ಈಗ ಎರಡನೇ ಭಾಗದಿಂದ ಸಂಪೂರ್ಣವಾಗಿ ಹೊರನಡೆದಿದ್ದಾರೆ. ಅವರ ಈ ಹಠಾತ್ ನಿರ್ಗಮನದಿಂದ ತೆರವಾದ ಪ್ರಮುಖ ಪಾತ್ರಕ್ಕೆ ಇದೀಗ ದಕ್ಷಿಣ ಭಾರತದ ಖ್ಯಾತ ಅಭಿನೇತ್ರಿ ಸಾಯಿ ಪಲ್ಲವಿ (Sai Pallavi) ಅವರ ಸೇರ್ಪಡೆಯಾಗಿದೆ.
ಭಾರೀ ಪೈಪೋಟಿ ನಡುವೆ ಪಾತ್ರ ಪಡೆದುಕೊಂಡ ನಟಿ
ವರದಿಗಳ ಪ್ರಕಾರ, ಸಿನಿಮಾದ ಕೆಲಸದ ಅವಧಿ (ವರ್ಕಿಂಗ್ ಹೌರ್ಸ್), ಸಂಭಾವನೆ ಹಾಗೂ ಕೆಲವು ಪ್ರಮುಖ ಷರತ್ತುಗಳಿಗೆ ಸಂಬಂಧಿಸಿದಂತೆ ದೀಪಿಕಾ ಪಡುಕೋಣೆ ಮತ್ತು ಚಿತ್ರತಂಡದ ನಡುವೆ ಭಿನ್ನಾಭಿಪ್ರಾಯಗಳು ತಲೆದೂರಿದ್ದವು. ಈ ವಿವಾದವು ತೀವ್ರರೂಪ ಪಡೆದುಕೊಂಡ ಹಿನ್ನೆಲೆಯಲ್ಲಿ ದೀಪಿಕಾ ಸಿನಿಮಾದಿಂದ ಹೊರನಡೆಯುವ ತೀರ್ಮಾನ ಕೈಗೊಂಡರು. ‘ಕಲ್ಕಿ’ ಕಥೆಯ ಕೇಂದ್ರ ಬಿಂದುವಾಗಿದ್ದ ‘ಸುಮತಿ’ ಪಾತ್ರವನ್ನು ಮೊದಲ ಭಾಗದಲ್ಲಿ ದೀಪಿಕಾ ನಿರ್ವಹಿಸಿದ್ದರು. ಮುಂದಿನ ಭಾಗಕ್ಕೂ ಅತ್ಯಂತ ನಿರ್ಣಾಯಕವಾಗಿರುವ ಈ ಪಾತ್ರದ ನಿರ್ಗಮನವು ನಿರ್ಮಾಪಕರಿಗೆ ಸವಾಲಾಗಿ ಪರಿಣಮಿಸಿತ್ತು. ಆರಂಭದಲ್ಲಿ ಈ ಪಾತ್ರಕ್ಕಾಗಿ ಆಲಿಯಾ ಭಟ್, ರಶ್ಮಿಕಾ ಮಂದಣ್ಣ ಹಾಗೂ ಜಾನ್ವಿ ಕಪೂರ್ ಅವರ ಹೆಸರುಗಳು ಕೇಳಿಬಂದಿದ್ದರೂ, ಅಂತಿಮವಾಗಿ ಅಭಿನಯ ರಾಣಿ ಸಾಯಿ ಪಲ್ಲವಿ ಅವರನ್ನೇ ‘ಸುಮತಿ’ ಪಾತ್ರಕ್ಕೆ ಚಿತ್ರತಂಡ ಅಂತಿಮಗೊಳಿಸಿದೆ.
ಕಥೆಯ ಪ್ರಕಾರ ‘ಸುಮತಿ’ ಪಾತ್ರವು ಇಡೀ ಸಿನಿಮಾದ ಆತ್ಮವಿದ್ದಂತೆ. ಪ್ರಭಾಸ್ ಅಭಿನಯದ ಭೈರವ ಹಾಗೂ ಅಮಿತಾಬ್ ಬಚ್ಚನ್ ಅಭಿನಯದ ಅಶ್ವತ್ಥಾಮ ಪಾತ್ರಗಳು ಈ ಸುಮತಿಯ ರಕ್ಷಣೆಗಾಗಿಯೇ ಕದನಕ್ಕಿಳಿಯುವುದರಿಂದ ಈ ಪಾತ್ರಕ್ಕೆ ಅತ್ಯಂತ ಬಲವಾದ ಅಭಿನಯದ ಅಗತ್ಯವಿತ್ತು. ನೈಸರ್ಗಿಕ ಅಭಿನಯಕ್ಕೆ ಹೆಸರಾದ ಸಾಯಿ ಪಲ್ಲವಿ ಈ ಪಾತ್ರಕ್ಕೆ ಸಂಪೂರ್ಣ ನ್ಯಾಯ ಒದಗಿಸಲಿದ್ದಾರೆ ಎಂಬ ವಿಶ್ವಾಸವನ್ನು ನಿರ್ದೇಶಕ ನಾಗ್ ಅಶ್ವಿನ್ ಹಾಗೂ ತಂಡ ಹೊಂದಿದೆ.
ಯಶಸ್ಸಿನ ಹಂತದಲ್ಲಿದ್ದಾರೆ ಸಾಯಿ ಪಲ್ಲವಿ
ಸದ್ಯ ಸಾಯಿ ಪಲ್ಲವಿ ಅವರ ವೃತ್ತಿಜೀವನವು ಅತ್ಯಂತ ಯಶಸ್ವಿ ಹಂತದಲ್ಲಿದೆ. ಬಾಲಿವುಡ್ನ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾದಲ್ಲಿ ಸೀತೆಯಾಗಿ ನಟಿಸುತ್ತಿರುವ ಅವರು, ಪ್ರಸ್ತುತ ಮಣಿರತ್ನಂ ನಿರ್ದೇಶನದ ಹೊಸ ಚಿತ್ರದಲ್ಲಿ ವಿಜಯ್ ಸೇತುಪತಿ ಜೊತೆಗೆ ಬಣ್ಣ ಹಚ್ಚುತ್ತಿದ್ದಾರೆ. ಕೊಲ್ಕತ್ತಾ, ಹೈದರಾಬಾದ್, ಚೆನ್ನೈ ಹಾಗೂ ದೆಹಲಿ ಸೇರಿದಂತೆ ವಿವಿಧ ಕಡೆಗಳಲ್ಲಿ ಈ ಸಿನಿಮಾಗಳ ಚಿತ್ರೀಕರಣ ನಡೆಯುತ್ತಿದೆ. ಈಗಾಗಲೇ ‘ಕಲ್ಕಿ 2’ ಚಿತ್ರದ ಶೇಕಡಾ 30 ರಷ್ಟು ಭಾಗದ ಚಿತ್ರೀಕರಣ ಮುಗಿದಿದ್ದು, ಅಮಿತಾಬ್ ಬಚ್ಚನ್ ಅವರ ಪ್ರಮುಖ ದೃಶ್ಯಗಳನ್ನು ಕಂಪ್ಲೀಟ್ ಮಾಡಲಾಗಿದೆ. ಈಗ ಸಾಯಿ ಪಲ್ಲವಿ ಅವರ ಆಗಮನದೊಂದಿಗೆ ಸಿನಿಮಾ ಮತ್ತಷ್ಟು ಕುತೂಹಲ ಮೂಡಿಸಿದೆ.
ಇದನ್ನೂ ಓದಿ: ಅನುಮತಿಯಿಲ್ಲದೆ ಹಾಡು ಬಳಕೆ ಮಾಡಿದ ಚಿತ್ರತಂಡ: 3 ವರ್ಷಗಳ ಶ್ರಮ ಕದ್ದಿರುವ ಆರೋಪ
