ನವದೆಹಲಿ: ಕಳೆದ 2025ರಲ್ಲಿ ಜಮ್ಮು ಮತ್ತು ಕಾಶ್ಮೀರದ ನಿಸರ್ಗ ರಮಣೀಯ ಪಹಲ್ಗಾಮ್ನಲ್ಲಿ (Pahalgam ) ನಡೆದ ಭೀಕರ ಉಗ್ರರ ದಾಳಿಯ ತನಿಖೆ ನಡೆಸುತ್ತಿರುವ ಭಾರತದ ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಮತ್ತು ಜಮ್ಮು-ಕಾಶ್ಮೀರ ಪೊಲೀಸರಿಗೆ ಅತ್ಯಂತ ಪ್ರಮುಖವಾದ ತಾಂತ್ರಿಕ ಪುರಾವೆಗಳು ಲಭ್ಯವಾಗಿವೆ. ದಾಳಿ ನಡೆಸಿದ ಉಗ್ರರಿಂದ ವಶಪಡಿಸಿಕೊಳ್ಳಲಾದ ಎರಡು ಮೊಬೈಲ್ ಫೋನ್ಗಳ ಪೈಕಿ ಒಂದು ಫೋನ್, 2021ರಲ್ಲಿ ಪಾಕಿಸ್ತಾನಕ್ಕೆ ಆಮದು ಮಾಡಿಕೊಳ್ಳಲಾದ ದೊಡ್ಡ ಕನ್ಸೈನ್ಮೆಂಟ್ಗೆ ಸೇರಿದ್ದಾಗಿದೆ. ಅಚ್ಚರಿಯ ವಿಷಯವೆಂದರೆ, ಈ ಮೊಬೈಲ್ ಸಾಗಣೆಗೆ ಕರಾಚಿ ಮೂಲದ ಫೈಸಲ್ ಬ್ಯಾಂಕ್ ಹಣಕಾಸಿನ ನೆರವು ನೀಡಿತ್ತು. ಈ ಬ್ಯಾಂಕ್ನ ಹೆಸರು ಈ ಹಿಂದೆಯೂ ಕೂಡ ಭಯೋತ್ಪಾದನೆಗೆ ಸಂಬಂಧಿಸಿದ ಹಣಕಾಸು ವ್ಯವಹಾರದ ಪ್ರಕರಣಗಳಲ್ಲಿ ಕೇಳಿಬಂದಿತ್ತು ಎಂದು ತನಿಖಾ ಮೂಲಗಳನ್ನು ಉಲ್ಲೇಖಿಸಿ ಎನ್ಡಿಟಿವಿ ವರದಿ ಮಾಡಿದೆ.
ವ್ಯವಸ್ಥಿತ ಸಂಚು ಬಟಾಬಯಲು
ಕಳೆದ ವರ್ಷ ಹೆಚ್ಚಿನ ಸಂಖ್ಯೆಯ ಹಿಂದೂ ಪ್ರವಾಸಿಗರು ಸೇರಿದಂತೆ ಒಟ್ಟು 26 ಅಮಾಯಕರನ್ನು ಬಲಿಪಡೆದ ಈ ಪಹಲ್ಗಾಮ್ ದಾಳಿಯ ನಂತರ ಭಾರತ ಮತ್ತು ಪಾಕಿಸ್ತಾನದ ನಡುವಿನ ರಾಜತಾಂತ್ರಿಕ ಸಂಬಂಧಗಳು ದಶಕದಲ್ಲೇ ಅತ್ಯಂತ ಕೆಳಮಟ್ಟಕ್ಕೆ ಕುಸಿದಿದ್ದವು. ದಾಳಿಗೆ ಪಾಕಿಸ್ತಾನದ ಬೆಂಬಲವೇ ಕಾರಣ ಎಂದು ಭಾರತ ನೇರ ಆರೋಪ ಮಾಡಿತ್ತು. ಆದರೆ ಇಸ್ಲಾಮಾಬಾದ್ ಇದನ್ನು ನಿರಾಕರಿಸಿದ ಬೆನ್ನಲ್ಲೇ ಉಭಯ ದೇಶಗಳ ನಡುವೆ ವೈಮಾನಿಕ ದಾಳಿ, ಡ್ರೋನ್ ದಾಳಿ ಮತ್ತು ಭಾರಿ ಮೋರ್ಟಾರ್ ಶೆಲ್ ದಾಳಿ ಸೇರಿದಂತೆ ನಾಲ್ಕು ದಿನಗಳ ಕಾಲ ತೀವ್ರ ಮಿಲಿಟರಿ ಸಂಘರ್ಷ ನಡೆದಿತ್ತು. ಪ್ರಸ್ತುತ ದೊರೆತಿರುವ ಆಧಾರಗಳ ಪ್ರಕಾರ, ಈ ದಾಳಿಯು ದಿಢೀರ್ ಆಗಿ ನಡೆದಿದ್ದಲ್ಲ, ಬದಲಿಗೆ ಇದರ ಹಿಂದೆ ಹಲವು ವರ್ಷಗಳ ವ್ಯವಸ್ಥಿತ ತರಬೇತಿ ಮತ್ತು ಸಂಚು ಅಡಗಿತ್ತು ಎಂಬುದು ಸಾಬೀತಾಗಿದೆ.
ಶ್ರೀನಗರದ ದಾಚಿಗಾಮ್ ಬಳಿ ನಡೆದ ‘ಆಪರೇಷನ್ ಮಹದೇವ್’ ಎಂಬ ಭದ್ರತಾ ಪಡೆಗಳ ಕಾರ್ಯಾಚರಣೆಯಲ್ಲಿ ಸುಲೈಮಾನ್ ಶಾ, ಹಬೀಬ್ ತಾಹಿರ್ ಅಲಿಯಾಸ್ ಜಿಬ್ರಾನ್ ಮತ್ತು ಹಮ್ಜಾ ಅಫ್ಘಾನಿ ಎಂಬ ಮೂವರು ಉಗ್ರರನ್ನು ಹೊಡೆದುರುಳಿಸಲಾಗಿತ್ತು. ಇವರಿಂದ ವಶಪಡಿಸಿಕೊಳ್ಳಲಾದ ಶಿಯೋಮಿ ಕಂಪನಿಯ ರೆಡ್ಮಿ ಸರಣಿಯ ಎರಡು ಫೋನ್ಗಳ ಇಎಂಇಐ (IMEI) ಸಂಖ್ಯೆಗಳ ಮೂಲಕ ಜಾಗತಿಕ ಕಂಪನಿಯನ್ನು ಸಂಪರ್ಕಿಸಿ ಅವುಗಳ ಹಿಸ್ಟರಿಯನ್ನು ಕಲೆಹಾಕಿದಾಗ ಈ ರಹಸ್ಯ ಹೊರಬಿದ್ದಿದೆ. ಇದರಲ್ಲಿ 2021ರಲ್ಲಿ ಪಾಕಿಸ್ತಾನಕ್ಕೆ ಕಾನೂನುಬದ್ಧವಾಗಿಯೇ ಆಮದಾಗಿದ್ದ ರೆಡ್ಮಿ 9ಟಿ ಫೋನ್ ಒಂದಾಗಿದ್ದರೆ, ಮತ್ತೊಂದು 2023ರಲ್ಲಿ ಲಾಹೋರ್ನ ಏರ್ ಲಿಂಕ್ ಕಮ್ಯುನಿಕೇಷನ್ಸ್ ಮೂಲಕ ಆಮದಾಗಿದ್ದ ರೆಡ್ಮಿ ನೋಟ್ 12 ಆಗಿದೆ.
ಬ್ಯಾಂಕ್ ದಾಖಲೆ ಲಭ್ಯ
ಸಾಮಾನ್ಯವಾಗಿ ಅಂತಾರಾಷ್ಟ್ರೀಯ ವ್ಯಾಪಾರದಲ್ಲಿ ಬ್ಯಾಂಕ್ಗಳು ಆಮದುದಾರರಿಗೆ ಕ್ರೆಡಿಟ್ ಸೌಲಭ್ಯ ನೀಡುವುದು ಸಹಜವಾದ್ದರಿಂದ ಕೇವಲ ದಾಖಲೆಗಳಲ್ಲಿ ಹೆಸರಿದ್ದ ತಕ್ಷಣ ಬ್ಯಾಂಕ್ ತಪ್ಪು ಮಾಡಿದೆ ಎಂದು ಹೇಳಲು ಬರುವುದಿಲ್ಲ. ಆದರೆ ಫೈಸಲ್ ಬ್ಯಾಂಕ್ನ ಖಾತೆಗಳನ್ನು ಈ ಹಿಂದೆ ಕೆಲವು ನಿಷೇಧಿತ ಉಗ್ರಗಾಮಿ ಸಂಘಟನೆಗಳು ಬಳಸಿದ್ದವು ಎಂಬ ಅಂತಾರಾಷ್ಟ್ರೀಯ ವರದಿಗಳ ಹಿನ್ನೆಲೆಯಲ್ಲಿ ತನಿಖಾ ಸಂಸ್ಥೆಗಳು ಈಗ ಇದರ ಮೇಲೆ ಕಣ್ಣಿಟ್ಟಿವೆ. ಮತ್ತೊಂದು ಆಘಾತಕಾರಿ ವಿಷಯವೆಂದರೆ, ಈ ಎರಡೂ ಫೋನ್ಗಳನ್ನು ಪಾಕಿಸ್ತಾನಕ್ಕೆ ಆಮದು ಮಾಡಿಕೊಂಡ ದಿನದಿಂದ ಸುಮಾರು ನಾಲ್ಕು ವರ್ಷಗಳ ಕಾಲ ಯಾವುದೇ ನೆಟ್ವರ್ಕ್, ಸಿಮ್ ಕಾರ್ಡ್ ಅಥವಾ ಕರೆಗಳಿಗಾಗಿ ಬಳಸದೇ ಸಂಪೂರ್ಣ ಆಫ್ ಮಾಡಿ ಇಡಲಾಗಿತ್ತು. ಕೇವಲ 2025ರ ದಾಳಿಗೆ ಸ್ವಲ್ಪ ದಿನಗಳ ಮುಂಚೆಯಷ್ಟೇ ಇವುಗಳನ್ನು ಆಕ್ಟಿವೇಟ್ ಮಾಡಲಾಗಿದೆ.
ಎರಡು ಬೇರೆ ಬೇರೆ ಅವಧಿಯಲ್ಲಿ ಬಂದ ಫೋನ್ಗಳು ಒಂದೇ ಮಾದರಿಯಲ್ಲಿ ದೀರ್ಘಕಾಲ ನಿಷ್ಕ್ರಿಯವಾಗಿದ್ದು, ನಂತರ ದಾಳಿಯ ವೇಳೆ ಒಟ್ಟಿಗೇ ಬಳಕೆಯಾಗಿರುವುದು ಕೇವಲ ಕಾಕತಾಳೀಯವಲ್ಲ ಎಂದು ಅಧಿಕಾರಿಗಳು ನಂಬಿದ್ದಾರೆ. ಇವುಗಳನ್ನು ಉಗ್ರರಿಗಾಗಿಯೇ ಸುರಕ್ಷಿತ ಜಾಗದಲ್ಲಿ ಕಾಯ್ದಿರಿಸಲಾಗಿತ್ತು ಎಂದು ಶಂಕಿಸಲಾಗಿದೆ. ಈ ಫೋನ್ಗಳಲ್ಲಿ ಯಾವುದೇ ಕಾಲ್ ರೆಕಾರ್ಡ್, ಮೆಸೇಜ್ ಅಥವಾ ಸೋಶಿಯಲ್ ಮೀಡಿಯಾ ಚಾಟ್ಗಳು ಸಿಗದಿರಲು ಉಗ್ರರು ಇಂಟರ್ನೆಟ್ ಮುಕ್ತವಾದ ಅತ್ಯಾಧುನಿಕ ಲಾಂಗ್-ರೇಂಜ್ ರೇಡಿಯೋ ತಂತ್ರಜ್ಞಾನವನ್ನು ಬಳಸಿರುವುದು ಕಾರಣವಾಗಿದೆ. ಸದ್ಯ ಭಾರತೀಯ ತನಿಖಾ ಸಂಸ್ಥೆಗಳು ಕೇವಲ ಉಗ್ರರನ್ನಷ್ಟೇ ಅಲ್ಲದೆ ಪಾಕಿಸ್ತಾನದಿಂದ ಅವರಿಗೆ ತಾಂತ್ರಿಕ ಮತ್ತು ಲಾಜಿಸ್ಟಿಕ್ ನೆರವು ನೀಡುತ್ತಿರುವ ದೊಡ್ಡ ನೆಟ್ವರ್ಕ್ ಬೆನ್ನಟ್ಟಿವೆ.
ಇದನ್ನೂ ಓದಿ:ಸಿಬಿಎಸ್ಇ ವಿರುದ್ಧ ರಾಹುಲ್ ಗಾಂಧಿ ಕಿಡಿ: ತಪ್ಪು ಮಂಡಳಿಯದ್ದು, ವಿದ್ಯಾರ್ಥಿಗಳಿಗೆ ಹಣದ ದಂಡ!
