ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಸಾರ್ವಜನಿಕರನ್ನು ದಿನನಿತ್ಯ ಕಿರಿಕಿರಿಗೊಳಿಸುತ್ತಿರುವ ಭೀಕರ ವಾಹನ ದಟ್ಟಣೆ ಹಾಗೂ ನರಕಸದೃಶ ಟ್ರಾಫಿಕ್ ಸಮಸ್ಯೆಗೆ ಶಾಶ್ವತ ಮುಕ್ತಿ ನೀಡುವ ಉದ್ದೇಶದಿಂದ ಹಮ್ಮಿಕೊಳ್ಳಲಾಗಿದ್ದ ಮಹತ್ವಾಕಾಂಕ್ಷಿ ಮೇಲ್ಸೇತುವೆ (Flyover) ಯೋಜನೆಗಳಿಗೆ ಆರಂಭದಲ್ಲೇ ಭಾರೀ (Bengaluru) ವಿಘ್ನ ಎದುರಾಗಿದೆ. ನಗರದ ಸಂಚಾರ ವ್ಯವಸ್ಥೆಗೆ ಹೊಸ ರೂಪ ನೀಡಲು ಬೆಂಗಳೂರು ಸ್ಮಾರ್ಟ್ ಇನ್‌ಫ್ರಾಸ್ಟ್ರಕ್ಚರ್ ಲಿಮಿಟೆಡ್ (ಬಿ-ಸ್ಮೈಲ್) ಸಂಸ್ಥೆಯು ಆಹ್ವಾನಿಸಿದ್ದ ಸುಮಾರು ₹3,060.57 ಕೋಟಿ ಅಂದಾಜು ಮೊತ್ತದ ಒಟ್ಟು 9 ಪ್ರಮುಖ ಮೇಲ್ಸೇತುವೆಗಳ ನಿರ್ಮಾಣ ಟೆಂಡರ್ ಪ್ರಕ್ರಿಯೆಯನ್ನು ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (GBA) ಉನ್ನತ ಮಟ್ಟದ ಉಪ ಸಮಿತಿಯು ದಿಢೀರನೆ ರದ್ದುಗೊಳಿಸಿ ಆದೇಶಿಸಿದೆ.
ಟೆಂಡರ್ ರದ್ದಾಗಲು ಮುಖ್ಯ ಕಾರಣವೇನು?
ಬೆಂಗಳೂರು ನಗರದಾದ್ಯಂತ ವಾಹನಗಳ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಲು ಒಟ್ಟು 75.60 ಕಿಲೋಮೀಟರ್ ಉದ್ದದ 11 ಬೃಹತ್ ಎಲಿವೇಟೆಡ್ ಕಾರಿಡಾರ್‌ಗಳನ್ನು ನಿರ್ಮಿಸಲು ರಾಜ್ಯ ಸಚಿವ ಸಂಪುಟವು ₹13,262.70 ಕೋಟಿಗಳ ಬೃಹತ್ ಯೋಜನೆಗೆ ಅನುಮೋದನೆ ನೀಡಿತ್ತು. ಇದರ ಮೊದಲ ಹಂತವಾಗಿ ಬಿ-ಸ್ಮೈಲ್ ಸಂಸ್ಥೆಯು 9 ಮೇಲ್ಸೇತುವೆಗಳ ಕಾಮಗಾರಿಗೆ ಟೆಂಡರ್ ಪ್ರಕ್ರಿಯೆ ಆರಂಭಿಸಿತ್ತು. ಆದರೆ, ಈ ಪ್ರಕ್ರಿಯೆಯಲ್ಲಿ ಅಗತ್ಯ ತಾಂತ್ರಿಕ ಸಾಮರ್ಥ್ಯ ಹಾಗೂ ಆರ್ಥಿಕ ಅರ್ಹತೆ ಇಲ್ಲದ ಬಿಡ್‌ದಾರರಿಗೆ ನಿಯಮಬಾಹಿರವಾಗಿ ಗುತ್ತಿಗೆ ವಹಿಸಿಕೊಡಲು ತೆರೆಮರೆಯಲ್ಲಿ ಸಿದ್ಧತೆಗಳು ನಡೆದಿವೆ ಎಂಬ ಗಂಭೀರ ಆರೋಪಗಳು ಕೇಳಿಬಂದಿದ್ದವು.
ಈ ಅಕ್ರಮ ಮತ್ತು ಲೋಪದೋಷಗಳ ಕುರಿತು ಜಿಬಿಎ (GBA) ಮುಖ್ಯ ಆಯುಕ್ತರಾದ ಮಹೇಶ್ವರ್ ರಾವ್ ಅವರ ಅಧ್ಯಕ್ಷತೆಯಲ್ಲಿ ತನಿಖಾ ಸಭೆ ನಡೆಸಲಾಯಿತು. ಈ ಸಭೆಯಲ್ಲಿ ಹಣಕಾಸು ಇಲಾಖೆ ಕಾರ್ಯದರ್ಶಿ ಅಭಿರಾಮ್ ಜಿ. ಶಂಕರ್, ಜಿಬಿಎ ಆರ್ಥಿಕ ವಿಭಾಗದ ವಿಶೇಷ ಆಯುಕ್ತ ಕೆ. ನಿತೇಶ್ ಹಾಗೂ ಲೋಕೋಪಯೋಗಿ ಇಲಾಖೆ ಕಾರ್ಯದರ್ಶಿ ಕೆ. ರಾಜೇಶ್ ಒಳಗೊಂಡ ಉನ್ನತ ಮಟ್ಟದ ಉಪ ಸಮಿತಿಯು ಟೆಂಡರ್ ಷರತ್ತುಗಳ ಸ್ಪಷ್ಟ ಉಲ್ಲಂಘನೆಯನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿತು. ನಿಯಮಗಳನ್ನು ಗಾಳಿಗೆ ತೂರಿ ಕೈಗೊಂಡಿದ್ದ ಈ ಇಡೀ ಪ್ರಕ್ರಿಯೆಯನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ರದ್ದುಗೊಳಿಸಿ, ಪಾರದರ್ಶಕವಾಗಿ ಹೊಸದಾಗಿ ಮರು ಟೆಂಡರ್ ಕರೆಯಲು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
ರದ್ದುಗೊಂಡ 9 ಪ್ರಮುಖ ಮೇಲ್ಸೇತುವೆಗಳ ಸವಿಸ್ತಾರ ವಿವರ:
- ಮೈಸೂರು ರಸ್ತೆ ಕಾರಿಡಾರ್: ಸಿರ್ಸಿ ವೃತ್ತದಿಂದ ನಾಯಂಡಹಳ್ಳಿವರೆಗೆ ಹಾದುಹೋಗುವ ಬಾಲಗಂಗಾಧರನಾಥ ಸ್ವಾಮೀಜಿ ಮೇಲ್ಸೇತುವೆಯ ಎಲಿವೇಟೆಡ್ ಲೂಪ್ ಕಾಮಗಾರಿ.
- ವೆಸ್ಟ್ ಆಫ್ ಕಾರ್ಡ್ ರಸ್ತೆ – ಮಹಾಲಕ್ಷ್ಮಿ ಲೇಔಟ್: ಪೈಪ್‌ಲೈನ್ ರಸ್ತೆಯ ಮೂಲಕ ಹೊರ ವರ್ತುಲ ರಸ್ತೆಯನ್ನು ನೇರವಾಗಿ ಸಂಪರ್ಕಿಸುವ ಪ್ರಮುಖ ಕಾರಿಡಾರ್.
- ಕನಕಪುರ ರಸ್ತೆ ಲೂಪ್: ಅಡ್ಯಾರ್ ಆನಂದ ಭವನ್ (A2B) ಹೋಟೆಲ್ ಸಮೀಪದಿಂದ ರಘುವನಹಳ್ಳಿ ಕ್ರಾಸ್‌ವರೆಗೆ ಯೋಜಿಸಲಾಗಿದ್ದ ಮೇಲ್ಸೇತುವೆ.
- ಮಧ್ಯ ಬೆಂಗಳೂರು ಎಲಿವೇಟೆಡ್ ರಸ್ತೆ: ನಗರದ ಹೃದಯಭಾಗದಲ್ಲಿರುವ ಮಿನರ್ವ ವೃತ್ತದಿಂದ ಹಡ್ಸನ್ ವೃತ್ತದವರೆಗಿನ ವಾಹನ ದಟ್ಟಣೆ ನಿಯಂತ್ರಿಸುವ ಎಲಿವೇಟೆಡ್ ಕಾರಿಡಾರ್.
- ರೈಲ್ವೆ ನಿಲ್ದಾಣ ಮತ್ತು ಕೆ.ಆರ್. ವೃತ್ತ ಸಂಪರ್ಕ: ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ವೃತ್ತದಿಂದ ಕೆ.ಆರ್. ವೃತ್ತದವರೆಗೆ, ಅಂದರೆ ಆನಂದರಾವ್ ಮೇಲ್ಸೇತುವೆಯಿಂದ ನೃಪತುಂಗ ರಸ್ತೆವರೆಗಿನ ಸಂಪರ್ಕ ರಸ್ತೆ.
- ಹಳೆ ಮದ್ರಾಸ್ ರಸ್ತೆ – ಎಲೆಕ್ಟ್ರಾನಿಕ್ ಸಿಟಿ: ಹಳೆ ಮದ್ರಾಸ್ ರಸ್ತೆಯಿಂದ ಐಟಿ ಹಬ್ ಆಗಿರುವ ಎಲೆಕ್ಟ್ರಾನಿಕ್ ಸಿಟಿ ಮೇಲ್ಸೇತುವೆಯನ್ನು ಬೆಸೆಯುವ ಬೃಹತ್ ಕಾರಿಡಾರ್.
- ಉತ್ತರ ಬೆಂಗಳೂರು ಮಾರ್ಗ: ದೊಡ್ಡಬಳ್ಳಾಪುರ ರಸ್ತೆಯ ಯಲಹಂಕ ಮೂಲಕ ಕೋಗಿಲು ವೃತ್ತದವರೆಗೆ ನಿರ್ಮಿಸಲು ಉದ್ದೇಶಿಸಿದ್ದ ಮೇಲ್ಸೇತುವೆ.
- ಹೊಸೂರು ರಸ್ತೆ ಕಾರಿಡಾರ್: ಶೋಲೆ ವೃತ್ತದಿಂದ (ಶೂಲೇ ಸರ್ಕಲ್) ಸೇಂಟ್ ಜಾನ್ ಆಸ್ಪತ್ರೆ ರಸ್ತೆವರೆಗಿನ ಎಲಿವೇಟೆಡ್ ರಸ್ತೆ.
- ಕೋಣನಕುಂಟೆ ಭಾಗ: ಕನಕಪುರ ರಸ್ತೆಯ ಕೋಣನಕುಂಟೆ ಕ್ರಾಸ್ ಬಳಿ ನಿರ್ಮಿಸಲು ಉದ್ದೇಶಿಸಿದ್ದ ಮೇಲ್ಸೇತುವೆ.
ಸಾರ್ವಜನಿಕರಿಗೆ ಮುಗಿಯದ ಕಾಯುವಿಕೆ:
ಸದ್ಯ ಉನ್ನತ ಮಟ್ಟದ ಸಮಿತಿಯು ಟೆಂಡರ್ ರದ್ದುಗೊಳಿಸಿ ಮರು ಟೆಂಡರ್‌ಗೆ ಆದೇಶ ನೀಡಿರುವುದರಿಂದ, ಕಾಗದಪತ್ರಗಳ ಪ್ರಕ್ರಿಯೆ ಮುಗಿದು ಕಾಮಗಾರಿ ಆರಂಭವಾಗಲು ಇನ್ನೂ ಹಲವು ತಿಂಗಳುಗಳು ತಡವಾಗಲಿದೆ. ಇದರಿಂದಾಗಿ ರಾಜಧಾನಿಯ ವಾಹನ ಸವಾರರು ದಿನನಿತ್ಯದ ನರಕಯಾತನೆಯ ಟ್ರಾಫಿಕ್ ಕಿರಿಕಿರಿಯಿಂದ ಮುಕ್ತಿ ಪಡೆಯಲು ಮತ್ತಷ್ಟು ಕಾಲ ಕಾಯುವುದು ಅನಿವಾರ್ಯವಾಗಿದೆ.
ಇದನ್ನೂ ಓದಿ: ನೈಸ್ ಅಕ್ರಮದ ವಿರುದ್ಧ ಹೆಚ್‌ಡಿಕೆ ಆಕ್ರೋಶ: ಕೋರ್ಟ್ ಆದೇಶದಂತೆ ಟೋಲ್ ಕಟ್ಟಬೇಡಿ ಎಂದು ಕೇಂದ್ರ ಸಚಿವ ಕರೆ
