ಚೆನ್ನೈ: ತಮಿಳುನಾಡು ಮುಖ್ಯಮಂತ್ರಿ ಹಾಗೂ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ಮುಖ್ಯಸ್ಥ ದಳಪತಿ ವಿಜಯ್ (CM Vijay) ಅವರು ಶುಕ್ರವಾರ ತಮ್ಮ ಪಕ್ಷದ ಹಿರಿಯ ಶಾಸಕ ವಿ.ಎಸ್. ಬಾಬು ಅವರ ಅಂತಿಮ ಯಾತ್ರೆಯಲ್ಲಿ ಪಾಲ್ಗೊಂಡು ತೀವ್ರ ಭಾವುಕರಾದರು. ಕೊಲತ್ತೂರು ವಿಧಾನಸಭಾ ಕ್ಷೇತ್ರದ ಶಾಸಕರಾಗಿದ್ದ ವಿ.ಎಸ್. ಬಾಬು ಅವರ ಅಕಾಲಿಕ ನಿಧನದಿಂದ ದುಃಖತಪ್ತರಾಗಿದ್ದ ಸಿಎಂ ವಿಜಯ್, ತಮ್ಮ ಆಪ್ತ ಸಹೋದ್ಯೋಗಿಯ ಪಾರ್ಥಿವ ಶರೀರಕ್ಕೆ ಸ್ವತಃ ಹೆಗಲು ಕೊಡುವ ಮೂಲಕ ಅಂತಿಮ ಗೌರವ ಸಲ್ಲಿಸಿದರು. ಚೆನ್ನೈನ ಪೆರಂಬೂರಿನಲ್ಲಿರುವ ಬಾಬು ಅವರ ನಿವಾಸದಿಂದ ಅಂತಿಮ ಯಾತ್ರೆ ಆರಂಭವಾದ ಸಂದರ್ಭದಲ್ಲಿ ಈ ಹೃದಯಸ್ಪರ್ಶಿ ದೃಶ್ಯ ಕಂಡುಬಂತು.
ಚಿತಾಗಾರದವರೆಗೂ ನಡೆದುಕೊಂಡೇ ಸಾಗಿದ ಮುಖ್ಯಮಂತ್ರಿ ವಿಜಯ್
ಶೋಕದ ನಡುವೆಯೇ ಪೆರಂಬೂರಿನ ನಿವಾಸದಿಂದ ಬಾಬು ಅವರ ಪಾರ್ಥಿವ ಶರೀರವನ್ನು ಹೆಗಲ ಮೇಲೆ ಹೊತ್ತು ತಂದ ಮುಖ್ಯಮಂತ್ರಿ ವಿಜಯ್, ಅದನ್ನು ಅಂತಿಮ ಯಾತ್ರೆಯ ವಾಹನದಲ್ಲಿ ಇರಿಸಿದರು. ಅಲ್ಲಿಂದ ತಿರು ವಿ ಕಾ ನಗರದ ವಿದ್ಯುತ್ ಚಿತಾಗಾರದವರೆಗೂ ಸಾಗಿದ ಮೆರವಣಿಗೆಯಲ್ಲಿ ವಿಜಯ್ ಅವರು ಯಾವುದೇ ವಿಶೇಷ ಭದ್ರತಾ ವಾಹನವನ್ನೇರದೆ ಸಾಮಾನ್ಯರಂತೆ ನಡೆದುಕೊಂಡೇ ಸಾಗಿದರು. ದಾರಿಯುದ್ದಕ್ಕೂ ಶವವಾಹನವನ್ನು ಒಂದು ಕೈಯಲ್ಲಿ ಹಿಡಿದುಕೊಂಡು ಹೆಜ್ಜೆ ಹಾಕುವ ಮೂಲಕ ತಮ್ಮ ನೆಚ್ಚಿನ ಶಾಸಕನಿಗೆ ಭಾವಪೂರ್ಣ ವಿದಾಯ ಹೇಳಿದರು.
ಸಾವಿರಾರು ಕಾರ್ಯಕರ್ತರು ಹಾಗೂ ಗಣ್ಯರಿಂದ ಅಂತಿಮ ನಮನ
ಈ ಅಂತಿಮ ಯಾತ್ರೆಯಲ್ಲಿ ಎಂಡಿಎಂಕೆ ಪ್ರಧಾನ ಕಾರ್ಯದರ್ಶಿ, ರಾಜ್ಯ ಸಚಿವ ಸಂಪುಟದ ಸದಸ್ಯರು ಹಾಗೂ ಟಿವಿಕೆ ಪಕ್ಷದ ಇತರ ಶಾಸಕರು ಭಾಗವಹಿಸಿದ್ದರು. ಪಕ್ಷದ ಹಿರಿಯ ಪದಾಧಿಕಾರಿಗಳು ಮತ್ತು ಸಾವಿರಾರು ಸಂಖ್ಯೆಯಲ್ಲಿ ಜಮಾಯಿಸಿದ್ದ ಕಾರ್ಯಕರ್ತರು ಮುಖ್ಯಮಂತ್ರಿಗಳ ಜೊತೆ ಹೆಜ್ಜೆ ಹಾಕುತ್ತಾ ಅಗಲಿದ ನಾಯಕನಿಗೆ ಕಣ್ಣೀರ ವಿದಾಯ ಹೇಳಿದರು. ನೆಚ್ಚಿನ ಜನನಾಯಕನನ್ನು ಕಳೆದುಕೊಂಡ ದುಃಖದಲ್ಲಿ ಕ್ಷೇತ್ರದ ಜನರು ಹಾಗೂ ಕಾರ್ಯಕರ್ತರು ಶೋಕಸಾಗರದಲ್ಲಿ ಮುಳುಗಿದ್ದರು.
ಅನಾರೋಗ್ಯ ಮತ್ತು ಹೃದಯಾಘಾತದಿಂದ ನಿಧನ
ಕೊಲತ್ತೂರು ಶಾಸಕರಾಗಿದ್ದ ವಿ.ಎಸ್. ಬಾಬು ಅವರು ಕಳೆದ ಕೆಲವು ದಿನಗಳಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದರು. ಚೆನ್ನೈನ ಖಾಸಗಿ ಆಸ್ಪತ್ರೆಯಲ್ಲಿ ದಾಖಲಾಗಿ ದೀರ್ಘಕಾಲದ ಚಿಕಿತ್ಸೆ ಪಡೆಯುತ್ತಿದ್ದ ಅವರಿಗೆ ಗುರುವಾರ ದಿಢೀರ್ ಹೃದಯಾಘಾತ ಸಂಭವಿಸಿತ್ತು. ವೈದ್ಯರ ಸತತ ಪ್ರಯತ್ನದ ನಡುವೆಯೂ ಚಿಕಿತ್ಸೆ ಫಲಕಾರಿಯಾಗದೆ ಅವರು ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು. ಗುರುವಾರ ಪಾರ್ಥಿವ ಶರೀರವನ್ನು ನಿವಾಸಕ್ಕೆ ತಂದ ತಕ್ಷಣವೇ ಮುಖ್ಯಮಂತ್ರಿ ವಿಜಯ್ ಅವರು ಭೇಟಿ ನೀಡಿ ಅಂತಿಮ ದರ್ಶನ ಪಡೆದಿದ್ದರು ಹಾಗೂ ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದ್ದರು. ವಿವಿಧ ರಾಜಕೀಯ ಪಕ್ಷಗಳ ನಾಯಕರು ಕೂಡ ಬಾಬು ಅವರ ನಿಧನಕ್ಕೆ ಸಂತಾಪ ಸೂಚಿಸಿ ಅಂತಿಮ ನಮನ ಸಲ್ಲಿಸಿದ್ದಾರೆ.
ಇದನ್ನೂ ಓದಿ: ‘ಡೆಡ್ ಎಕಾನಮಿ’ ಎಂದಿದ್ದ ಟ್ರಂಪ್ ಬಾಯಲ್ಲಿ ಈಗ ಭಾರತದ ಜಪ: ಅಮೆರಿಕ ಅಧ್ಯಕ್ಷರ ಯೂ-ಟರ್ನ್ಗೆ ಅಸಲಿ ಕಾರಣವೇನು?
