ಬೆಂಗಳೂರು: ರಾಜ್ಯದಲ್ಲಿ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಈಗಾಗಲೇ ತತ್ತರಿಸಿರುವ ಸಾರ್ವಜನಿಕರಿಗೆ ಇದೀಗ ಮತ್ತೊಂದು ಭಾರಿ ಆಘಾತ ಎದುರಾಗಿದೆ. ಕನ್ನಡಿಗರ ನಿತ್ಯದ ಆಹಾರದ ಮುಖ್ಯ ಭಾಗವಾಗಿರುವ ಅಕ್ಕಿಯ ದರವು (Rice Price) ಹಠಾತ್ತನೆ ಗಗನಕ್ಕೇರಿದ್ದು, ಸಾಮಾನ್ಯ ಹಾಗೂ ಮಧ್ಯಮ ವರ್ಗದ ಗ್ರಾಹಕರ ಜೇಬಿಗೆ ದೊಡ್ಡ ಕತ್ತರಿ ಬಿದ್ದಿದೆ. ಕಳೆದ ಕೇವಲ ಒಂದು ತಿಂಗಳ ಅವಧಿಯಲ್ಲಿ ಸತತವಾಗಿ ಎರಡನೇ ಬಾರಿಗೆ ಅಕ್ಕಿ ಬೆಲೆ ಹೆಚ್ಚಳವಾಗಿದ್ದು, ಕಳೆದೊಂದು ವಾರದಿಂದಿಚೆಗೆ ಮಾರುಕಟ್ಟೆಯಲ್ಲಿ ದರ ಏರಿಕೆಯ ಪರ್ವ ಮುಂದುವರಿದಿದೆ.
100 ರೂಪಾಯಿಗೆ ಏರಿದ ಅಕ್ಕಿ ಬೆಲೆ
ವಿವಿಧ ತಳಿಯ ಅಕ್ಕಿಗಳ ಪೈಕಿ ಕೋಲಂ ತಳಿಯ ಅಕ್ಕಿ ಬೆಲೆಯಲ್ಲಿ ಭಾರಿ ಜಿಗಿತ ಕಂಡುಬಂದಿದ್ದು, ಈ ಹಿಂದೆ ಕೆಜಿಗೆ 75 ರೂಪಾಯಿ ಇದ್ದ ದರವು ಇದೀಗ ಬೊಬ್ಬೆ ಹೊಡೆಯುವಂತೆ 100 ರೂಪಾಯಿಗೆ ತಲುಪಿದೆ. ಅದೇ ರೀತಿ, ಮನೆಗಳಲ್ಲಿ ದಿನನಿತ್ಯ ವ್ಯಾಪಕವಾಗಿ ಬಳಸುವ ಸೋನಾಮಸೂರಿ ಅಕ್ಕಿ ಬೆಲೆಯು 68 ರೂಪಾಯಿಯಿಂದ 82 ರೂಪಾಯಿಗೆ ಏರಿಕೆಯಾಗಿದ್ದರೆ, ಸ್ಟೀಮ್ ಅಕ್ಕಿ ದರ 68 ರೂಪಾಯಿಯಿಂದ 75 ರೂಪಾಯಿಗೆ ಏರಿದೆ. ಪ್ರೀಮಿಯಂ ತಳಿಯಾದ ಜೀರಾ ಸಾಂಬ ಅಕ್ಕಿಯ ಬೆಲೆಯು ಕೇವಲ ನಾಲ್ಕು ದಿನಗಳ ಅವಧಿಯಲ್ಲಿ ಕೆಜಿಗೆ 180 ರೂಪಾಯಿಯಿಂದ ನೇರವಾಗಿ 200 ರೂಪಾಯಿಯ ಗಡಿ ದಾಟಿದೆ. ಚಿಲ್ಲರೆ ಮಾರುಕಟ್ಟೆ ಮಾತ್ರವಲ್ಲದೆ ಸಗಟು ಮಾರುಕಟ್ಟೆಯಲ್ಲೂ ಅಕ್ಕಿ ಚೀಲ ಹಾಗೂ ಕ್ವಿಂಟಲ್ ದರದಲ್ಲಿ ಭಾರಿ ಪ್ರಮಾಣದ ವ್ಯತ್ಯಾಸ ಕಂಡುಬಂದಿದೆ.
ಮಳೆಯ ಕೊರತೆಯೇ ಕಾರಣ?
ಹಿಂಗಾರು ಮತ್ತು ಮುಂಗಾರು ಹಂಗಾಮಿನಲ್ಲಿ ಎದುರಾದ ತೀವ್ರ ಮಳೆ ಕೊರತೆ, ಜಲಾಶಯಗಳಲ್ಲಿ ನೀರಿನ ಅಭಾವ ಹಾಗೂ ಬೆಳೆಗಳಿಗೆ ಸರಿಯಾದ ಸಮಯಕ್ಕೆ ನೀರು ಸಿಗದೆ ಇರುವುದು ಈ ಬೆಲೆ ಏರಿಕೆಗೆ ಮುಖ್ಯ ಕಾರಣವಾಗಿದೆ. ಸೂಕ್ತ ಪ್ರಮಾಣದಲ್ಲಿ ಬೆಳೆ ಕಟಾವಿಗೆ ಬಾರದೆ ಇರುವುದರಿಂದ ಮಾರುಕಟ್ಟೆಗೆ ಅಕ್ಕಿ ಪೂರೈಕೆಯಲ್ಲಿ ಭಾರಿ ಕುಸಿತ ಉಂಟಾಗಿದೆ ಎಂದು ಧಾನ್ಯ ವರ್ತಕರು ಸ್ಪಷ್ಟಪಡಿಸಿದ್ದಾರೆ. ಸೆಪ್ಟೆಂಬರ್ ಮಧ್ಯಭಾಗದಲ್ಲಷ್ಟೇ ಅಕ್ಕಿ ದರದಲ್ಲಿ ಸಣ್ಣ ಪ್ರಮಾಣದ ಏರಿಕೆಯಾಗಿತ್ತು. ಆದರೆ ಪೂರೈಕೆ ಕೊರತೆ ತೀವ್ರವಾಗಿರುವುದರಿಂದ ಮುಂಬರುವ ದಿನಗಳಲ್ಲಿ ಅಕ್ಕಿ ಬೆಲೆ ಇನ್ನಷ್ಟು ಏರಿಕೆಯಾಗುವ ಭೀತಿ ವ್ಯಕ್ತವಾಗಿದ್ದು, ಗ್ರಾಹಕರು ಕಂಗಾಲಾಗಿದ್ದಾರೆ.
ಇದನ್ನೂ ಓದಿ: ಕಸ್ತೂರಿರಂಗನ್ ವರದಿ ಜಾರಿ ಕುರಿತು ನಾಳೆಯಿಂದ ವಿಶೇಷ ಅಧಿವೇಶನ: ಸಿಎಂ ಡಿ.ಕೆ. ಶಿವಕುಮಾರ್ ಹೇಳಿಕೆ!
