ಬೆಂಗಳೂರು: ಕರ್ನಾಟಕ ಸರ್ಕಾರವು ಸಾರ್ವಜನಿಕರಿಗೆ ಮತ್ತೊಂದು ದೊಡ್ಡ ಆರ್ಥಿಕ ಹೊರೆಯನ್ನು ನೀಡಿದೆ. ಕೆಎಸ್‌ಆರ್‌ಟಿಸಿ (KSRTC) ಮತ್ತು ಬಿಎಂಟಿಸಿ (BMTC) ಸೇರಿದಂತೆ ರಾಜ್ಯದ ನಾಲ್ಕೂ ರಸ್ತೆ (BMTC) ಸಾರಿಗೆ ನಿಗಮಗಳ ಬಸ್ ಪ್ರಯಾಣ ದರವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಳ ಮಾಡಿ ಸರ್ಕಾರ ಆದೇಶ ಹೊರಡಿಸಿದೆ. ಸಾರಿಗೆ ಸಚಿವ ಬೈರತಿ ಸುರೇಶ್ ಅವರು ಈ ದರ ಏರಿಕೆಯನ್ನು ಪ್ರಕಟಿಸಿದ್ದು, ನವೆಂಬರ್ 4, 2026ರ ಮಧ್ಯರಾತ್ರಿಯಿಂದಲೇ ನೂತನ ದರಗಳು ರಾಜ್ಯಾದ್ಯಂತ ಜಾರಿಗೆ ಬಂದಿವೆ. ದಿನನಿತ್ಯ ಬಸ್ ಆಶ್ರಯಿಸಿರುವ ಪ್ರಯಾಣಿಕರು ಬೆಳಿಗ್ಗೆ ಟಿಕೆಟ್ ದರ ನೋಡಿ ಸರ್ಕಾರದ ನಿರ್ಧಾರದ ವಿರುದ್ಧೀವ್ರ ಆಕ್ರೋಶ ಹೊರಹಾಕಿದ್ದಾರೆ.
ಈ ಪರಿಷ್ಕರಣೆಯ ಪ್ರಕಾರ ಕೆಎಸ್‌ಆರ್‌ಟಿಸಿ ಪ್ರಯಾಣ ದರದಲ್ಲಿ ಸರಾಸರಿ ಶೇಕಡಾ 23 ರಷ್ಟು ಹಾಗೂ ಬಿಎಂಟಿಸಿ ಬಸ್ ದರದಲ್ಲಿ ಶೇಕಡಾ 25 ರಿಂದ 33 ರಷ್ಟು ಏರಿಕೆಯಾಗಿದೆ. ಟಿಕೆಟ್ ದರಗಳ ಜೊತೆಗೆ ದಿನದ ಪಾಸ್, ವಾರದ ಪಾಸ್ ಹಾಗೂ ಮಾಸಿಕ ಪಾಸ್‌ಗಳ ಬೆಲೆಯನ್ನೂ ಹೆಚ್ಚಿಸಲಾಗಿದೆ.
ಬಿಎಂಟಿಸಿ ಬಸ್ ಹಾಗೂ ಪಾಸ್ ಪರಿಷ್ಕೃತ ದರಗಳ ವಿವರ
ಬೆಂಗಳೂರು ನಗರದಲ್ಲಿ ಸಂಚರಿಸುವ ಬಿಎಂಟಿಸಿ ಬಸ್‌ಗಳ ದರದಲ್ಲಿ ಗಣನೀಯ ಏರಿಕೆಯಾಗಿದೆ. 1 ಸ್ಟೇಜ್‌ಗೆ ಇದ್ದ ಕನಿಷ್ಠ 6 ರೂಪಾಯಿ ದರವನ್ನು ಈಗ 10 ರೂಪಾಯಿಗೆ ಹೆಚ್ಚಿಸಲಾಗಿದೆ.
- ಸಾಮಾನ್ಯ ಬಸ್‌ಗಳು: ಕನಿಷ್ಠ ಟಿಕೆಟ್ ದರ 6 ರೂಪಾಯಿಯಿಂದ 10 ರೂಪಾಯಿಗೆ ಹಾಗೂ ಗರಿಷ್ಠ ದರ 35 ರೂಪಾಯಿಯಿಂದ 45 ರೂಪಾಯಿಗೆ ಏರಿಕೆಯಾಗಿದೆ.
- ಪಾಸ್ ದರ ಏರಿಕೆ: ಈ ಹಿಂದೆ 80 ರೂಪಾಯಿ ಇದ್ದ ಬಿಎಂಟಿಸಿ ದಿನದ ಪಾಸ್ (Daily Pass) ದರ ಈಗ 100 ರೂಪಾಯಿಗೆ ತಲುಪಿದ್ದು, ಒಂದೇ ಬಾರಿಗೆ 20 ರೂಪಾಯಿ ಹೆಚ್ಚಳ ಮಾಡಲಾಗಿದೆ.
- ವಜ್ರ ಮತ್ತು ವಾಯು ವಜ್ರ ಬಸ್‌ಗಳು: ಎಸಿ ವಜ್ರ ಬಸ್‌ಗಳ ಗರಿಷ್ಠ ದರ 75 ರೂಪಾಯಿಯಿಂದ 90 ರೂಪಾಯಿಗೆ ಏರಿದೆ. ಇನ್ನು ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಚರಿಸುವ ವಾಯುವಜ್ರ ಬಸ್‌ಗಳ ಗರಿಷ್ಠ ದರ 405 ರೂಪಾಯಿಯಿಂದ 425 ರೂಪಾಯಿಗೆ ಅಂದರೆ 20 ರೂಪಾಯಿ ಹೆಚ್ಚಾಗಿದೆ.
- ಬೆಂಗಳೂರು ಸುತ್ತಮುತ್ತಲಿನ ಸಂಚಾರ: ಬೆಂಗಳೂರಿನಿಂದ ನೆಲಮಂಗಲ ಅಥವಾ ಹೊಸಕೋಟೆಗೆ 35 ರೂಪಾಯಿ ಇದ್ದ ದರ 44 ರೂಪಾಯಿಗೆ, ದೊಡ್ಡಬಳ್ಳಾಪುರ ಅಥವಾ ಆನೇಕಲ್‌ಗೆ 38 ರೂಪಾಯಿ ಇದ್ದ ದರ 47 ರೂಪಾಯಿಗೆ ಹಾಗೂ ಮಾಗಡಿ ಅಥವಾ ಮಾಲೂರು ಮಾರ್ಗದ ದರ 46 ರೂಪಾಯಿಯಿಂದ 57 ರೂಪಾಯಿಗೆ ಏರಿಕೆಯಾಗಿದೆ.
ಕೆಎಸ್‌ಆರ್‌ಟಿಸಿ ಎಕ್ಸ್‌ಪ್ರೆಸ್ ಬಸ್‌ಗಳ ಹೊಸ ದರ ಪಟ್ಟಿ
ರಾಜಧಾನಿ ಬೆಂಗಳೂರಿನಿಂದ ವಿವಿಧ ಜಿಲ್ಲೆಗಳಿಗೆ ಸಂಚರಿಸುವ ಕೆಎಸ್‌ಆರ್‌ಟಿಸಿ ಎಕ್ಸ್‌ಪ್ರೆಸ್ ಬಸ್‌ಗಳ ಪ್ರಯಾಣ ದರದಲ್ಲೂ ದೊಡ್ಡ ಮಟ್ಟದ ಜಂಪ್ ಕಂಡುಬಂದಿದೆ.
- ಬೆಂಗಳೂರು – ಕೋಲಾರ / ತುಮಕೂರು: 81 ರೂಪಾಯಿಯಿಂದ 100 ರೂಪಾಯಿಗೆ ಹೆಚ್ಚಳ.
- ಬೆಂಗಳೂರು – ಮಂಡ್ಯ: 110 ರೂಪಾಯಿಯಿಂದ 136 ರೂಪಾಯಿಗೆ ಏರಿಕೆ.
- ಬೆಂಗಳೂರು – ಮೈಸೂರು: 160 ರೂಪಾಯಿಯಿಂದ 197 ರೂಪಾಯಿಗೆ ಹೆಚ್ಚಳ.
- ಬೆಂಗಳೂರು – ಹಾಸನ: 219 ರೂಪಾಯಿಯಿಂದ 270 ರೂಪಾಯಿಗೆ ಏರಿಕೆ.
- ಬೆಂಗಳೂರು – ಚಿಕ್ಕಮಗಳೂರು: 295 ರೂಪಾಯಿಯಿಂದ 363 ರೂಪಾಯಿಗೆ ಪರಿಷ್ಕರಣೆ.
ಇಂದಿನಿಂದಲೇ ಬಸ್ ಕಂಡಕ್ಟರ್‌ಗಳು ಈ ನೂತನ ಪರಿಷ್ಕೃತ ದರದ ಆಧಾರದ ಮೇಲೆಯೇ ಪ್ರಯಾಣಿಕರಿಗೆ ಟಿಕೆಟ್ ವಿತರಿಸುತ್ತಿದ್ದು, ದರ ಏರಿಕೆಯಿಂದಾಗಿ ಸಾರ್ವಜನಿಕರು ಹಾಗೂ ಸಾರಿಗೆ ಸಿಬ್ಬಂದಿ ನಡುವೆ ಅಲ್ಲಲ್ಲಿ ವಾಗ್ವಾದಗಳು ನಡೆಯುತ್ತಿವೆ.
ಇದನ್ನೂ ಓದಿ: ಸಾರಿಗೆ ಬಸ್ ದರ ಭಾರಿ ಏರಿಕೆ: ಕೆಎಸ್‌ಆರ್‌ಟಿಸಿ ಶೇ 23, ಬಿಎಂಟಿಸಿ ಶೇ 35ರಷ್ಟು ಟಿಕೆಟ್ ದರ ಹೆಚ್ಚಳ!
