ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ (Bengaluru Rain) ಶುಕ್ರವಾರ ಬಿದ್ದ ಸಣ್ಣ ಮಳೆಯೂ ಸಹ ನಗರದ ಮೂಲಸೌಕರ್ಯದ ಅಸಲಿ ಮುಖವಾಡವನ್ನು ಮತ್ತೊಮ್ಮೆ ಕಳಚಿಹಾಕಿದೆ. ಪ್ರಮುಖವಾಗಿ ಹೊರ ವರ್ತುಲ ರಸ್ತೆಗೆ (ORR) ಕೇವಲ ಎರಡು ಕಿಲೋಮೀಟರ್ ದೂರದಲ್ಲಿರುವ ಪಣತೂರು ರೈಲ್ವೆ ಅಂಡರ್ಬ್ರಿಡ್ಜ್ (RUB) ಬಳಿ ಮಳೆ ನೀರು ಹೆದ್ದಾರಿಯಂತೆ ತುಂಬಿಕೊಂಡಿದ್ದು, ರಸ್ತೆಯಲ್ಲಿ ಸಂಚರಿಸುವ ಕಾರುಗಳು ದೋಣಿಗಳಂತೆ ತಲಬುಡವಿಲ್ಲದೆ ತಲಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಗೂಗಲ್, ಇಂಟೆಲ್, ಸಿಸ್ಕೋ, ಅಮೆಜಾನ್ ಮತ್ತು ಸ್ಯಾಂಡಿಸ್ಕ್‌ನಂತಹ ಜಾಗತಿಕ ದೈತ್ಯ ಐಟಿ ಕಂಪನಿಗಳ ಕಾರ್ಪೊರೇಟ್ ಕಚೇರಿಗಳು ಇರುವ ಪ್ರದೇಶದಲ್ಲೇ ಈ ದುಸ್ಥಿತಿ ಎದುರಾಗಿರುವುದು ಉದ್ಯೋಗಿಗಳು ಹಾಗೂ ಸ್ಥಳೀಯ ವಾಹನ ಸವಾರರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಮಳೆಯ ನೀರಿನಿಂದ ತುಂಬಿದ ಪಣತೂರು ಅಂಡರ್ಪಾಸ್
ಪ್ರತಿದಿನ ಸಾವಿರಾರು ಸಾಫ್ಟ್‌ವೇರ್ ಉದ್ಯೋಗಿಗಳು ಹಾಗೂ ಸಾರ್ವಜನಿಕರು ಸಂಚರಿಸುವ ಈ ಪಣತೂರು ಅಂಡರ್‌ಪಾಸ್‌ನಲ್ಲಿ ದಶಕಗಳಿಂದಲೂ ಮಳೆ ನೀರಿನ ಬಿಕಟ್ಟು ಮುಂದುವರಿಯುತ್ತಲೇ ಇದೆ. ಸ್ವಲ್ಪ ಮಳೆಯಾದರೂ ಸಾಕು, ಇಲ್ಲಿ ಅಂಡರ್ಪಾಸ್ ಸಂಪೂರ್ಣವಾಗಿ ಜಲಾವೃತಗೊಂಡು ಸಂಚಾರ ಸಂಪೂರ್ಣವಾಗಿ ಕಡಿತಗೊಳ್ಳುತ್ತದೆ. ಈ ಸಮಸ್ಯೆಯನ್ನು ಶಾಶ್ವತವಾಗಿ ಪರಿಹರಿಸಲು ಸೂಕ್ತವಾದ ರೈಲ್ವೆ ಅಂಡರ್ಬ್ರಿಡ್ಜ್ ನಿರ್ಮಿಸುವಲ್ಲಿ ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರ ಹಾಗೂ ಪ್ರಮುಖವಾಗಿ ನೈರುತ್ಯ ರೈಲ್ವೆ (SWR) ಮತ್ತು ಗ್ರೇಟರ್ ಬೆಂಗಳೂರು ಪ್ರಾಧಿಕಾರಗಳು (GBA) ಸತತವಾಗಿ ವಿಫಲವಾಗಿವೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಕಳೆದ ಒಂದು ದಶಕದಿಂದಲೂ ಭರವಸೆಗಳನ್ನೇ ನೀಡಲಾಗುತ್ತಿದೆಯೇ ಹೊರತು, ಎಲ್ಲ ರೀತಿಯ ವಾತಾವರಣಕ್ಕೂ ಸೂಕ್ತವಾಗುವ ಸುಸಜ್ಜಿತ ರಸ್ತೆ ಸೇತುವೆಯನ್ನು ನಿರ್ಮಿಸಲು ಆಡಳಿತ ವ್ಯವಸ್ಥೆಗೆ ಸಾಧ್ಯವಾಗಿಲ್ಲ.
🚗➡️🚤 Cars turning into boats to survive #PanathurRUB after today’s rain! 🌧️ Commuters, plan your journey accordingly! Just 2 km from #ORR, home to corporate offices of @intel, @Google, @Cisco, @amazon & @SanDiskJP, this is the state of basic infrastructure in Bengaluru’s IT hub! Even after a decade, the Centre, State Govt & especially @SWRRLY @GBA_office have failed to deliver a Railway Underbridge (RUB) that works in all weather conditions. Bengaluru deserves better! Looks like #Roadster has some serious competition now! 🚤 #PanathurRUB #BengaluruTraffic #InfrastructureFailure
— Namma Balagere. (@BalagereConnect) October 16, 2026
ಸೋಷಿಯಲ್‌ ಮೀಡಿಯಾದಲ್ಲಿ ವಿಡಿಯೋ ವೈರಲ್
ಸಾಮಾಜಿಕ ಜಾಲತಾಣಗಳಲ್ಲಿ ಈ ದೃಶ್ಯಗಳ ವೀಡಿಯೋಗಳು ಜಾಲತಾಣಿಗರ ಗಮನ ಸೆಳೆಯುತ್ತಿದ್ದು, ‘ಈಗ ರೋಡ್‌ಸ್ಟರ್‌ ಕಾರುಗಳಿಗೆ ದೋಣಿಗಳೇ ನಿಜವಾದ ಸ್ಪರ್ಧಿಗಳಾಗಿವೆ’ ಎಂದು ಜನರು ವ್ಯಂಗ್ಯವಾಡುತ್ತಿದ್ದಾರೆ. ಕೋಟ್ಯಂತರ ರೂಪಾಯಿ ತೆರಿಗೆ ಪಾವತಿಸುವ ಐಟಿ ಕಾರಿಡಾರ್‌ನಲ್ಲಿ ಇಂತಹ ಕನಿಷ್ಠ ಮೂಲಸೌಕರ್ಯವೂ ಇಲ್ಲದಿರುವುದು ದೇಶದ ತಂತ್ರಜ್ಞಾನ ರಾಜಧಾನಿಗೆ ಬಹುದೊಡ್ಡ ಕಪ್ಪುಚುಕ್ಕೆಯಾಗಿದೆ. ಮಳೆಯಿಂದಾಗಿ ಸಂಚಾರ ದಟ್ಟಣೆ ಹೆಚ್ಚಾಗಿದ್ದು, ಈ ಮಾರ್ಗದಲ್ಲಿ ಸಂಚರಿಸುವ ಪ್ರಯಾಣಿಕರು ಪರ್ಯಾಯ ರಸ್ತೆಗಳನ್ನು ಬಳಸಲು ಮತ್ತು ತಮ್ಮ ಪ್ರಯಾಣವನ್ನು ಮುಂಚಿತವಾಗಿಯೇ ಯೋಜಿಸಿಕೊಳ್ಳಲು ಸೂಚಿಸಲಾಗಿದೆ. ‘ಬೆಂಗಳೂರಿಗೆ ಮತ್ತು ಇಲ್ಲಿನ ನಾಗರಿಕರಿಗೆ ಇದಕ್ಕಿಂತ ಉತ್ತಮವಾದ ಮೂಲಸೌಕರ್ಯ ಸಿಗಬೇಕಿದೆ’ ಎಂದು ಸಾರ್ವಜನಿಕರು ಆಡಳಿತ ವ್ಯವಸ್ಥೆಯ ವಿರುದ್ಧ ಕೆಂಡಕಾರುತ್ತಿದ್ದಾರೆ.
ಇದನ್ನೂ ಓದಿ: ಅಕ್ಟೋಬರ್ 17ಕ್ಕೆ ತಲಕಾವೇರಿ ತೀರ್ಥೋದ್ಭವ: ರಾತ್ರಿ 7:50 ಕ್ಕೆ ಪುಣ್ಯ ತೀರ್ಥ ಪ್ರಸಾದ, ಕೊಡಗಿನಲ್ಲಿ ಭಕ್ತಸಾಗರ!
