ಬ್ರೆಜಿಲ್ (Brazil) ದೇಶದ ಆರ್ಥಿಕತೆಯು ಇತ್ತೀಚಿನ ವರ್ಷಗಳಲ್ಲಿ ನಿರೀಕ್ಷೆಗಿಂತ ಉತ್ತಮ ಪ್ರಗತಿ ಸಾಧಿಸಿದ್ದರೂ ಸಹ, ನಿರಂತರವಾಗಿ ಹೆಚ್ಚುತ್ತಿರುವ ಸಾರ್ವಜನಿಕ ಸಾಲ ಮತ್ತು ದೇಶದ ಆಳವಾದ ರಚನಾತ್ಮಕ ಸಮಸ್ಯೆಗಳು ಮುಂಬರುವ ದಿನಗಳಲ್ಲಿ ತೀವ್ರ ಬಿಕ್ಕಟ್ಟನ್ನು ತಂದೊಡ್ಡುವ ಸಾಧ್ಯತೆಯಿದೆ. ಮುಂದಿನ ಜನವರಿಯಿಂದ ಆರಂಭವಾಗಲಿರುವ ಎಡಪಂಥೀಯ ಅಧ್ಯಕ್ಷ ಲೂಯಿಜ್ ಇನಾಸಿಯೊ ಲೂಲಾ ಡ ಸಿಲ್ವಾ ಅವರ ನಾಲ್ಕನೇ ಅವಧಿಯ ಆಡಳಿತಕ್ಕೆ ಈ ಆರ್ಥಿಕ ಬಿಕ್ಕಟ್ಟುಗಳು ದೊಡ್ಡ ಸವಾಲಾಗಿ ಪರಿಣಮಿಸಲಿವೆ. ಶೇಕಡಾ 82ಕ್ಕೂ ಮೀರಿದ ಸಾರ್ವಜನಿಕ ಸಾಲ, ಹಣದುಬ್ಬರ ಮತ್ತು ರಾಜಕೀಯ ಹಿನ್ನಡೆಗಳ ನಡುವೆ ಬ್ರೆಜಿಲ್ ಆರ್ಥಿಕತೆಯನ್ನು ಸರಿದೂಗಿಸಲು ಲೂಲಾ ಸರ್ಕಾರ ಎದುರಿಸಬೇಕಾದ ಪ್ರಮುಖ 5 ಸವಾಲುಗಳ ಸವಿಸ್ತಾರ ವರದಿ ಇಲ್ಲಿದೆ.
ಗಗನಕ್ಕೇರುತ್ತಿರುವ ಸಾರ್ವಜನಿಕ ಸಾಲ ಮತ್ತು ಬಡ್ಡಿ ದರದ ಬಿಸಿ
ಲೂಲಾ ಅವರ ಪ್ರಸ್ತುತ ಆಡಳಿತಾವಧಿಯಲ್ಲಿ ಬ್ರೆಜಿಲ್‌ನ ಸಾರ್ವಜನಿಕ ಸಾಲವು ಜಿಡಿಪಿಯ ಶೇಕಡಾ 82ಕ್ಕಿಂತಲೂ ಹೆಚ್ಚಾಗಿದ್ದು, ಸಾಲದ ಪ್ರಮಾಣದಲ್ಲಿ ಶೇಕಡಾ 10ಕ್ಕಿಂತ ಹೆಚ್ಚಿನ ಏರಿಕೆ ಕಂಡುಬಂದಿದೆ. ಸರ್ಕಾರದ ಕಡ್ಡಾಯ ವೆಚ್ಚಗಳು ಹೆಚ್ಚಾಗುತ್ತಿರುವುದರಿಂದ ಬಜೆಟ್ ಅನ್ನು ಹೊಂದಿಸುವುದು ಸವಾಲಾಗಿದೆ. ಇತ್ತ ದೇಶದ ಕೇಂದ್ರೀಯ ಬ್ಯಾಂಕ್ ಬಡ್ಡಿ ದರವನ್ನು ಶೇಕಡಾ 13.75 ರಷ್ಟಿರಿಸಿದ್ದರೂ, ಹಣದುಬ್ಬರವು ಶೇಕಡಾ 4.6 ರಲ್ಲಿ ಮುಂದುವರಿದಿದೆ. ಬ್ಯಾಂಕ್ ಆಫ್ ಬ್ರೆಜಿಲ್ ಬಡ್ಡಿ ದರಗಳನ್ನು ಇಳಿಸಲು ಪ್ರಯತ್ನಿಸುತ್ತಿದೆಯಾದರೂ, 2029 ರ ವೇಳೆಗೆ ಹಣದುಬ್ಬರ ನಿಯಂತ್ರಣಕ್ಕೆ ಬರುವುದು ಕಷ್ಟ ಎಂಬುದು ಆರ್ಥಿಕ ತಜ್ಞರ ಅಭಿಪ್ರಾಯವಾಗಿದೆ. ಕನಿಷ್ಠ ವೇತನ ಏರಿಕೆ ಮತ್ತು ಸಾಮಾಜಿಕ ಯೋಜನೆಗಳ ವೆಚ್ಚ ಹೆಚ್ಚಾಗುತ್ತಿರುವುದು ಸಾಲದ ಹೊರೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
ಸಾಲದ ಸುಳಿಯಲ್ಲಿ ಜನಸಾಮಾನ್ಯರು, ಉದ್ಯಮಿಗಳು ಹಾಗೂ ರಾಜಕೀಯ ಸವಾಲು
ಕ್ರೆಡಿಟ್ ಬ್ಯೂರೋ ಸೆರಾಸಾ ನೀಡಿದ ವರದಿಯ ಪ್ರಕಾರ, ಬ್ರೆಜಿಲ್‌ನಲ್ಲಿ ಬರೋಬ್ಬರಿ 8.4 ಕೋಟಿ ನಾಗರಿಕರು ಮತ್ತು 93 ಲಕ್ಷ ಸಣ್ಣ ಉದ್ಯಮಗಳು ಸಾಲ ಮರುಪಾವತಿ ಮಾಡಲಾಗದೆ ಬಾಕಿ ಉಳಿಸಿಕೊಂಡಿದ್ದಾರೆ. ನಿರುದ್ಯೋಗ ದರ ಕಡಿಮೆಯಾಗಿದ್ದರೂ ಸಹ, ಹೆಚ್ಚಿನ ಬಡ್ಡಿ ದರದಿಂದಾಗಿ ಸಾರ್ವಜನಿಕರಲ್ಲಿ ಅಸಮಾಧಾನ ಹೊಗೆಯಾಡುತ್ತಿದೆ. ಇದಲ್ಲದೆ, ಇತ್ತೀಚೆಗೆ ನಡೆದ ಚುನಾವಣೆಯಲ್ಲಿ ಬ್ರೆಜಿಲ್ ಸಂಸತ್ತಿಗೆ ಅತ್ಯಂತ ಕನ್ಸರ್ವೇಟಿವ್ ಮತ್ತು ಬಲಪಂಥೀಯ ಜನಪ್ರತಿನಿಧಿಗಳು ಆಯ್ಕೆಯಾಗಿದ್ದಾರೆ. ಲೂಲಾ ಅವರು ಅಧ್ಯಕ್ಷೀಯ ಚುನಾವಣೆಯಲ್ಲಿ ಫ್ಲಾವಿಯೋ ಬೊಲ್ಸೊನಾರೊ ಅವರನ್ನು ಸೋಲಿಸಿದ್ದರೂ, ಸಂಸತ್ತಿನ ಎರಡೂ ಸದನಗಳಲ್ಲಿ ಬೊಲ್ಸೊನಾರೊ ಅವರ ಲಿಬರಲ್ ಪಾರ್ಟಿ ಪ್ರಬಲ ನಿಯಂತ್ರಣ ಹೊಂದಿದೆ. ಇದರಿಂದಾಗಿ ಹೊಸ ಆರ್ಥಿಕ ಸುಧಾರಣೆಗಳನ್ನು ಜಾರಿಗೆ ತರಲು ಲೂಲಾ ಅವರಿಗೆ ರಾಜಕೀಯ ಬೆಂಬಲ ಸಿಗುವುದು ಕಷ್ಟಕರವಾಗಿದೆ.
ಹೊಸ ತೆರಿಗೆ ಸುಧಾರಣೆ ಮತ್ತು ಜಿಎಸ್‌ಟಿ ಗೊಂದಲಗಳು
ಜನವರಿಯಿಂದ ಬ್ರೆಜಿಲ್‌ನಲ್ಲಿ ಹೊಸ ಮೌಲ್ಯವರ್ಧಿತ ತೆರಿಗೆ (VAT) ಜಾರಿಗೆ ಬರಲಿದ್ದು, ಪ್ರಸ್ತುತ ಇರುವ ಬಳಕೆ ತೆರಿಗೆ ವ್ಯವಸ್ಥೆಯನ್ನು ಸಂಪೂರ್ಣವಾಗಿ ಬದಲಾಯಿಸಲು ಸರ್ಕಾರ ನಿರ್ಧರಿಸಿದೆ. ಆದರೆ, ಹೊಸ ತೆರಿಗೆ ದರ ಎಷ್ಟು ಇರಲಿದೆ ಎಂಬುದನ್ನು ಸರ್ಕಾರ ಇನ್ನೂ ಅಧಿಕೃತವಾಗಿ ಪ್ರಕಟಿಸಿಲ್ಲ. ತಜ್ಞರ ಅಂದಾಜಿನ ಪ್ರಕಾರ ಈ ದರವು ಶೇಕಡಾ 28ರಷ್ಟಿರಬಹುದು ಎಂದು ಹೇಳಲಾಗುತ್ತಿದೆ. ಇದರೊಂದಿಗೆ ಧೂಮಪಾನ ಮತ್ತು ಮದ್ಯಪಾನದಂತಹ ಆರೋಗ್ಯ ಹಾಗೂ ಪರಿಸರಕ್ಕೆ ಹಾನಿಕಾರಕ ಉತ್ಪನ್ನಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸುವ ಮಸೂದೆಯನ್ನು ಸಂಸತ್ತಿಗೆ ಸಲ್ಲಿಸಲು ಸರ್ಕಾರ ವಿಳಂಬ ಮಾಡುತ್ತಿದೆ. ಈ ಎಲ್ಲಾ ಅನಿಶ್ಚಿತತೆಗಳು ಬ್ರೆಜಿಲ್ ಆರ್ಥಿಕತೆಯ ಚೇತರಿಕೆಗೆ ದೊಡ್ಡ ತಡೆಯಾಗಿ ನಿಂತಿವೆ.
ಇದನ್ನೂ ಓದಿ: ರಾಹುಲ್ ಗಾಂಧಿ ಕೇಸ್: ಕೋರ್ಟ್‌ನಲ್ಲಿ ಸುದ್ದಿ ಮಾಡಲು ಬಂದ ವಕೀಲರಿಗೆ ಸಿಜೆಐ ಸೂರ್ಯ ಕಾಂತ್ ಖಡಕ್ ಕ್ಲಾಸ್!
