ಮುಂಬೈ: ಬಾಲಿವುಡ್‌ನ (Bollywood) ಬಹುನಿರೀಕ್ಷಿತ ‘ರಾಮಾಯಣ್ ಪಾರ್ಟ್ 1’ ಚಿತ್ರದ ಸಂಗೀತಕ್ಕೆ ಸಂಬಂಧಿಸಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹಾಗೂ ಮಾಧ್ಯಮಗಳಲ್ಲಿ ಭಾರಿ ಚರ್ಚೆಗಳು ನಡೆಯುತ್ತಿವೆ. ಭಾರತದ ಖ್ಯಾತ ಸಂಗೀತ ನಿರ್ದೇಶಕ ಎ.ಆರ್. ರಹಮಾನ್ ಹಾಗೂ ಹಾಲಿವುಡ್‌ನ ದಿಗ್ಗಜ ಸಂಗೀತ ಸಂಯೋಜಕ ಹ್ಯಾನ್ಸ್ ಝಿಮ್ಮರ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿರುವ ಈ ಚಿತ್ರದ ಹಾಡುಗಳ ಕುರಿತು ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಆರಂಭದಲ್ಲಿ ತೀವ್ರ ವಿಮರ್ಶೆಗೆ ಒಳಗಾಗಿದ್ದ ಈ ಹಾಡುಗಳು, ತದನಂತರ ಕೆಲವರಿಂದ ಮೆಚ್ಚುಗೆಯನ್ನೂ ಗಿಟ್ಟಿಸಿಕೊಂಡಿವೆ.
ಈ ನಡುವೆ, ‘ಮಂಗಲ್ ರಂಗ್’ ಹಾಡಿನ ಕುರಿತು ವ್ಯಕ್ತವಾದ ನಕಾರಾತ್ಮಕ ಅಭಿಪ್ರಾಯಗಳನ್ನು ವಿಶ್ಲೇಷಿಸುತ್ತಾ, ಮಾಧ್ಯಮವೊಂದು ಇದನ್ನು 2023ರಲ್ಲಿ ಬಿಡುಗಡೆಯಾಗಿ ತೀವ್ರ ಸೋಲು ಕಂಡ ‘ಆದಿಪುರುಷ್’ ಚಿತ್ರದ ಸನ್ನಿವೇಶಗಳಿಗೆ ಹೋಲಿಸಿ ವರದಿ ಮಾಡಿತ್ತು. ಈ ಹೋಲಿಕೆಯು 2023ರ ‘ಆದಿಪುರುಷ್’ ಸಿನಿಮಾದ ಸಂಭಾಷಣೆ ಮತ್ತು ಸಾಹಿತ್ಯ ಬರೆದಿದ್ದ ಖ್ಯಾತ ಸಾಹಿತಿ ಮನೋಜ್ ಮುಂತಶಿರ್ ಅವರ ಕೆಂಗಣ್ಣಿಗೆ ಗುರಿಯಾಗಿದೆ. ತಮ್ಮ ಚಿತ್ರದ ಹಾಡುಗಳನ್ನು ರಾಮಾಯಣ ಚಿತ್ರದ ಸಂಗೀತಕ್ಕೆ ಹೋಲಿಸಿ ಬರೆದ ವರದಿಗೆ ಮನೋಜ್ ಮುಂತಶಿರ್ ಎಕ್ಸ್ (ಟ್ವಿಟರ್) ಖಾತೆಯ ಮೂಲಕ ಅತ್ಯಂತ ಖಾರವಾಗಿ ಹಾಗೂ ಕಟುವಾಗಿ ಪ್ರತ್ಯುತ್ತರ ನೀಡಿದ್ದಾರೆ.
‘ಆದಿಪುರುಷ್’ ಹಾಡುಗಳ ಶ್ರೇಷ್ಠತೆಯನ್ನು ಸಮರ್ಥಿಸಿಕೊಂಡ ಸಾಹಿತಿ
ಮಾಧ್ಯಮಗಳ ವರದಿಗೆ ಪ್ರತಿಕ್ರಿಯಿಸಿದ ಮನೋಜ್ ಮುಂತಶಿರ್, ತಮಗೆ ಹಾಗೂ ತಾವು ಬರೆದ ಹಾಡುಗಳಿಗೆ ಆದ ಅಪಮಾನವನ್ನು ತೀವ್ರವಾಗಿ ಖಂಡಿಸಿದ್ದಾರೆ. ದೇಶದ ಮುಂಚೂಣಿ ನ್ಯೂಸ್ ಚಾನೆಲ್ ಎಂದು ಕರೆದುಕೊಳ್ಳುವ ಮಾಧ್ಯಮವೊಂದು ಇಷ್ಟೊಂದು ಅಜ್ಞಾನದಿಂದ ವರದಿ ಮಾಡಿರುವುದು ವಿಪರ್ಯಾಸ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಅವರು, ತಮ್ಮ ‘ಆದಿಪುರುಷ್’ ಚಿತ್ರದ ಹಾಡುಗಳಲ್ಲಿದ್ದ ಭಕ್ತಿ ಮತ್ತು ಸಾಹಿತ್ಯದ ಮೌಲ್ಯವನ್ನು ಬಲವಾಗಿ ಸಮರ್ಥಿಸಿಕೊಂಡಿದ್ದಾರೆ.
‘ಆದಿಪುರುಷ್’ ಅತ್ಯಂತ ಕೆಟ್ಟ ಸಿನಿಮಾ ಆಗಿತ್ತು ಹಾಗೂ ಅದಲ್ಲಿದ್ದ ಸಂಭಾಷಣೆಗಳು ಅದಕ್ಕಿಂತಲೂ ಕೆಟ್ಟದಾಗಿದ್ದವು ಎಂಬುದನ್ನು ಮುಕ್ತವಾಗಿ ಒಪ್ಪಿಕೊಂಡ ಮನೋಜ್, ಆದರೆ ಆ ಚಿತ್ರದ ಹಾಡುಗಳ ವಿಷಯದಲ್ಲಿ ಯಾರೂ ಪ್ರಶ್ನೆ ಎತ್ತುವಂತಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇಂದಿಗೂ ದೇಶದ ಮೂಲೆ ಮೂಲೆಯಲ್ಲಿರುವ ಮಕ್ಕಳು ಆ ಹಾಡುಗಳನ್ನು ಗುನುಗುತ್ತಾರೆ. ಒಮ್ಮೆ ಶ್ರೀ ಅಯೋಧ್ಯೆಗೆ ಭೇಟಿ ನೀಡಿದರೆ ಪ್ರತಿಯೊಂದು ಬೀದಿ ಬೀದಿಯಲ್ಲೂ ‘ಆದಿಪುರುಷ್’ ಚಿತ್ರದ ಹಾಡುಗಳೇ ಧ್ವನಿಸುತ್ತಿರುವುದು ಕೇಳಿಸುತ್ತದೆ ಎಂದು ಅವರು ಹೇಳಿದ್ದಾರೆ.
ಸಿನಿಮಾದ ಸಂಭಾಷಣೆಗಳ ವಿಷಯದಲ್ಲಿ ತಮಗೆ ತಿಳಿದೋ ತಿಳಿಯದೆಯೋ ಆದ ತಪ್ಪಿಗೆ ರಾಮಭಕ್ತರ ಬಳಿ ಈಗಾಗಲೇ ಲೆಕ್ಕವಿಲ್ಲದಷ್ಟು ಬಾರಿ ಕ್ಷಮೆ ಯಾಚಿಸಿದ್ದೇನೆ ಮತ್ತು ಭಕ್ತರು ತಮ್ಮನ್ನು ಕ್ಷಮಿಸಿದ್ದಾರೆ ಎಂದು ತಿಳಿಸಿದ ಅವರು, ಹಾಡುಗಳಲ್ಲಿ ತಾಯ್ನಾಡು ಮತ್ತು ಶ್ರೀರಾಮನ ಮೇಲಿದ್ದ ಭಕ್ತಿ, ಸಮರ್ಪಣೆ ಅಥವಾ ಕಾವ್ಯಮಯ ಸಾಹಿತ್ಯದಲ್ಲಿ ಯಾವುದೇ ಕೊರತೆ ಇರಲಿಲ್ಲ. ತಾವು ಶ್ರೀರಾಮನ ಕುರಿತು ಬರೆಯುವಾಗ ಯಾವುದೇ ಶಿಶುಪ್ರಾಸಗಳನ್ನಾಗಲಿ ಅಥವಾ ಕವ್ವಾಲಿಗಳನ್ನಾಗಲಿ ಬರೆದಿಲ್ಲ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ.
ಬಾಕ್ಸ್ ಆಫೀಸ್‌ನಲ್ಲಿ ಧೂಳೀಪಟವಾಗಿದ್ದ ‘ಆದಿಪುರುಷ್’
ಓಂ ರಾವತ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ‘ಆದಿಪುರುಷ್’ ಚಿತ್ರವು ಪ್ರಭಾಸ್ (ಶ್ರೀರಾಮ), ಕೃತಿ ಸನೋನ್ (ಸೀತೆ) ಮತ್ತು ಸೈಫ್ ಅಲಿ ಖಾನ್ (ರಾವಣ) ಅವರಂತಹ ಬೃಹತ್ ತಾರಾಗಣವನ್ನು ಹೊಂದಿತ್ತು. ಅಜಯ್-ಅತುಲ್ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದರು. ಸುಮಾರು 550 ಕೋಟಿ ರೂಪಾಯಿಗಳ ಬೃಹತ್ ವೆಚ್ಚದಲ್ಲಿ ನಿರ್ಮಾಣಗೊಂಡಿದ್ದ ಈ ಸಿನಿಮಾ ಬಿಡುಗಡೆಯಾದ ಆರಂಭದಲ್ಲಿ ಭಾರಿ ಪ್ರಚಾರ ಪಡೆದುಕೊಂಡಿತ್ತಾದರೂ, ಕಳಪೆ ಸಂಭಾಷಣೆ, ರಾವಣ ಹಾಗೂ ಶ್ರೀರಾಮನ ಚಿತ್ರಣ ಮತ್ತು ಕಳಪೆ ವಿಎಫ್‌ಎಕ್ಸ್ ಕಾರಣಗಳಿಂದಾಗಿ ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ತುತ್ತಾಗಿತ್ತು.
ಚಿತ್ರದ ವಿರುದ್ಧ ಕೇಳಿಬಂದ ಸಾಲು ಸಾಲು ವಿವಾದಗಳು ಹಾಗೂ ನಕಾರಾತ್ಮಕ ವಿಮರ್ಶೆಗಳಿಂದಾಗಿ, ಆರಂಭಿಕ ಕಲೆಕ್ಷನ್ ನಂತರ ಬಾಕ್ಸ್ ಆಫೀಸ್‌ನಲ್ಲಿ ತೀವ್ರ ಹಿನ್ನಡೆ ಅನುಭವಿಸಿ 200 ಕೋಟಿಗೂ ಅಧಿಕ ನಷ್ಟದೊಂದಿಗೆ ಬಾಲಿವುಡ್ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಫ್ಲಾಪ್ ಸಿನಿಮಾಗಳಲ್ಲೊಂದಾಗಿ ಹೊರಹೊಮ್ಮಿತ್ತು. ಸಿನಿಮಾ ಸಂಪೂರ್ಣವಾಗಿ ಸೋತರೂ, ಅದಲ್ಲಿದ್ದ ಹಾಡುಗಳು ಮಾತ್ರ ಜನರ ಮನಸ್ಸಿನಲ್ಲಿ ಉಳಿದುಕೊಂಡಿವೆ ಎಂಬುದು ಮನೋಜ್ ಅವರ ಅಭಿಪ್ರಾಯವಾಗಿದೆ.
ಇದನ್ನೂ ಓದಿ: ಜೈಲಿನಲ್ಲಿ ನಟ ದರ್ಶನ್‌ಗೆ ಬೆನ್ನುನೋವು ತೀವ್ರ: ಫಿಸಿಯೋಥೆರಪಿಗೆ ಕೋರ್ಟ್‌ಗೆ ಅರ್ಜಿ!
