ಮುಂಬೈ: 15ನೇ ಶತಮಾನದಲ್ಲಿ ತಮ್ಮ ಅರ್ಥಗರ್ಭಿತ ಕಾವ್ಯ, ದೋಹಾಗಳು ಹಾಗೂ ಆಧ್ಯಾತ್ಮಿಕ ಚಿಂತನೆಗಳ (Bollywood) ಮೂಲಕ ಸಮಾಜದಲ್ಲಿ ಹೊಸ ಜಾಗೃತಿ ಮೂಡಿಸಿದ ಮಹಾನ್ ಸಂತ ಕಬೀರರ ಜೀವನ ಚರಿತ್ರೆ ಇದೀಗ ಬೆಳ್ಳಿತೆರೆಯ ಮೇಲೆ ಮೂಡಿಬರಲು ಸಜ್ಜಾಗಿದೆ. ಜಾತಿ, ಧರ್ಮ ಮತ್ತು ಸಂಪ್ರದಾಯಗಳ ಹೆಸರಿನಲ್ಲಿ ಜನರ ನಡುವೆ ನಿರ್ಮಾಣವಾಗಿದ್ದ ಅಸಮಾನತೆಯ ಗೋಡೆಗಳನ್ನು ಪ್ರಶ್ನಿಸಿ, ಮಾನವೀಯತೆ ಮತ್ತು ಏಕತೆಯ ಸಂದೇಶ ಸಾರಿದ ಕಬೀರರ ಬದುಕು ಇಂದಿಗೂ ಕೋಟ್ಯಂತರ ಜನರಿಗೆ ಸ್ಫೂರ್ತಿಯಾಗಿದೆ. ಇದೀಗ ಇಂತಹ ದಾರ್ಶನಿಕನ ಬದುಕನ್ನು ಸಂಗೀತಮಯ ಕಥನದ ಮೂಲಕ ಪ್ರೇಕ್ಷಕರ ಮುಂದೆ ತರಲು ‘ಮಹಾವೀರ್ ಜೈನ್ ಫಿಲ್ಮ್ಸ್’ ಮುಂದಾಗಿದ್ದು, ‘ಕಬೀರಾ’ ಎಂಬ ಹೊಸ ಸಿನಿಮಾವನ್ನು ಅಧಿಕೃತವಾಗಿ ಘೋಷಿಸಿದೆ.
15ನೇ ಶತಮಾನದ ಕಾಶಿಯ ಹಿನ್ನೆಲೆಯಲ್ಲಿ ಕಥಾಹಂದರ
ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಯಶಸ್ಸು ಕಂಡಿದ್ದ ‘ಹನುಮಾನ್ ಅಂಶ್’ ಚಿತ್ರದ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದ್ದ ಮಹಾವೀರ್ ಜೈನ್ ಫಿಲ್ಮ್ಸ್, ಇದೀಗ ಮತ್ತೊಂದು ಮಹತ್ವದ ಆಧ್ಯಾತ್ಮಿಕ ಕಥೆಯೊಂದಿಗೆ ಪ್ರೇಕ್ಷಕರ ಎದುರು ಬರುತ್ತಿದೆ. ಈ ಚಿತ್ರಕ್ಕೆ ಅಭಿಷೇಕ್ ಶರ್ಮಾ ಆಕ್ಷನ್ ಕಟ್ ಹೇಳಲಿದ್ದಾರೆ. ಸಂತ ಕಬೀರರಿಗೆ ಕಾಶಿಯೊಂದಿಗೆ ಅವಿನಾಭಾವ ನಂಟಿದೆ. ಹೀಗಾಗಿ ‘ಕಬೀರಾ’ ಚಿತ್ರದ ಸಂಪೂರ್ಣ ಕಥೆಯು 15ನೇ ಶತಮಾನದ ಕಾಶಿ ಅಥವಾ ಇಂದಿನ ವಾರಣಾಸಿಯ ಹಿನ್ನೆಲೆಯಲ್ಲಿ ಸಾಗಲಿದೆ. ಅಂದಿನ ಕಾಲಘಟ್ಟದ ಸಾಮಾಜಿಕ ಪರಿಸ್ಥಿತಿ, ಧಾರ್ಮಿಕ ನಂಬಿಕೆಗಳು, ಜನರ ಜೀವನಶೈಲಿ ಮತ್ತು ಸಾಂಸ್ಕೃತಿಕ ವಾತಾವರಣವನ್ನು ನೈಜವಾಗಿ ಕಟ್ಟಿಕೊಡಲು ಚಿತ್ರತಂಡ ಯೋಜಿಸಿದೆ. ಕಬೀರರ ಜೀವನದ ಪ್ರಮುಖ ಘಟನೆಗಳು, ಅವರ ಕ್ರಾಂತಿಕಾರಿ ಆಲೋಚನೆಗಳು ಮತ್ತು ಆಧ್ಯಾತ್ಮಿಕ ಪಯಣವನ್ನು ಕಾಶಿಯ ನೆಲದಲ್ಲೇ ಚಿತ್ರೀಕರಿಸಲು ನಿರ್ಧರಿಸಲಾಗಿದೆ.
ಸಂಗೀತವೇ ಚಿತ್ರದ ಜೀವಾಳ: ತನಿಷ್ಕ್ ಬಾಗ್ಚಿ ಸಾರಥ್ಯ
ಸಂತ ಕಬೀರರ ವಚನಗಳು ಮತ್ತು ದೋಹಾಗಳಿಗೆ ಸಂಗೀತದ ಸ್ಪರ್ಶ ನೀಡಿದಾಗ ಅವುಗಳ ಪ್ರಭಾವ ಮತ್ತಷ್ಟು ಹೆಚ್ಚಾಗುತ್ತದೆ. ಇದೇ ಕಾರಣಕ್ಕೆ ‘ಕಬೀರಾ’ ಸಿನಿಮಾದಲ್ಲಿ ಸಂಗೀತಕ್ಕೆ ಅತ್ಯಂತ ಮಹತ್ವದ ಸ್ಥಾನ ನೀಡಲಾಗಿದೆ. ಬಾಲಿವುಡ್ನ ಖ್ಯಾತ ಸಂಗೀತ ನಿರ್ದೇಶಕ ತನಿಷ್ಕ್ ಬಾಗ್ಚಿ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸುವ ಜವಾಬ್ದಾರಿ ಹೊತ್ತಿದ್ದಾರೆ. ಕಬೀರರ ಜನಪ್ರಿಯ ದೋಹಾಗಳು ಮತ್ತು ಮಾನವೀಯ ಸಂದೇಶಗಳನ್ನು ಇಂದಿನ ಪೀಳಿಗೆಗೆ ತಲುಪಿಸಲು ಜಾನಪದ, ಸೂಫಿ ಹಾಗೂ ಶಾಸ್ತ್ರೀಯ ಸಂಗೀತದ ಶೈಲಿಗಳನ್ನು ವಿಶೇಷವಾಗಿ ಸಂಯೋಜಿಸಲು ಚಿತ್ರತಂಡ ಸಿದ್ಧತೆ ನಡೆಸಿದೆ.
2027ರಲ್ಲಿ ಚಿತ್ರೀಕರಣ ಆರಂಭ
‘ಕಬೀರಾ’ ಸಿನಿಮಾದ ಚಿತ್ರೀಕರಣವು 2027ರಲ್ಲಿ ಆರಂಭವಾಗಲಿದೆ ಎಂದು ನಿರ್ಮಾಣ ಸಂಸ್ಥೆ ಅಧಿಕೃತವಾಗಿ ಪ್ರಕಟಿಸಿದೆ. ಸದ್ಯಕ್ಕೆ ಚಿತ್ರದ ಘೋಷಣೆಯಷ್ಟೇ ಹೊರಬಿದ್ದಿದ್ದು, ಸಂತ ಕಬೀರರ ಪಾತ್ರದಲ್ಲಿ ಯಾರು ಕಾಣಿಸಿಕೊಳ್ಳಲಿದ್ದಾರೆ, ಉಳಿದ ತಾರಾಗಣದಲ್ಲಿ ಯಾರಿರಲಿದ್ದಾರೆ ಮತ್ತು ಸಿನಿಮಾ ಯಾವಾಗ ಬಿಡುಗಡೆಯಾಗಲಿದೆ ಎಂಬ ಕುರಿತು ಚಿತ್ರತಂಡ ಯಾವುದೇ ಗುಟ್ಟು ಬಿಟ್ಟುಕೊಟ್ಟಿಲ್ಲ. ಮುಂದಿನ ದಿನಗಳಲ್ಲಿ ಈ ಕುರಿತು ಹೆಚ್ಚಿನ ಮಾಹಿತಿ ಹೊರಬೀಳುವ ನಿರೀಕ್ಷೆಯಿದ್ದು, ಐತಿಹಾಸಿಕ ಹಿನ್ನೆಲೆ, ಆಧ್ಯಾತ್ಮಿಕ ವಿಚಾರಗಳು ಹಾಗೂ ಸಂಗೀತದ ಸಮ್ಮಿಲನದಲ್ಲಿ ಮೂಡಿಬರಲಿರುವ ಈ ಸಿನಿಮಾ ಸಿನಿಪ್ರಿಯರಲ್ಲಿ ಈಗಾಗಲೇ ಕುತೂಹಲ ಮೂಡಿಸಿದೆ.
ಇದನ್ನೂ ಓದಿ: ಆಸ್ಕರ್ ಭವಿಷ್ಯದಿಂದ ಆಕ್ರೋಶದವರೆಗೆ: ‘ರಾಮಾಯಣ’ ಸಿನಿಮಾವನ್ನು ‘ಅಜೆಂಡಾ ಚಿತ್ರ’ ಎಂದ ನಿತೀಶ್ ಭಾರದ್ವಾಜ್
