ಮುಂಬೈ: ಮಾಲಿನ್ಯರಹಿತ ದೀಪಾವಳಿ ಆಚರಣೆಯ ಜಾಗೃತಿಗಾಗಿ ಬೃಹನ್‌ಮುಂಬೈ ಮಹಾನಗರ ಪಾಲಿಕೆ (BMC) ನಿರ್ಮಿಸಿದ್ದ ಪ್ರಚಾರ ವೀಡಿಯೊ ಒಂದನ್ನು ಇದ್ದಕ್ಕಿದ್ದಂತೆ ಸಾಮಾಜಿಕ ಜಾಲತಾಣಗಳಿಂದ (Dia Mirza) ತೆರವುಗೊಳಿಸಿರುವುದು ಈಗ ಮಹಾರಾಷ್ಟ್ರ ರಾಜಕೀಯದಲ್ಲಿ ಹೊಸ ಸಂಚಲನಕ್ಕೆ ಕಾರಣವಾಗಿದೆ. ಬಾಲಿವುಡ್ ನಟಿ ದಿಯಾ ಮಿರ್ಜಾ ಅಭಿನಯಿಸಿದ್ದ ಈ ಜಾಗೃತಿ ವಿಡಿಯೋವನ್ನು ಬಿಜೆಪಿ ನಾಯಕರ ಆಕ್ಷೇಪಣೆಯ ನಂತರ ಬಿಎಂಸಿ ಡಿಲೀಟ್ ಮಾಡಿದ್ದು, ಈ ನಡೆಗೆ ಶಿವಸೇನಾ ನಾಯಕರು ಹಾಗೂ ಸಾರ್ವಜನಿಕ ವಲಯದಿಂದ ತೀವ್ರ ಅಸಮಾಧಾನ ವ್ಯಕ್ತವಾಗುತ್ತಿದೆ.
ಮುಂಬೈನಲ್ಲಿ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿರುವ ವಾಯು ಮಾಲಿನ್ಯವನ್ನು ತಡೆಗಟ್ಟಲು ಮತ್ತು ಪರಿಸರ ಸ್ನೇಹಿ ದೀಪಾವಳಿ ಆಚರಿಸಲು ಬಾಂಬೆ ಹೈಕೋರ್ಟ್ ನಿರ್ದೇಶನ ನೀಡಿತ್ತು. ಈ ಹಿನ್ನೆಲೆಯಲ್ಲಿ ಬಿಎಂಸಿ ಪಟಾಕಿ ರಹಿತ ದೀಪಾವಳಿ ಜಾಗೃತಿ ಅಭಿಯಾನವನ್ನು ಕೈಗೆತ್ತಿಕೊಂಡಿತ್ತು. ಈ ಅಭಿಯಾನಕ್ಕಾಗಿ ಕ್ರಿಕೆಟಿಗ ಅಜಿಂಕ್ಯ ರಹಾನೆ, ನಟಿ ಮಾಧುರಿ ದೀಕ್ಷಿತ್ ಹಾಗೂ ದಿಯಾ ಮಿರ್ಜಾ ಸೇರಿದಂತೆ ಹಲವು ಪ್ರಸಿದ್ಧ ಗಣ್ಯರನ್ನು ಬಳಸಿಕೊಂಡು ಜಾಗೃತಿ ಸಂದೇಶಗಳನ್ನು ರೆಕಾರ್ಡ್ ಮಾಡಿಸಲಾಗಿತ್ತು.
ವಿವಾದಕ್ಕೆ ಕಾರಣವಾದ ಬಿಜೆಪಿ ನಾಯಕ ಅಮೀತ್ ಸಾತಮ್ ಆಕ್ಷೇಪಣೆ
ಬಿಎಂಸಿ ಬಿಡುಗಡೆ ಮಾಡಿದ್ದ ದಿಯಾ ಮಿರ್ಜಾ ಅವರ ವಿಡಿಯೋಗೆ ಮುಂಬೈ ಬಿಜೆಪಿ ಅಧ್ಯಕ್ಷ ಹಾಗೂ ಶಾಸಕ ಅಮೀತ್ ಸಾತಮ್ ಬಹಿರಂಗವಾಗಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದರು. ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿದ್ದ ಅವರು, ದೀಪಾವಳಿ ಹಬ್ಬವನ್ನು ಹೇಗೆ ಆಚರಿಸಬೇಕು ಎಂದು ದಿಯಾ ಮಿರ್ಜಾ ಅವರಿಂದ ಪಾಠ ಕಲಿಯುವ ಅಗತ್ಯ ನಮಗಿಲ್ಲ, ನಮ್ಮ ಸಂಪ್ರದಾಯಗಳು ನಮ್ಮ ಸಂಸ್ಕೃತಿಯಲ್ಲಿ ಆಳವಾಗಿ ಬೇರೂರಿವೆ ಎಂದು ಸವಾಲು ಎಸೆದಿದ್ದರು.
ಅಮೀತ್ ಸಾತಮ್ ಅವರ ಈ ಪೋಸ್ಟ್ ಬೆನ್ನಲ್ಲೇ ಬಿಎಂಸಿ ಆಡಳಿತ ಮಂಡಳಿಯು ದಿಯಾ ಮಿರ್ಜಾ ಅವರ ವೀಡಿಯೊವನ್ನು ತನ್ನ ಅಧಿಕೃತ ಸಾಮಾಜಿಕ ಜಾಲತಾಣದ ಖಾತೆಗಳಿಂದ ತಕ್ಷಣವೇ ತೆಗೆದುಹಾಕಿತು. ಆದರೆ, ಈ ವೀಡಿಯೊವನ್ನು ಏಕಾಏಕಿ ತೆರವುಗೊಳಿಸಲು ನಿಖರವಾದ ಕಾರಣವೇನು ಎಂಬುದರ ಕುರಿತು ಬಿಎಂಸಿ ಇದುವರೆಗೆ ಯಾವುದೇ ಅಧಿಕೃತ ಸ್ಪಷ್ಟನೆಯನ್ನು ನೀಡಿಲ್ಲ.
ಧರ್ಮದ ಆಧಾರದಲ್ಲಿ ವಿರೋಧ ಸರಿಯಲ್ಲ: ಮುಂಬೈ ಉಪಮೇಯರ್ ಸಂಜಯ್ ಘಾಡಿ ಅಸಮಾಧಾನ
ಬಿಎಂಸಿ ಆಡಳಿತ ಮಂಡಳಿಯ ಈ ಹಠಾತ್ ನಿರ್ಧಾರಕ್ಕೆ ಮುಂಬೈ ಉಪಮೇಯರ್ ಹಾಗೂ ಶಿವಸೇನಾ ನಾಯಕ ಸಂಜಯ್ ಘಾಡಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಧರ್ಮದ ಆಧಾರದ ಮೇಲೆ ಯಾರನ್ನಾದರೂ ಅಥವಾ ಅವರ ಸಂದೇಶವನ್ನು ವಿರೋಧಿಸುವುದು ಸಂಪೂರ್ಣವಾಗಿ ತಪ್ಪು ಎಂದು ಹೇಳಿದ್ದಾರೆ. ಬಿಜೆಪಿ ಶಾಸಕ ಅಮೀತ್ ಸಾತಮ್ ಅವರು ಹಲವು ವಿಷಯಗಳಲ್ಲಿ ಸೂಕ್ತ ಸಲಹೆಗಳನ್ನು ನೀಡುತ್ತಾರಾದರೂ, ಈ ವಿಷಯದಲ್ಲಿ ಅವರ ಆಕ್ಷೇಪಣೆಯನ್ನು ತಾನು ಒಪ್ಪುವುದಿಲ್ಲ ಎಂದು ಘಾಡಿ ಸ್ಪಷ್ಟಪಡಿಸಿದ್ದಾರೆ.
ದಿಯಾ ಮಿರ್ಜಾ ಅವರು ನೀಡಿದ ಸಂದೇಶ ಮತ್ತು ವೀಡಿಯೊದಲ್ಲಿ ಹೇಳಿದ ವಿಷಯಗಳು ಸಂಪೂರ್ಣವಾಗಿ ಸರಿಯಾಗಿದ್ದವು ಎಂದು ಅಭಿಪ್ರಾಯಪಟ್ಟ ಉಪಮೇಯರ್, ವೀಡಿಯೊ ತೆರವುಗೊಳಿಸುವ ಮುನ್ನ ಪಾಲಿಕೆ ಆಡಳಿತ ಮಂಡಳಿಯು ಯೋಚಿಸಬೇಕಿತ್ತು ಎಂದಿದ್ದಾರೆ. ಇಂತಹ ಪ್ರಮುಖ ನಿರ್ಧಾರಗಳನ್ನು ಮೇಯರ್, ಸಮಿತಿ ಹಾಗೂ ಜನಪ್ರತಿನಿಧಿಗಳೊಂದಿಗೆ ಚರ್ಚಿಸಿ ಜಂಟಿಯಾಗಿ ತೆಗೆದುಕೊಳ್ಳಲಾಗುತ್ತದೆ. ಆದ್ದರಿಂದ ಆಡಳಿತ ಮಂಡಳಿಗೆ ಮನವಿ ಮಾಡಿ, ಆ ವೀಡಿಯೊವನ್ನು ತಕ್ಷಣವೇ ಮತ್ತೆ ಸಾಮಾಜಿಕ ಜಾಲತಾಣಗಳಲ್ಲಿ ಅಪ್‌ಲೋಡ್ ಮಾಡಲು ಸೂಕ್ತ ನಿರ್ದೇಶನ ನೀಡುವುದಾಗಿ ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ: ‘ಸ್ಕ್ರಿಪ್ಟ್ ಇಷ್ಟವಾದ್ರೆ ಮಾಡು ಅಂದಿದ್ರು ರಕ್ಷಿತ್’: ಗೀತಾ ಗೋವಿಂದಂ ಸಿನಿಮಾ ಒಪ್ಪಿಕೊಂಡ ಕ್ಷಣ ನೆನೆದ ರಶ್ಮಿಕಾ
