ನವದೆಹಲಿ: ವಿಶ್ವದಾದ್ಯಂತ ಹವಾಮಾನ ತಜ್ಞರು ‘ಎಲ್ ನಿನೋ’ (El Nino) ಹವಾಮಾನ ಬದಲಾವಣೆಯ ತೀವ್ರತೆಯ ಬಗ್ಗೆ ತೀವ್ರ ಆತಂಕ ವ್ಯಕ್ತಪಡಿಸಿದ್ದು, ಈ ಬಾರಿಯ ಪರಿಸ್ಥಿತಿ ಹಿಂದೆಂದೂ ಕಾಣದಂತಹ ಅಭೂತಪೂರ್ವ ಮಟ್ಟಕ್ಕೆ ತಲುಪುತ್ತಿದೆ ಎಂದು ಎಚ್ಚರಿಸಿದ್ದಾರೆ. ವಿಶ್ವ ಸಂಸ್ಥೆಯ ವಾಯುಗುಣ ಮತ್ತು ಹವಾಮಾನ ಸಂಸ್ಥೆಯಾದ ‘ವಿಶ್ವ ಹವಾಮಾನ ಸಂಸ್ಥೆ’ (WMO) ನೀಡಿದ ವರದಿಯ ಪ್ರಕಾರ, ಈ ವರ್ಷ ಸಂಭವಿಸುತ್ತಿರುವ ಎಲ್ ನಿನೋ ವಿದ್ಯಮಾನವು 1950ರ ನಂತರ ದಾಖಲಾದ ಅತ್ಯಂತ ಪ್ರಬಲ ಹಾಗೂ ಭೀಕರ ಹವಾಮಾನ ಏರಿಳಿತಗಳಲ್ಲಿ ಒಂದಾಗುವ ಸಾಧ್ಯತೆಯಿದೆ. ಮಾನವ ನಿರ್ಮಿತ ಜಾಗತಿಕ ತಾಪಮಾನದ (Climate Change) ಜೊತೆಗೆ ಈ ಎಲ್ ನಿನೋ ಪ್ರಭಾವವೂ ಸೇರಿಕೊಂಡು ಪರಿಸ್ಥಿತಿಯನ್ನು ಮತ್ತಷ್ಟು ಭೀಕರಗೊಳಿಸಲಿದೆ ಎಂದು ವಿಶ್ವ ಸಂಸ್ಥೆ ಸ್ಪಷ್ಟಪಡಿಸಿದೆ. ಪೆಸಿಫಿಕ್ ಮಹಾಸಾಗರದಲ್ಲಿ ಅಡಗಿದ್ದ ಅಪಾರ ಪ್ರಮಾಣದ ಶಾಖವು ಹೊರಚೆಲ್ಲುತ್ತಿರುವುದರಿಂದ ಭೂಮಿಯ ಬಹುತೇಕ ಭಾಗಗಳಲ್ಲಿ ತಾಪಮಾನವು ಅತಿಯಾಗಿ ಹೆಚ್ಚಾಗಲಿದೆ ಎಂದು ವಿಜ್ಞಾನಿಗಳು ಅಂದಾಜಿಸಿದ್ದಾರೆ.
ಕೆಂಪು ಬಣ್ಣಕ್ಕೆ ತಿರುಗಿದ ಭೂಮಿಯ ಭಾಗ
ಹವಾಮಾನ ತಜ್ಞ ರಿಯಾನ್ ಮಾವ್ ಅವರು ಇಡೀ ಗ್ರಹದ ಪ್ರಸ್ತುತ ಉಷ್ಣತೆಯ ನಕ್ಷೆಯನ್ನು ಹಂಚಿಕೊಂಡಿದ್ದು, ಭೂಮಿಯ ಬಹುತೇಕ ಭಾಗಗಳು ಕೆಂಪು ಬಣ್ಣಕ್ಕೆ ತಿರುಗಿವೆ, ಅಂದರೆ ಬಿಸಿಯಾಗುತ್ತಿವೆ ಎಂದು ತೋರಿಸಿದ್ದಾರೆ. ಅಮೆರಿಕವನ್ನು ಹೊರತುಪಡಿಸಿ ವಿಶ್ವದ ಪ್ರತಿಯೊಂದು ಮೂಲೆಯಲ್ಲೂ ಉಷ್ಣಾಂಶವು ಗರಿಷ್ಠ ಮಟ್ಟಕ್ಕೆ ತಲುಪುತ್ತಿದ್ದು, ಎಲ್ ನಿನೋ ತೀವ್ರ ಸ್ವರೂಪದಲ್ಲಿ ಮುಂದುವರಿಯುತ್ತಿದೆ ಎಂದು ಅವರು ಎಕ್ಸ್ (X) ಜಾಲತಾಣದಲ್ಲಿ ತಿಳಿಸಿದ್ದಾರೆ. ಇದಲ್ಲದೆ, ವಿಶ್ವ ಹವಾಮಾನ ಸಂಸ್ಥೆಯ ಅಂದಾಜಿನಂತೆ ಈ ಭೀಕರ ಎಲ್ ನಿನೋ ಪರಿಸ್ಥಿತಿಯು 2027ರ ಫೆಬ್ರವರಿ ತಿಂಗಳವರೆಗೂ ಮುಂದುವರಿಯಲಿದೆ ಎಂಬ ಅಂಶವನ್ನು ಅವರು ಬೆಂಬಲಿಸಿದ್ದಾರೆ.
ಮತ್ತೊಬ್ಬ ಪ್ರಮುಖ ವಾಯುಗುಣ ವಿಜ್ಞಾನಿ ಜೀಕ್ ಹೌಸ್‌ಫಾದರ್ ಪ್ರಕಾರ, ಈ ವರ್ಷದ ಎಲ್ ನಿನೋ ಹಿಂದೆಂದೂ ಕಾಣದಂತಹ ಮಟ್ಟಕ್ಕೆ ಏರುತ್ತಿದೆ. ನಿಪೋ-3.4 (Nino3.4) ವಲಯದಲ್ಲಿನ ತಾಪಮಾನ ವ್ಯತ್ಯಾಸವು ಸಾಮಾನ್ಯಕ್ಕಿಂತ 3.4 ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಾಗಿದ್ದು, ಇದು ಈವರೆಗೆ ದಾಖಲಾದ ಯಾವುದೇ ಎಲ್ ನಿನೋ ಘಟನೆಗಿಂತ ಅತ್ಯಂತ ಹೆಚ್ಚಿನದ್ದಾಗಿದೆ. ಈ ಪರಿಸ್ಥಿತಿಯ ಗಂಭೀರತೆಯನ್ನು ಗಮನಿಸಿದ ವಾಯುಗುಣ ತಜ್ಞ ಲಿಯಾನ್ ಸೈಮನ್ಸ್ ಇದನ್ನು ಕೇವಲ ಎಲ್ ನಿನೋ ಎನ್ನದೆ, ‘ಸೂಪರ್-ಡೂಪರ್ ಎಲ್ ನಿನೋ’ ಎಂದು ಕರೆದಿದ್ದಾರೆ.
ವಿಶ್ವ ಹವಾಮಾನ ಸಂಸ್ಥೆಯು (WMO) ತನ್ನ ಮುನ್ಸೂಚನೆಯಲ್ಲಿ, 2026ರ ಕೊನೆಯ ತಿಂಗಳುಗಳಲ್ಲಿ ಜಗತ್ತಿನ ವಿಶಾಲ ಪ್ರದೇಶಗಳಲ್ಲಿ ಸಮುದ್ರ ಮೇಲ್ಮೈ ತಾಪಮಾನವು ಸಾಮಾನ್ಯಕ್ಕಿಂತ ಅತ್ಯಧಿಕವಾಗಿರಲಿದೆ ಎಂದು ಹೇಳಿದೆ. ವಿಶೇಷವಾಗಿ ಎಲ್ ನಿನೋ ವಿದ್ಯಮಾನದ ಕೇಂದ್ರಬಿಂದುವಾಗಿರುವ ಕೇಂದ್ರ ಮತ್ತು ಪೂರ್ವ ಉಷ್ಣವಲಯದ ಪೆಸಿಫಿಕ್ ಮಹಾಸಾಗರದ ಭಾಗಗಳಲ್ಲಿ, ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ಅವಧಿಯಲ್ಲಿ ಸಮುದ್ರ ಮೇಲ್ಮೈ ತಾಪಮಾನವು ಸಾಮಾನ್ಯಕ್ಕಿಂತ 3.7 ಡಿಗ್ರಿ ಸೆಲ್ಸಿಯಸ್ (6.7 ಡಿಗ್ರಿ ಫ್ಯಾರನ್‌ಹೀಟ್) ನಷ್ಟು ದಾಖಲೆ ಪ್ರಮಾಣಕ್ಕೆ ಹೆಚ್ಚಾಗುವ ನಿರೀಕ್ಷೆಯಿದೆ.
ಸಾಮಾನ್ಯವಾಗಿ ಎಲ್ ನಿನೋ ಎಂಬುದು ಪೆಸಿಫಿಕ್ ಮಹಾಸಾಗರದಲ್ಲಿ ಸ್ವಾಭಾವಿಕವಾಗಿ ಸಂಭವಿಸುವ ‘ಎಲ್ ನಿನೋ-ದಕ್ಷಿಣದ ಏರಿಳಿತ’ (ENSO) ಚಕ್ರದ ಬೆಚ್ಚಗಿನ ಹಂತವಾಗಿದೆ. ಇದು ಜಗತ್ತಿನಾದ್ಯಂತ ಹವಾಮಾನ ವ್ಯವಸ್ಥೆಯ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಪ್ರತಿ 2 ರಿಂದ 7 ವರ್ಷಗಳಿಗೊಮ್ಮೆ ಸಂಭವಿಸುವ ಈ ಪ್ರಕ್ರಿಯೆಯು ಜಾಗತಿಕ ತಾಪಮಾನವನ್ನು ಹೆಚ್ಚಿಸುವುದಲ್ಲದೆ, ಮಳೆಯ ವಿನ್ಯಾಸವನ್ನು ಸಂಪೂರ್ಣವಾಗಿ ಏರುಪೇರು ಮಾಡುತ್ತದೆ. ಇದರಿಂದಾಗಿ ಕೆಲ ಪ್ರದೇಶಗಳಲ್ಲಿ ಭೀಕರ ಬರವನ್ನಷ್ಟೇ ಅಲ್ಲದೆ, ಇನ್ನು ಕೆಲವು ಭಾಗಗಳಲ್ಲಿ ಸತತ ಅತಿಯಾದ ಪ್ರವಾಹವನ್ನು ಉಂಟುಮಾಡುತ್ತದೆ.
4,51,000 ಜನರು ಹೆಚ್ಚುವರಿಯಾಗಿ ಜೀವ ಕಳೆದುಕೊಳ್ಳುವ ಭೀತಿ
ಇತ್ತೀಚೆಗೆ ಶಿಕಾಗೋ ವಿಶ್ವವಿದ್ಯಾಲಯದ ಕ್ಲೈಮೇಟ್ ಇಂಪ್ಯಾಕ್ಟ್ ಲ್ಯಾಬ್ ನಡೆಸಿದ ಅಧ್ಯಯನದ ಪ್ರಕಾರ, ಈ ‘ಸೂಪರ್ ಎಲ್ ನಿನೋ’ ಪ್ರಭಾವದಿಂದಾಗಿ ಜೂನ್‌ನಿಂದ 2027ರ ಫೆಬ್ರವರಿ ಅವಧಿಯಲ್ಲಿ ವಿಶ್ವದಾದ್ಯಂತ ಅಂದಾಜು 4,51,000 ಜನರು ಹೆಚ್ಚುವರಿಯಾಗಿ ಜೀವ ಕಳೆದುಕೊಳ್ಳುವ ಭೀತಿಯಿದೆ ಎಂದು ಸಂಶೋಧಕರು ಎಚ್ಚರಿಸಿದ್ದಾರೆ. ಈ ಪ್ರಮಾಣದ ಸಾವು-ನೋವು ಹಾಗೂ ವಿನಾಶವು ಜಾಗತಿಕ ಮಟ್ಟದಲ್ಲಿ ತೀವ್ರ ಆತಂಕವನ್ನು ಸೃಷ್ಟಿಸಿದೆ.
ಇದನ್ನೂ ಓದಿ: ಗುಲಾಬ್ ಜಾಮೂನ್ ಪಾತ್ರೆಯಲ್ಲಿ ಈಜಾಡಿದ ಇಲಿ: ಭಿವಂಡಿಯ ಪ್ರಸಿದ್ಧ ಸಿಹಿ ತಿಂಡಿ ಅಂಗಡಿ ಬಂದ್, ಎಫ್‌ಡಿಎ ನೋಟಿಸ್!
