ನವದೆಹಲಿ: ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಕೆಗೆ ನಿಗದಿಪಡಿಸಲಾಗಿರುವ ಕೊನೆಯ ದಿನಾಂಕ ಜುಲೈ 31 ತೀರ ಹತ್ತಿರದಲ್ಲಿದೆ. ಒಂದು ವೇಳೆ ನೀವು ಇನ್ನು ಕೂಡ ರಿಟರ್ನ್ಸ್ ಫೈಲ್ ಮಾಡದಿದ್ದರೆ ತಕ್ಷಣವೇ ಎಚ್ಚೆತ್ತುಕೊಳ್ಳಿ. ಈ ಬಾರಿ ಗಡುವು ವಿಸ್ತರಣೆಯಾಗುವ ಸಾಧ್ಯತೆಗಳು ಇಲ್ಲವೇ ಇಲ್ಲ ಎನ್ನಲಾಗುತ್ತಿದ್ದು, ಕೊನೆ ದಿನದವರೆಗೆ ಕಾಯದೇ ಪ್ರಕ್ರಿಯೆ ಮುಗಿಸುವಂತೆ ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ. ನಿಗದಿತ ಅವಧಿಯಲ್ಲಿ ಐಟಿಆರ್ ಸಲ್ಲಿಸದಿದ್ದರೆ ತೆರಿಗೆದಾರರು ಅನುಭವಿಸಬೇಕಾದ ಆರ್ಥಿಕ ನಷ್ಟ ಹಾಗೂ ಕಾನೂನು ಕ್ರಮಗಳ ವಿವರ ಇಲ್ಲಿದೆ.
ತಡವಾಗಿ ಸಲ್ಲಿಸಿದರೆ ವಿಧಿಸಲಾಗುವ ದಂಡ: ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 234F ಅಡಿಯಲ್ಲಿ ಜುಲೈ 31ರ ನಂತರವೂ ಡಿಸೆಂಬರ್ 31ರ ಒಳಗಾಗಿ ವಿಳಂಬಿತ ರಿಟರ್ನ್ (Belated Return) ಸಲ್ಲಿಸಲು ಅವಕಾಶವಿದೆಯಾದರೂ, ಅದಕ್ಕೆ ದಂಡ ತೆರಬೇಕಾಗುತ್ತದೆ.
- ವಾರ್ಷಿಕ ಆದಾಯ ರೂ. 5 ಲಕ್ಷಕ್ಕಿಂತ ಹೆಚ್ಚಿದ್ದರೆ ರೂ. 5,000 ವಿಳಂಬ ಶುಲ್ಕ ಪಾವತಿಸಬೇಕು.
- ಒಟ್ಟು ಆದಾಯ ರೂ. 5 ಲಕ್ಷ ಅಥವಾ ಅದಕ್ಕಿಂತ ಕಡಿಮೆ ಇದ್ದರೆ ದಂಡದ ಮೊತ್ತವನ್ನು ರೂ. 1,000 ಕ್ಕೆ ಸೀಮಿತಗೊಳಿಸಲಾಗಿದೆ.
- ತೆರಿಗೆ ವಿನಾಯಿತಿ ಮಿತಿಗಿಂತ ಕಡಿಮೆ ಆದಾಯ ಹೊಂದಿರುವವರಿಗೆ ಯಾವುದೇ ದಂಡ ಅನ್ವಯಿಸುವುದಿಲ್ಲ.
ಬಾಕಿ ತೆರಿಗೆಗೆ ತಿಂಗಳಿಗೆ ಶೇ. 1ರಷ್ಟು ಬಡ್ಡಿ: ಸೆಕ್ಷನ್ 234A ಪ್ರಕಾರ, ನೀವು ಸರ್ಕಾರಕ್ಕೆ ಪಾವತಿಸಬೇಕಾದ ತೆರಿಗೆ ಮೊತ್ತ ಬಾಕಿ ಉಳಿಸಿಕೊಂಡಿದ್ದು, ಜುಲೈ 31ರ ಒಳಗಾಗಿ ರಿಟರ್ನ್ಸ್ ಸಲ್ಲಿಸದಿದ್ದರೆ, ಆಗಸ್ಟ್ 1ರಿಂದ ಅನ್ವಯವಾಗುವಂತೆ ಐಟಿಆರ್ ಫೈಲ್ ಮಾಡುವವರೆಗಿನ ಅವಧಿಗೆ ಪ್ರತಿ ತಿಂಗಳು ಬಾಕಿ ಮೊತ್ತದ ಮೇಲೆ ಶೇ. 1ರಷ್ಟು ಬಡ್ಡಿ ಕಟ್ಟಬೇಕಾಗುತ್ತದೆ.
ವ್ಯಾಪಾರ ಅಥವಾ ಷೇರು ಮಾರುಕಟ್ಟೆ ನಷ್ಟ ಕ್ಯಾರಿ ಫಾರ್ವರ್ಡ್ ಮಾಡಲಾಗಲ್ಲ: ನಿಮಗೆ ಬಿಸಿನೆಸ್ ಅಥವಾ ಶೇರ್ ಮಾರ್ಕೆಟ್ನಲ್ಲಿ (Capital Gains) ಈ ವರ್ಷ ನಷ್ಟ ಉಂಟಾಗಿದ್ದರೆ, ಅದನ್ನು ಮುಂದಿನ ವರ್ಷದ ಲಾಭದ ಎದುರು ಹೊಂದಾಣಿಕೆ (Set-off) ಮಾಡಿಕೊಳ್ಳಲು ಜುಲೈ 31ರೊಳಗೆ ಐಟಿಆರ್ ಸಲ್ಲಿಸುವುದು ಅನಿವಾರ್ಯ. ತಡವಾಗಿ ರಿಟರ್ನ್ಸ್ ಸಲ್ಲಿಸಿದರೆ ಇಂತಹ ನಷ್ಟಗಳನ್ನು ಮುಂದಿನ ಆರ್ಥಿಕ ವರ್ಷಕ್ಕೆ ಕೊಂಡೊಯ್ಯುವ (Carry Forward) ಸೌಲಭ್ಯ ಸಿಗುವುದಿಲ್ಲ.
ಟ್ಯಾಕ್ಸ್ ರಿಫಂಡ್ ವಿಳಂಬ: ಹೆಚ್ಚುವರಿ ಟಿಡಿಎಸ್ (TDS) ಕಡಿತದಿಂದಾಗಿ ನೀವು ಸರ್ಕಾರದಿಂದ ರೀಫಂಡ್ ಪಡೆಯಬೇಕಿದ್ದರೆ, ಗಡುವಿನ ಒಳಗಾಗಿ ಅರ್ಜಿ ಸಲ್ಲಿಸುವುದರಿಂದ ಹಣ ಬೇಗನೆ ಬ್ಯಾಂಕ್ ಖಾತೆಗೆ ಜಮೆಯಾಗುತ್ತದೆ. ತಡ ಮಾಡಿದಷ್ಟೂ ರಿಫಂಡ್ ಪ್ರಕ್ರಿಯೆ ತಡವಾಗಿ ಹಣ ಕೈಸೇರುವುದು ವಿಳಂಬವಾಗುತ್ತದೆ.
ಹಳೆಯ ತೆರಿಗೆ ಪದ್ಧತಿಯ ಅವಕಾಶ ಕೈತಪ್ಪಲಿದೆ: ಜುಲೈ 31ರ ನಂತರ ವಿಳಂಬಿತ ರಿಟರ್ನ್ ಸಲ್ಲಿಸುವವರಿಗೆ ಹಳೆಯ ತೆರಿಗೆ ಪದ್ಧತಿಯನ್ನು (Old Tax Regime) ಆಯ್ದುಕೊಳ್ಳುವ ಹಕ್ಕು ಇರುವುದಿಲ್ಲ. ಅಂತಹ ತೆರಿಗೆದಾರರು ಕಡ್ಡಾಯವಾಗಿ ಹೊಸ ತೆರಿಗೆ ಪದ್ಧತಿಯಡಿಯಲ್ಲೇ (New Tax Regime) ಐಟಿಆರ್ ಸಲ್ಲಿಸಬೇಕಾಗುತ್ತದೆ.
ಜೈಲು ಶಿಕ್ಷೆಯ ಎಚ್ಚರಿಕೆ! ತೆರಿಗೆ ಇಲಾಖೆಯಿಂದ ನೋಟಿಸ್ ಬಂದ ಮೇಲೂ ಉದ್ದೇಶಪೂರ್ವಕವಾಗಿ ರಿಟರ್ನ್ಸ್ ಸಲ್ಲಿಸದೆ ತಪ್ಪಿಸಿಕೊಳ್ಳುವ ನುಣುಚಿಕೊಳ್ಳುವವರಿಗೆ ಸೆಕ್ಷನ್ 276CC ಅಡಿಯಲ್ಲಿ 3 ತಿಂಗಳಿಂದ 2 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಬಹುದು. ಬಾಕಿ ಇರುವ ತೆರಿಗೆ ಮೊತ್ತ ತೀರಾ ದೊಡ್ಡದಾಗಿದ್ದರೆ ಗರಿಷ್ಠ 7 ವರ್ಷಗಳವರೆಗೆ ಕಾರಾಗೃಹ ವಾಸ ಮತ್ತು ದಂಡ ವಿಧಿಸಲು ಕಾನೂನಿನಲ್ಲಿ ಪ್ರಾವಿಷನ್ ಇದೆ.
ಕೊನೆಯ ದಿನಗಳಲ್ಲಿ ಇಲಾಖೆಯ ವೆಬ್ಸೈಟ್ ಸರ್ವರ್ಗಳು ನಿಧಾನವಾಗುವ ಸಾಧ್ಯತೆ ದಟ್ಟವಾಗಿರುವುದರಿಂದ, ಇಂದೇ ನಿಮ್ಮ Form 16, Form 26AS ಮತ್ತು AIS ದಾಖಲೆಗಳನ್ನು ಪರಿಶೀಲಿಸಿ ತಕ್ಷಣವೇ ಐಟಿಆರ್ ಸಲ್ಲಿಸಿ ನಿಶ್ಚಿಂತರಾಗಿರಿ.
ಇದನ್ನೂ ಓದಿ: ಬ್ಯಾಂಕ್ ಖಾತೆಯಿಂದ ಸದ್ದಿಲ್ಲದೆ ಹಣ ಮಾಯವಾದರೆ ಇನ್ಮುಂದೆ ಆರ್ಬಿಐ ನೀಡಲಿದೆ ಪರಿಹಾರ!
