ನವದೆಹಲಿ: ಭಾರತೀಯ ಉಪಗ್ರಹ ಇಂಟರ್ನೆಟ್ ಮಾರುಕಟ್ಟೆಗೆ ಎಂಟ್ರಿ ನೀಡಲು ಎಲಾನ್ ಮಸ್ಕ್ (Elon Musk) ಒಡೆತನದ ‘ಸ್ಟಾರ್‌ಲಿಂಕ್’ ಸಂಸ್ಥೆ ಸಂಪೂರ್ಣವಾಗಿ ಸಿದ್ಧವಾಗಿದೆ. ಭಾರತದ ಮಾರುಕಟ್ಟೆ ಮತ್ತು ಸ್ಟಾರ್‌ಲಿಂಕ್ ಪ್ರವೇಶದ ಕುರಿತು ಎಲಾನ್ ಮಸ್ಕ್ ಇತ್ತೀಚೆಗೆ ನೀಡಿದ್ದ ಹೇಳಿಕೆಗೆ ರಿಲಯನ್ಸ್ ಇಂಡಸ್ಟ್ರೀಸ್ ನೀಡಿದ್ದ ಸ್ಪಷ್ಟನೆಗೆ ಸೋಮವಾರ ಪ್ರತಿಕ್ರಿಯಿಸಿರುವ ಸ್ಟಾರ್‌ಲಿಂಕ್, ತಾನು ಭಾರತೀಯ ನಿಯಮಾವಳಿಗಳು ಹಾಗೂ ಸರ್ಕಾರದ ಎಲ್ಲಾ ಅಗತ್ಯ ಅನುಮತಿಗಳನ್ನು ಪಡೆದೇ ಹೆಜ್ಜೆ ಇಡುತ್ತಿರುವುದಾಗಿ ತಿಳಿಸಿದೆ.
ನಿಯಮಾವಳಿಗಳ ಪಾಲನೆ ಹಾಗೂ ಮೂಲಸೌಕರ್ಯ ಸಿದ್ಧ
ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ (X) ಈ ಕುರಿತು ಮಾಹಿತಿ ಹಂಚಿಕೊಂಡಿರುವ ಸ್ಟಾರ್‌ಲಿಂಕ್, ಕಳೆದ 5ಕ್ಕೂ ಹೆಚ್ಚು ವರ್ಷಗಳಿಂದ ಭಾರತದ ನಿಯಂತ್ರಕ ಸಂಸ್ಥೆಗಳು, ಉದ್ಯಮ ಕ್ಷೇತ್ರದ ಗಣ್ಯರು ಹಾಗೂ ಟೆಲಿಕಾಂ ಆಪರೇಟರ್‌ಗಳೊಂದಿಗೆ ನಿಕಟವಾಗಿ ಕೆಲಸ ಮಾಡುತ್ತಿರುವುದಾಗಿ ಸ್ಪಷ್ಟಪಡಿಸಿದೆ. ಭಾರತೀಯ ಗ್ರಾಹಕರ ಡೇಟಾ ಸುರಕ್ಷತೆ ಮತ್ತು ಭದ್ರತೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು, ದೇಶದ ಒಳಗಡೆಯೇ ಮೀಸಲಾದ ವ್ಯವಸ್ಥೆಗಳು, ಗೇಟ್‌ವೇಗಳು ಹಾಗೂ ಅಗತ್ಯ ಮೂಲಸೌಕರ್ಯ ಜಾಲವನ್ನು ಅಭಿವೃದ್ಧಿಪಡಿಸಲಾಗಿದೆ. ಭಾರತ ಸರ್ಕಾರ ನಿಗದಿಪಡಿಸಿರುವ ಎಲ್ಲಾ ಕಾನೂನುಬದ್ಧ ಅನುಮೋದನೆಗಳೊಂದಿಗೆ ಭಾರತದ ಮೂಲೆ ಮೂಲೆಗೂ ವೇಗದ ಉಪಗ್ರಹ ಇಂಟರ್ನೆಟ್ ಸಂಪರ್ಕ ಕಲ್ಪಿಸಲು ಸ್ಟಾರ್‌ಲಿಂಕ್ ಸಜ್ಜಾಗಿದೆ ಎಂದು ಸಂಸ್ಥೆ ತಿಳಿಸಿದೆ.
ರಿಲಯನ್ಸ್ ಇಂಡಸ್ಟ್ರೀಸ್ ಹೇಳಿಕೆಗೆ ಸ್ಟಾರ್‌ಲಿಂಕ್ ಉತ್ತರ
ಸ್ಟಾರ್‌ಲಿಂಕ್ ಭಾರತಕ್ಕೆ ಪ್ರವೇಶಿಸುವ ವಿಚಾರವಾಗಿ ಹಾಗೂ ಎಲಾನ್ ಮಸ್ಕ್ ನೀಡಿದ್ದ ಹೇಳಿಕೆಗೆ ಶುಕ್ರವಾರ ರಿಲಯನ್ಸ್ ಇಂಡಸ್ಟ್ರೀಸ್ ಪ್ರತಿಕ್ರಿಯೆ ನೀಡಿತ್ತು. ತಮಗೆ ಯಾವುದೇ ಉದ್ಯಮದಲ್ಲೂ ಸ್ಪರ್ಧೆಯನ್ನು ಎದುರಿಸಲು ಭಯವಿಲ್ಲ, ಆದರೆ ಭಾರತದಲ್ಲಿ ಸೇವೆ ಸಲ್ಲಿಸುವ ಪ್ರತಿಯೊಂದು ವಿದೇಶಿ ಸಂಸ್ಥೆಯೂ ದೇಶದ ಕಾನೂನು, ನಿಯಮಾವಳಿಗಳು ಹಾಗೂ ನೀತಿಗಳಿಗೆ ಬದ್ಧವಾಗಿರಬೇಕು ಎಂದು ರಿಲಯನ್ಸ್ ಹೇಳಿತ್ತು. ಈ ಹೇಳಿಕೆಗೆ ತಿರುಗೇಟು ನೀಡಿರುವ ಸ್ಟಾರ್‌ಲಿಂಕ್, ತಾವು ಭಾರತದ ಕಾನೂನು ಹಾಗೂ ನಿಯಮಾವಳಿಗಳ ವ್ಯಾಪ್ತಿಯಲ್ಲೇ ಕಾರ್ಯಾಚರಣೆ ನಡೆಸಲು ಬದ್ಧರಾಗಿದ್ದೇವೆ ಎಂಬುದನ್ನು ಮರುಉಚ್ಚರಿಸಿದೆ.
ಭಾರತೀಯ ಟೆಲಿಕಾಂ ರಂಗದಲ್ಲಿ ಉಪಗ್ರಹ ಆಧಾರಿತ ಇಂಟರ್ನೆಟ್ (Satellite Internet) ಸೇವೆ ಒದಗಿಸಲು ಜಾಗತಿಕ ದೈತ್ಯ ಸಂಸ್ಥೆಗಳ ನಡುವೆ ತೀವ್ರ ಸ್ಪರ್ಧೆ ಏರ್ಪಟ್ಟಿದ್ದು, ಸ್ಟಾರ್‌ಲಿಂಕ್ ಕಂಪನಿಯ ಈ ಸ್ಪಷ್ಟನೆಯು ಭಾರತದಲ್ಲಿ ಶೀಘ್ರದಲ್ಲೇ ಹೈ-ಸ್ಪೀಡ್ ಸ್ಯಾಟಲೈಟ್ ಇಂಟರ್ನೆಟ್ ಸೇವೆ ಆರಂಭವಾಗುವ ಮುನ್ಸೂಚನೆ ನೀಡಿದೆ.
ಇದನ್ನೂ ಓದಿ: ಭಾರತದಲ್ಲೂ ಬಾಂಗ್ಲಾದೇಶ ಮಾದರಿಯ ದಂಗೆಗೆ ಸಂಚು: ಪ್ರತಿಭಟನಾಕಾರರ ವಿರುದ್ಧ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಗಂಭೀರ ಆರೋಪ
