ಚೆನ್ನೈ: ತಮಿಳು ಚಿತ್ರರಂಗದ ಖ್ಯಾತ ಹಿನ್ನೆಲೆ ಗಾಯಕ ಕೃಷ್ಣರಾಜ್ (75) ಅವರು ಗುರುವಾರ (ಅಕ್ಟೋಬರ್ 22) ಚೆನ್ನೈನಲ್ಲಿ ನಿಧನರಾಗಿದ್ದಾರೆ. ಪ್ರಸಿದ್ಧ ಸಂಗೀತ ನಿರ್ದೇಶಕ ದೇವಾ ಅವರ ಆಪ್ತ ಸಹೋದ್ಯೋಗಿಯಾಗಿದ್ದ (Kollywood) ಕೃಷ್ಣರಾಜ್, ದೇವಾ ಅವರ ಅಗಲಿಕೆಯ ಕೆಲವೇ ದಿನಗಳಲ್ಲಿ ಕೊನೆಯುಸಿರೆಳೆದಿರುವುದು ತಮಿಳು ಚಿತ್ರರಂಗ ಹಾಗೂ ಸಂಗೀತ ಪ್ರಿಯರನ್ನು ತೀವ್ರ ಆಘಾತಕ್ಕೆ ಈಡುಮಾಡಿದೆ. ಅವರ ಸಾವಿಗೆ ನಿಖರವಾದ ಕಾರಣ ಇನ್ನೂ ತಿಳಿದುಬಂದಿಲ್ಲವಾದರೂ, ಗಾಯಕರ ಅಗಲಿಕೆಗೆ ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್, ಹಿರಿಯ ನಟ ಶರತ್ ಕುಮಾರ್ ಸೇರಿದಂತೆ ಹಲವು ಗಣ್ಯರು ಕಂಬನಿ ಮಿಡಿದಿದ್ದಾರೆ.
ತಮಿಳುನಾಡು ಸಿಎಂ ವಿಜಯ್ ಮತ್ತು ಗಣ್ಯರ ಸಂತಾಪ
ಗಾಯಕ ಕೃಷ್ಣರಾಜ್ ಅವರ ನಿಧನಕ್ಕೆ ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. “ಖ್ಯಾತ ಹಿನ್ನೆಲೆ ಗಾಯಕ ಕೃಷ್ಣರಾಜ್ ಅವರ ನಿಧನದ ಸುದ್ದಿ ಕೇಳಿ ನನಗೆ ತೀವ್ರ ಆಘಾತ ಮತ್ತು ದುಃಖವಾಗಿದೆ. ತಮ್ಮ ವಿಶಿಷ್ಟ ಧ್ವನಿ ಮತ್ತು ಉತ್ಸಾಹಭರಿತ ಹಾಡುಗಳ ಮೂಲಕ ಕೃಷ್ಣರಾಜ್ ಅವರು ಕೋಟ್ಯಂತರ ಸಂಗೀತ ಪ್ರಿಯರ ಮನಗೆದ್ದಿದ್ದರು. ಅವರ ಅಗಲಿಕೆಯು ತಮಿಳು ಚಿತ್ರರಂಗಕ್ಕೆ ತುಂಬಲಾರದ ನಷ್ಟವಾಗಿದೆ. ಅವರ ಕುಟುಂಬ, ಸ್ನೇಹಿತರು ಮತ್ತು ಅಭಿಮಾನಿಗಳಿಗೆ ನನ್ನ ಆಳವಾದ ಸಂತಾಪಗಳು” ಎಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
தமிழ்த் திரையுலகின் பிரபல பின்னணிப் பாடகர் திரு. கிருஷ்ணராஜ் அவர்களின் மறைவுச் செய்தி கேட்டு அதிர்ச்சியும், மனவேதனையும் அடைந்தேன். தன்னுடைய தனித்துவமான குரலாலும், உற்சாகம் ததும்பும் பாடல்களாலும் ரசிகர்களின் இதயங்களைக் கவர்ந்த பின்னணிப் பாடகர் திரு. கிருஷ்ணராஜ் அவர்களின் மறைவு தமிழ்த் திரையுலகிற்குப் பேரிழப்பாகும். அவரை இழந்துவாடும் குடும்பத்தினர், உறவினர்கள், நண்பர்கள், திரைத்துறையினர் மற்றும் இசை ரசிகர்கள் அனைவருக்கும் எனது ஆழ்ந்த இரங்கலையும், ஆறுதலையும் தெரிவித்துக் கொள்கிறேன்.
— CMOTamilNadu (@CMOTamilnadu) October 22, 2026
ಖ್ಯಾತ ನಟ ಶರತ್ ಕುಮಾರ್ ಅವರು ಸೋಶಿಯಲ್ ಮೀಡಿಯಾದಲ್ಲಿ ಗಾಯಕನ ನೆನಪುಗಳನ್ನು ಹಂಚಿಕೊಂಡು ತೀವ್ರ ದುಃಖ ವ್ಯಕ್ತಪಡಿಸಿದ್ದಾರೆ. “ನನ್ನ ನಟನೆಯ ‘ವಿಣ್ಣುಕ್ಕುಮ್ ಮಣ್ಣುಕ್ಕುಮ್’ ಚಿತ್ರದ ‘ಪಾಸಮುಳ್ಳ ಸೂರ್ಯನೇ’, ‘ಸಿಮ್ಮರಸಿ’ ಚಿತ್ರದ ‘ತಾಯೇ ತೇರಿಸೂಲಿ’, ‘ಮೂವೇಂದರ್’ ಚಿತ್ರದ ‘ಸೊಕ್ಕು ಸುಂದರಿ’, ಮತ್ತು ‘ನಟ್ಪುಕ್ಕಾಗ’ ಚಿತ್ರದ ‘ಗರುಡ ಗರುಡ’ ಹಾಡುಗಳು ಕೃಷ್ಣರಾಜ್ ಅವರ ಕಂಠದಲ್ಲಿ ಮೂಡಿಬಂದು ನನ್ನ ಹೃದಯಕ್ಕೆ ಅತ್ಯಂತ ಹತ್ತಿರವಾಗಿದ್ದವು” ಎಂದು ಶರತ್ ಕುಮಾರ್ ಸ್ಮರಿಸಿದ್ದಾರೆ. ಹಾಗೆಯೇ ಗಾಯಕಿ ಚಿನ್ಮಯಿ ಶ್ರೀಪಾದ್ ಕೂಡ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ, “ಓ ದೇವರೇ, ಇದು ನಿಜಕ್ಕೂ ಅತ್ಯಂತ ಕಠಿಣವಾದ ವಾರ” ಎಂದು ಕಂಬನಿ ಮಿಡಿದಿದ್ದಾರೆ.
ದೇವಾ ಜೊತೆಗಿನ ಯಶಸ್ವಿ ಪಯಣ ಹಾಗೂ 300ಕ್ಕೂ ಹೆಚ್ಚು ಹಾಡುಗಳು
ಗಾಯಕ ಕೃಷ್ಣರಾಜ್ ಅವರು ತಮ್ಮ ಸುದೀರ್ಘ ಸಂಗೀತ ವೃತ್ತಿಜೀವನದಲ್ಲಿ ತಮಿಳು ಚಿತ್ರರಂಗವೊಂದರಲ್ಲೇ 300ಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿ ಸೈ ಎನಿಸಿಕೊಂಡಿದ್ದರು. ವಿಶೇಷವಾಗಿ ಸಂಗೀತ ನಿರ್ದೇಶಕ ದೇವಾ ಅವರ ಜೊತೆಗಿನ ಇವರ ಕಾಂಬಿನೇಷನ್ ತಮಿಳುನಾಡಿನಲ್ಲಿ ಭಾರಿ ಸಂಚಲನ ಮೂಡಿಸಿತ್ತು. ‘ವೆಳ್ಳರಿಕ್ಕಾ’, ‘ಮೀಸಕ್ಕಾರ ನನ್ಬಾ’ (ಸ್ಯಾಡ್ ವರ್ಷನ್), ‘ಕಾತ್ತಡಿಕ್ಕುತು ಕಾತ್ತಡಿಕ್ಕುತು’ ಮತ್ತು ‘ಗೋಪಾಲ ಗೋಪಾಲ’ ಮುಂತಾದ ಜನಪ್ರಿಯ ಹಿಟ್ ಹಾಡುಗಳು ಇಂದಿಗೂ ಸಂಗೀತ ಪ್ರಿಯರ ನೆಚ್ಚಿನ ಗೀತೆಗಳಾಗಿ ಉಳಿದುಕೊಂಡಿವೆ. ತಮ್ಮ ಭಾವಪೂರ್ಣ ಧ್ವನಿಯ ಮೂಲಕ ಕೋಟ್ಯಂತರ ಮನಸ್ಸುಗಳನ್ನು ತಲುಪಿದ್ದ ಕೃಷ್ಣರಾಜ್ ಅವರು, ತಮ್ಮ ಅಮರ ಗೀತೆಗಳ ಮೂಲಕ ಸಂಗೀತ ಪ್ರಿಯರ ನೆನಪಿನಲ್ಲಿ ಎಂದೆಂದಿಗೂ ಜೀವಂತವಾಗಿರುತ್ತಾರೆ.
ಇದನ್ನೂ ಓದಿ: ಮೈಸೂರು ದಸರಾದಲ್ಲಿ ‘ಡಿ-ಬಾಸ್’ ಜಪ: ಸಂಚಾರ ನಿಯಮ ಮೀರಿದ ಅಭಿಮಾನಿಗಳಿಗೆ ಕ್ಲಾಸ್ ತಗೆದುಕೊಂಡ ಮಹಿಳಾ ಆಫೀಸರ್
