ಪಲಮನೇರ್: ಮಾನವರಿಗೆ ಇರುವ ಆಧಾರ್ ಕಾರ್ಡ್ ಮಾದರಿಯಲ್ಲೇ ಈಗ ಆನೆಗಳಿಗೂ ಒಂದು ವಿಶಿಷ್ಟ ಗುರುತಿನ ದಾಖಲೆ ಸಿದ್ಧವಾಗುತ್ತಿದೆ. ಆಂಧ್ರಪ್ರದೇಶದ ಚಿತ್ತೂರು ಜಿಲ್ಲೆಯ ಪಲಮನೇರ್ನಲ್ಲಿರುವ ಕೌಂಡಿನ್ಯ ಅಭಯಾರಣ್ಯದಲ್ಲಿರುವ ‘ಕುಮ್ಕಿ’ ಆನೆಗಳಿಗೆ (Elephant) ಡಿಎನ್ಎ ಪ್ರೊಫೈಲಿಂಗ್ (DNA Profiling) ಮಾಡುವ ಪ್ರಕ್ರಿಯೆಗೆ ಚಾಲನೆ ನೀಡುವ ಮೂಲಕ ಅರಣ್ಯ ಇಲಾಖೆ ಹೊಸ ಇತಿಹಾಸ ಬರೆದಿದೆ.
ಕರ್ನಾಟಕದ ಆನೆಗಳಿಗೆ ಜೈವಿಕ ದಾಖಲಾತಿ: ಪ್ರಸ್ತುತ ಪಲಮನೇರ್ ಕ್ಯಾಂಪ್ನಲ್ಲಿರುವ ಜಯಂತ, ರಂಜನ್, ಅಭಿಮನ್ಯು, ಕೃಷ್ಣ, ದೇವ ಮತ್ತು ವಿನಯ್ ಎಂಬ ಆರು ಕುಮ್ಕಿ ಆನೆಗಳ ಮೇಲೆ ಈ ಪ್ರಯೋಗ ನಡೆಯುತ್ತಿದೆ. ಮೂಲತಃ ಕರ್ನಾಟಕದ ಅರಣ್ಯಗಳಿಂದ ತರಬೇತಿ ಪಡೆದು ಬಂದಿರುವ ಈ ಆನೆಗಳು, ಕಾಡಾನೆಗಳ ಹಾವಳಿಯನ್ನು ನಿಯಂತ್ರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ಈ ಆನೆಗಳ ರಕ್ತದ ಮಾದರಿಗಳನ್ನು ಸಂಗ್ರಹಿಸಿ ಡೆಹ್ರಾಡೂನ್ನ ಭಾರತೀಯ ವನ್ಯಜೀವಿ ಸಂಸ್ಥೆಗೆ (WII) ಹೆಚ್ಚಿನ ವಿಶ್ಲೇಷಣೆಗಾಗಿ ಕಳುಹಿಸಿಕೊಡಲಾಗಿದೆ.
ಆನೆಗಳ ಆಧಾರ್: ಇದರ ಉಪಯೋಗವೇನು? ಈ ವೈಜ್ಞಾನಿಕ ತಪಾಸಣೆಯ ನಂತರ ಪ್ರತಿ ಆನೆಗೂ ಪ್ರತ್ಯೇಕ ಗುರುತಿನ ಚೀಟಿ ಸಿಗಲಿದೆ. ಇದರಲ್ಲಿ ಆನೆಯ ಡಿಎನ್ಎ ಮಾಹಿತಿ ಮಾತ್ರವಲ್ಲದೆ, ಅದರ ವಂಶವಾಹಿ ಇತಿಹಾಸ, ಆರೋಗ್ಯದ ಸ್ಥಿತಿಗತಿ ಮತ್ತು ಬರಬಹುದಾದ ಅನುವಂಶಿಕ ಕಾಯಿಲೆಗಳ ಬಗ್ಗೆ ಸಂಪೂರ್ಣ ದತ್ತಾಂಶ ಇರಲಿದೆ. ಇದರಿಂದ ಆನೆಗಳಿಗೆ ಯಾವುದಾದರೂ ಆರೋಗ್ಯ ಸಮಸ್ಯೆ ಎದುರಾದಾಗ ಅಥವಾ ವೃದ್ಧಾಪ್ಯದ ಹಂತದಲ್ಲಿ ನಿಖರವಾದ ಚಿಕಿತ್ಸೆ ನೀಡಲು ವೈದ್ಯರಿಗೆ ಸಹಕಾರಿಯಾಗಲಿದೆ.
ವೈಜ್ಞಾನಿಕ ನಿರ್ವಹಣೆಗೆ ಒತ್ತು: ಪಲಮನೇರ್ ಅರಣ್ಯ ಭಾಗದಲ್ಲಿ ಮಾನವ ಮತ್ತು ಆನೆಗಳ ನಡುವಿನ ಸಂಘರ್ಷ ಹೆಚ್ಚಾಗಿರುವುದರಿಂದ, ಕುಮ್ಕಿ ಆನೆಗಳ ದೈಹಿಕ ಸಾಮರ್ಥ್ಯವನ್ನು ಅರಿಯುವುದು ಅತ್ಯಗತ್ಯ. ಕೇವಲ ನೋಟಕ್ಕೆ ಗಟ್ಟಿಮುಟ್ಟಾಗಿರುವ ಆನೆಗಳನ್ನು ಕಾರ್ಯಾಚರಣೆಗೆ ಬಳಸುವ ಬದಲು, ಜೈವಿಕವಾಗಿ ಅವು ಎಷ್ಟು ಸಶಕ್ತವಾಗಿವೆ ಎಂಬ ಮಾಹಿತಿಯನ್ನು ಆಧರಿಸಿ ಇನ್ನು ಮುಂದೆ ಕಾರ್ಯಾಚರಣೆಗಳನ್ನು ಕೈಗೊಳ್ಳಲಾಗುವುದು. ಈ ಹೈಟೆಕ್ ವ್ಯವಸ್ಥೆಯು ದೇಶದ ಇತರ ಆನೆ ಶಿಬಿರಗಳಿಗೂ ಹೊಸ ದಿಶೆ ತೋರಿಸುವ ನಿರೀಕ್ಷೆಯಿದೆ.
ಇದನ್ನೂ ಓದಿ: ಬಡವರ ಜೇಬಿಗೆ ಹೊರೆಯಿಲ್ಲ: ಬಿಪಿ, ಸಕ್ಕರೆ ಕಾಯಿಲೆ ಸೇರಿ 42 ಔಷಧಗಳ ದರ ಇಳಿಸಿದ ಕೇಂದ್ರ ಸರ್ಕಾರ
