ಬೆಂಗಳೂರು: ರಾಜ್ಯದ ಗೃಹ ಸಚಿವರಾಗಿ ಅಧಿಕಾರ ವಹಿಸಿಕೊಂಡ ಬೆನ್ನಲ್ಲೇ ಪ್ರಿಯಾಂಕ್ ಖರ್ಗೆ(Priyank Kharge) ಅವರು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (RSS) ವಿರುದ್ಧ ತಮ್ಮ ರಾಜಕೀಯ ವಾಗ್ದಾಳಿಯನ್ನು ತೀವ್ರಗೊಳಿಸಿದ್ದಾರೆ. ಈ ಹಿಂದಿನ ಸಿದ್ದರಾಮಯ್ಯ ಸಂಪುಟದಲ್ಲೂ ಆರ್ಎಸ್ಎಸ್ ಸಿದ್ಧಾಂತಗಳನ್ನು ಕಟುವಾಗಿ ವಿರೋಧಿಸುತ್ತಿದ್ದ ಖರ್ಗೆ, ಈಗ ಇಲಾಖೆಯ ಉಸ್ತುವಾರಿ ಸಿಗುತ್ತಿದ್ದಂತೆ ಸಂಘದ ಮುಖ್ಯಸ್ಥರಾದ (ಸರಸಂಘಚಾಲಕ) ಮೋಹನ್ ಭಾಗವತ್ ಅವರಿಗೆ ಪತ್ರವೊಂದನ್ನು ಬರೆಯುವ ಮೂಲಕ ನೇರ ಸವಾಲು ಹಾಕಿದ್ದಾರೆ.
ಸಂಘಟನೆಯು ಯಶಸ್ವಿಯಾಗಿ 100 ವರ್ಷಗಳನ್ನು ಪೂರೈಸಿರುವುದಕ್ಕೆ ಪತ್ರದಲ್ಲಿ ಶುಭ ಹಾರೈಸುತ್ತಲೇ, ಅದರ ಕಾನೂನಾತ್ಮಕ ಅಸ್ತಿತ್ವ, ಆರ್ಥಿಕ ವ್ಯವಹಾರಗಳು ಹಾಗೂ ಸಾರ್ವಜನಿಕ ಪಾರದರ್ಶಕತೆಯನ್ನು ಪ್ರಶ್ನಿಸಿ 8 ಪ್ರಮುಖ ಸವಾಲುಗಳನ್ನು ಒಡ್ಡಿದ್ದಾರೆ.
100ನೇ ವರ್ಷದ ಶುಭಾಶಯ; ಕಾನೂನು (Priyank Kharge) ಪಾಲನೆಯ ನೆನಪು!
ರಾಷ್ಟ್ರೀಯ ಸ್ವಯಂಸೇವಕ ಸಂಘವು ಶತಮಾನೋತ್ಸವದ ಸಂಭ್ರಮದಲ್ಲಿರುವುದನ್ನು ಸ್ಮರಿಸಿರುವ ಪ್ರಿಯಾಂಕ್ ಖರ್ಗೆ, ಸಂಸ್ಥೆಯ ಬೃಹತ್ ನೆಟ್ವರ್ಕ್ ಅನ್ನು ಪ್ರಸ್ತಾಪಿಸಿ ಹೊಣೆಗಾರಿಕೆಯ ಪಾಠ ಮಾಡಿದ್ದಾರೆ. “ಭಾರತ ಮಾತ್ರವಲ್ಲದೆ ವಿದೇಶಗಳಲ್ಲೂ 60,000ಕ್ಕೂ ಹೆಚ್ಚು ಶಾಖೆಗಳನ್ನು ಹಾಗೂ ಕೋಟ್ಯಂತರ ಕಾರ್ಯಕರ್ತರನ್ನು ಹೊಂದಿರುವ ಆರ್ಎಸ್ಎಸ್, ಸಮಾಜದ ಮೇಲೆ ಭಾರಿ ಪ್ರಭಾವ ಬೀರುತ್ತಿದೆ. ಇಷ್ಟು ಬೃಹತ್ ಮಟ್ಟದಲ್ಲಿ ಕಾರ್ಯನಿರ್ವಹಿಸುವ ಸಂಸ್ಥೆಯು ಸಾಂವಿಧಾನಿಕ ನಿಯಮಗಳು, ಪಾರದರ್ಶಕತೆ ಹಾಗೂ ಸಾರ್ವಜನಿಕ ಹೊಣೆಗಾರಿಕೆಯ ಅತ್ಯುನ್ನತ ಮಾನದಂಡಗಳನ್ನು ಕಡ್ಡಾಯವಾಗಿ ಪಾಲಿಸಬೇಕಾಗುತ್ತದೆ” ಎಂದು ಪತ್ರದಲ್ಲಿ ನೆನಪಿಸಿದ್ದಾರೆ.
ಕಾನೂನು ಎಲ್ಲರಿಗೂ ಒಂದೇ; ಆರ್ಎಸ್ಎಸ್ಗೆ ವಿನಾಯಿತಿ ಏಕೆ?
ದೇಶದಾದ್ಯಂತ ಶಿಸ್ತು, ಕರ್ತವ್ಯ ಮತ್ತು ರಾಷ್ಟ್ರೀಯತೆಯ ಬಗ್ಗೆ ಭಾಷಣ ಮಾಡುವ ಆರ್ಎಸ್ಎಸ್, ಭಾರತದ ಸಂವಿಧಾನಕ್ಕೆ ಅಷ್ಟೇ ಗೌರವ ನೀಡಬೇಕು ಎಂದು ಗೃಹ ಸಚಿವರು ಪ್ರತಿಪಾದಿಸಿದ್ದಾರೆ. “ದೇಶದಲ್ಲಿ ಬಡ ಕಾರ್ಮಿಕರು, ಸಣ್ಣಪುಟ್ಟ ಸಂಘ ಸಂಸ್ಥೆಗಳು, ಧಾರ್ಮಿಕ ಟ್ರಸ್ಟ್ಗಳು ಹಾಗೂ ಎನ್ಜಿಒಗಳು ಸರ್ಕಾರದ ನಿಯಮಾವಳಿಗಳ ಪ್ರಕಾರ ಕಡ್ಡಾಯವಾಗಿ ನೋಂದಣಿ ಮಾಡಿಸಿಕೊಂಡು, ಲೆಕ್ಕಪರಿಶೋಧನೆ (ಆಡಿಟಿಂಗ್) ನಡೆಸಿ, ಸಕಾಲಕ್ಕೆ ತೆರಿಗೆ ಪಾವತಿಸುತ್ತಿವೆ. ಇತರರು ನಿಯಮ ಪಾಲಿಸಬೇಕು ಎಂದು ಬಯಸುವ ಆರ್ಎಸ್ಎಸ್, ತನಗೆ ಮಾತ್ರ ಕಾನೂನಿನಿಂದ ವಿನಾಯಿತಿ ಪಡೆದುಕೊಳ್ಳುವುದು ಸಾಂವಿಧಾನಿಕವಾಗಿ ಸರಿಯಲ್ಲ. ಸಂಘವು ದೇಶದ ಕಾನೂನಿಗೆ ಗೌರವ ಕೊಟ್ಟು ಅಧಿಕೃತವಾಗಿ ನೋಂದಣಿ ಮಾಡಿಸಿಕೊಳ್ಳಬೇಕು” ಎಂದು ಒತ್ತಾಯಿಸಿದ್ದಾರೆ.
ಮೋಹನ್ ಭಾಗವತ್ ಅವರಿಗೆ ಗೃಹ ಸಚಿವರು ಕೇಳಿದ 8 ಕಠಿಣ ಪ್ರಶ್ನೆಗಳು:
- ಆರ್ಎಸ್ಎಸ್ನ ಅಧಿಕೃತ ಕಾನೂನಾತ್ಮಕ ಸ್ಥಾನಮಾನ ಹಾಗೂ ಅದರ ಸಾಂಸ್ಥಿಕ ರಚನೆಯ ಸಂಪೂರ್ಣ ವಿವರಗಳೇನು?
- ಸಂಘದ ಪ್ರಸ್ತುತ ಪದಾಧಿಕಾರಿಗಳು ಹಾಗೂ ಅದರ ಅಧಿಕೃತ ಪ್ರತಿನಿಧಿಗಳು ಯಾರು?
- ಸಂಘಟನೆಗೆ ಹರಿದುಬರುವ ಒಟ್ಟು ಆದಾಯ, ಕೊಡುಗೆಗಳು ಹಾಗೂ ಗುರುದಕ್ಷಿಣೆ/ದೇಣಿಗೆಗಳ ಮೂಲ ಯಾವುದು?
- ಆರ್ಎಸ್ಎಸ್ ಹೆಸರಿನಲ್ಲಿರುವ ಒಟ್ಟು ವೆಚ್ಚಗಳು ಮತ್ತು ಅದರ ಆಸ್ತಿಪಾಸ್ತಿಗಳ ನಿಖರ ವಿವರಗಳೇನು?
- ದೇಶದ ಪ್ರಚಲಿತ ಕಾನೂನುಗಳ ಅನ್ವಯ ಸಂಘಕ್ಕೆ ಸಂಬಂಧಿಸಿದ ಎಲ್ಲಾ ತೆರಿಗೆಗಳನ್ನು ನಿಯಮಿತವಾಗಿ ಪಾವತಿಸಲಾಗುತ್ತಿದೆಯೇ?
- ಯಾವುದೇ ರೀತಿಯ ಔಪಚಾರಿಕ ನೋಂದಣಿ ಇಲ್ಲದಿದ್ದರೂ ಇಷ್ಟು ದಶಕಗಳ ಕಾಲ ಸಾರ್ವಜನಿಕವಾಗಿ ಚಟುವಟಿಕೆ ನಡೆಸಲು ಸಂಘಕ್ಕಿರುವ ಕಾನೂನಾತ್ಮಕ ಆಧಾರವೇನು?
- ಸಾರ್ವಜನಿಕ ಹೊಣೆಗಾರಿಕೆ ಇಲ್ಲದೆ ಇಷ್ಟು ಬೃಹತ್ ಮಟ್ಟದಲ್ಲಿ ಕಾರ್ಯಾಚರಣೆ ನಡೆಸುವ ಹಕ್ಕನ್ನು ಯಾವ ಸಾಂವಿಧಾನಿಕ ಚೌಕಟ್ಟಿನ ಅಡಿಯಲ್ಲಿ ಪಡೆಯಲಾಗಿದೆ?
- ಸಂಘವು ನಡೆಸುವ ಬಹಿರಂಗ ಸಭೆಗಳು, ಪಥ ಸಂಚಲನಗಳು ಹಾಗೂ ಇತರೆ ಸಾಮೂಹಿಕ ಚಟುವಟಿಕೆಗಳಿಗೆ ಸರ್ಕಾರದ ಇಲಾಖೆಗಳಿಂದ ಪಡೆಯಲಾಗುವ ಅಧಿಕೃತ ಅನುಮತಿಗಳ ಪ್ರಕ್ರಿಯೆ ಹೇಗಿರುತ್ತದೆ?
ಮಾತುಕತೆಗೆ ಸರ್ಕಾರ ಸಿದ್ಧ: ಸಂಘದ ಪ್ರತಿಕ್ರಿಯೆಗೆ ಕಾಯುತ್ತಿರುವ ಖರ್ಗೆ
ಆರ್ಎಸ್ಎಸ್ ಇನ್ಮುಂದೆಯಾದರೂ ಭಾರತದ ಕಾನೂನಿನ ಚೌಕಟ್ಟಿಗೆ ಒಳಪಟ್ಟು ಪಾರದರ್ಶಕತೆಯಿಂದ ಕೆಲಸ ಮಾಡಲಿ ಎಂದು ಆಶಿಸಿರುವ ಗೃಹ ಸಚಿವರು, ಈ ಎಲ್ಲಾ ಗೊಂದಲಗಳ ನಿವಾರಣೆಗಾಗಿ ಮುಖಾಮುಖಿ ಚರ್ಚೆಗೆ ತಾವು ಸಿದ್ಧರಿರುವುದಾಗಿ ತಿಳಿಸಿದ್ದಾರೆ. ಈ ವಿಷಯವಾಗಿ ಸರ್ಕಾರದೊಂದಿಗೆ ಅಧಿಕೃತವಾಗಿ ಮಾತುಕತೆ ನಡೆಸಲು ಸಂಘದ ವತಿಯಿಂದ ಪ್ರತಿನಿಧಿಗಳನ್ನು ಕಳುಹಿಸಿಕೊಡಬೇಕು ಎಂದು ವಿನಂತಿಸಿರುವ ಅವರು, ಮೋಹನ್ ಭಾಗವತ್ ಅವರಿಂದ ಸಕಾರಾತ್ಮಕ ಉತ್ತರ ನಿರೀಕ್ಷಿಸುವುದಾಗಿ ಪತ್ರವನ್ನು ಮುಕ್ತಾಯಗೊಳಿಸಿದ್ದಾರೆ.
