ಹೈದರಾಬಾದ್: ತೆಲುಗು ಚಿತ್ರರಂಗದ ದೃಶ್ಯಕಾವ್ಯಗಳ ದಂತಕಥೆ ಎಂದೇ ಹೆಸರಾಗಿರುವ 84 ವರ್ಷದ ಹಿರಿಯ ನಿರ್ದೇಶಕ ಕೆ. ರಾಘವೇಂದ್ರ ರಾವ್ ಅವರ ವರ್ತನೆ ಈಗ (Tollywood) ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಹಾಗೂ ಟೀಕೆಗೆ ಈಡಾಗಿದೆ. ಖ್ಯಾತ ನಿರ್ದೇಶಕ ಅನಿಲ್ ರವಿಪುಡಿ ಅವರ ಮುಂಬರುವ ಹೊಸ ಸಿನಿಮಾದ ಮುಹೂರ್ತ ಸಮಾರಂಭದ ವಿಡಿಯೋವೊಂದು ಗುರುವಾರ ‘ಎಕ್ಸ್’ (ಟ್ವಿಟರ್) ವೇದಿಕೆಯಲ್ಲಿ ವೈರಲ್ ಆಗಿದ್ದು, ಅದರಲ್ಲಿ ರಾಘವೇಂದ್ರ ರಾವ್ ಅವರು ನಟಿಯರಾದ ಕೀರ್ತಿ ಸುರೇಶ್ ಮತ್ತು ಕೃತಿ ಶೆಟ್ಟಿ ಅವರ ಕೈಗಳನ್ನು ಹಿಡಿದು ತಮ್ಮತ್ತ ಎಳೆದುಕೊಂಡಿರುವುದು ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ.
ಹೈದರಾಬಾದ್ನಲ್ಲಿ ನಡೆದ ಅನಿಲ್ ರವಿಪುಡಿ ಅವರ ಹೊಸ ಚಿತ್ರದ ಮುಹೂರ್ತಕ್ಕೆ ತೆಲುಗು ಚಿತ್ರರಂಗದ ಘಟಾನುಘಟಿಗಳು ಆಗಮಿಸಿದ್ದರು. ಈ ಚಿತ್ರದಲ್ಲಿ ವಿಕ್ಟರಿ ವೆಂಕಟೇಶ್ ಹಾಗೂ ನಂದಮೂರಿ ಕಲ್ಯಾಣ್ರಾಮ್ ಪ್ರಮುಖ ಪಾತ್ರಗಳಲ್ಲಿದ್ದು, ಕೀರ್ತಿ ಸುರೇಶ್ ಮತ್ತು ಕೃತಿ ಶೆಟ್ಟಿ ನಾಯಕಿಯರಾಗಿದ್ದಾರೆ. ಸಾಂಪ್ರದಾಯಿಕ ಮುಹೂರ್ತದ ಮೊದಲ ದೃಶ್ಯಕ್ಕೆ ಕ್ಲಾಪ್ ಮಾಡಲು ಮತ್ತು ನಿರ್ದೇಶನ ಮಾಡಲು ಹಿರಿಯ ಗೌರವಾರ್ಥವಾಗಿ ರಾಘವೇಂದ್ರ ರಾವ್ ಅವರನ್ನು ಆಹ್ವಾನಿಸಲಾಗಿತ್ತು. ಆದರೆ, ಈ ವೇಳೆ ಚಿತ್ರೀಕರಣದ ಮುಹೂರ್ತದ ಶಾಟ್ಗಾಗಿ ನಟ-ನಟಿಯರನ್ನು ನಿಲ್ಲಿಸುವಾಗ, ರಾಘವೇಂದ್ರ ರಾವ್ ಅವರು ಮೊದಲು ಕೀರ್ತಿ ಸುರೇಶ್ ಅವರ ಕೈ ಹಿಡಿದು ಹತ್ತಿರಕ್ಕೆ ಎಳೆದಿದ್ದಾರೆ. ಬಳಿಕ ಕೃತಿ ಶೆಟ್ಟಿ ಅವರನ್ನು ಹಿಡಿದು ಸರಿಯಾದ ಜಾಗಕ್ಕೆ ತಂದು ನಿಲ್ಲಿಸಿದ್ದಾರೆ. ನಂತರ ನಾಯಕರಾದ ವೆಂಕಟೇಶ್ ಮತ್ತು ಕಲ್ಯಾಣ್ರಾಮ್ ಅವರು ನಟಿಯರ ಹೆಗಲ ಮೇಲೆ ಹೇಗೆ ಕೈ ಇಡಬೇಕು ಎಂದು ತೋರಿಸಿಕೊಟ್ಟಿದ್ದಾರೆ. ಈ ದೃಶ್ಯದ ವಿಡಿಯೋ ತುಣುಕು ಹೊರಬರುತ್ತಿದ್ದಂತೆ ಸೋಷಿಯಲ್ ಮೀಡಿಯಾದಲ್ಲಿ ದೊಡ್ಡ ಮಟ್ಟದ ಆಕ್ರೋಶ ವ್ಯಕ್ತವಾಗಿದೆ.
South director Raghavendra Rao Criticised for unnecessary touching of #KeerthySuresh and #KrithiShetty ⛔ pic.twitter.com/uRLnbb2Zqm
— Always Bollywood (@AlwaysBollywood) June 19, 2026
ಹಳೆಯ ವಿವಾದಗಳನ್ನು ನೆನೆದ ನೆಟ್ಟಿಗರು ಮತ್ತು ತಾಪ್ಸಿ ಪನ್ನು ಹೇಳಿಕೆ
ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ಹಂಚಿಕೊಂಡಿರುವ ನೂರಾರು ಬಳಕೆದಾರರು, ಹಿರಿಯ ನಿರ್ದೇಶಕರು ನಟಿಯರ ಒಪ್ಪಿಗೆಯಿಲ್ಲದೆ ಆ ರೀತಿ ಅನಗತ್ಯವಾಗಿ ಮುಟ್ಟುವ ಅಗತ್ಯವಿರಲಿಲ್ಲ, ಮುಟ್ಟದೆಯೇ ಅವರಿಗೆ ಜಾಗವನ್ನು ತೋರಿಸಬಹುದಿತ್ತು ಎಂದು ಕಟುವಾಗಿ ಟೀಕಿಸಿದ್ದಾರೆ. ಈ ಘಟನೆಯು ಈ ಹಿಂದೆ ನಟಿ ನಿಹಾರಿಕಾ ಕೊನಿಡೇಲ ಅವರ ವಿಷಯದಲ್ಲಿ ರಾಘವೇಂದ್ರ ರಾವ್ ಅವರು ನಡೆದುಕೊಂಡಿದ್ದ ವಿವಾದಾತ್ಮಕ ರೀತಿಯನ್ನು ಮತ್ತೆ ನೆನಪಿಸುವಂತೆ ಮಾಡಿದೆ ಎಂದು ಕೆಲವರು ಕಮೆಂಟ್ ಮಾಡಿದ್ದಾರೆ. ಇನ್ನು ಕೆಲವು ನೆಟ್ಟಿಗರು, ಹಳೆಯ ಕಾಲದಲ್ಲಿ ಸೋಷಿಯಲ್ ಮೀಡಿಯಾ ಇಲ್ಲದ ಕಾರಣ ಇವರ ಇಂತಹ ವರ್ತನೆಗಳು ಯಾರಿಗೂ ತಿಳಿಯುತ್ತಿರಲಿಲ್ಲ, ಆದರೆ ಇಂದಿನ ಕಾಲದಲ್ಲೂ ಇವರು ಹೀಗೆ ವರ್ತಿಸುತ್ತಿರುವುದು ಸರಿಯಲ್ಲ ಎಂದು ಆಕ್ಷೇಪಿಸಿದ್ದಾರೆ. ಆದಾಗ್ಯೂ, ಮತ್ತೊಂದು ವರ್ಗದ ಜನರು ನಿರ್ದೇಶಕರ ಪರವಾಗಿ ವಾದಿಸಿದ್ದು, ಅವರು ಕೇವಲ ಮುಹೂರ್ತದ ಶಾಟ್ಗಾಗಿ ನಟಿಯರನ್ನು ಸರಿಯಾದ ಪೊಸಿಷನ್ನಲ್ಲಿ ನಿಲ್ಲಿಸಲು ಹಾಗೆ ಮಾಡಿದ್ದಾರೆಯೇ ಹೊರತು ಬೇರೆ ಯಾವುದೇ ತಪ್ಪು ಉದ್ದೇಶ ಅವರಿಗಿರಲಿಲ್ಲ ಎಂದು ಸಮರ್ಥಿಸಿಕೊಂಡಿದ್ದಾರೆ.
ಈ ವಿವಾದದ ಬೆನ್ನಲ್ಲೇ, ನಟಿ ತಾಪ್ಸಿ ಪನ್ನು ಅವರು ಈ ಹಿಂದೆ ರಾಘವೇಂದ್ರ ರಾವ್ ಅವರ ಮೇಕಿಂಗ್ ಶೈಲಿಯ ಬಗ್ಗೆ ಆಡಿದ್ದ ಹಾಸ್ಯದ ಮಾತುಗಳು ಮತ್ತೆ ಮುಂಚೂಣಿಗೆ ಬಂದಿವೆ. 2010ರಲ್ಲಿ ರಾಘವೇಂದ್ರ ರಾವ್ ನಿರ್ದೇಶನದ ‘ಝುಮ್ಮಂದಿ ನಾದಂ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟಿದ್ದ ತಾಪ್ಸಿ, ಅವರ ಸಿನಿಮಾಗಳಲ್ಲಿ ನಾಯಕಿಯರ ಹೊಕ್ಕಳ ಮೇಲೆ ಹಣ್ಣು ಮತ್ತು ಹೂವುಗಳನ್ನು ಎಸೆಯುವ ವಿಚಿತ್ರ ಶೈಲಿಯನ್ನು ಗೇಲಿ ಮಾಡಿದ್ದರು. ಹೊಕ್ಕಳಿಗೆ ತೆಂಗಿನಕಾಯಿ ಹೊಡೆಯುವುದರಲ್ಲಿ ಏನು ರೋಮ್ಯಾನ್ಸ್ ಇರುತ್ತದೆಯೋ ನನಗೆ ಇಂದಿಗೂ ಅರ್ಥವಾಗಿಲ್ಲ ಎಂದು ತಾಪ್ಸಿ 2017ರ ಸಂದರ್ಶನವೊಂದರಲ್ಲಿ ಹೇಳಿದ್ದ ಮಾತುಗಳನ್ನು ಈಗ ನೆಟ್ಟಿಗರು ಮತ್ತೆ ಶೇರ್ ಮಾಡುತ್ತಿದ್ದಾರೆ. ಇಷ್ಟೆಲ್ಲಾ ವಿವಾದಗಳ ನಡುವೆಯೂ, ನಿರ್ದೇಶಕ ಅನಿಲ್ ರವಿಪುಡಿ ಅವರು ಮುಹೂರ್ತದ ಫೋಟೋಗಳನ್ನು ಹಂಚಿಕೊಂಡು, ವೆಂಕಟೇಶ್ ಅವರೊಂದಿಗಿನ ಈ ಹೊಸ ಜರ್ನಿ ಪ್ರೇಕ್ಷಕರನ್ನು ರಂಜಿಸಲಿದೆ ಎಂದು ಭರವಸೆ ವ್ಯಕ್ತಪಡಿಸಿದ್ದಾರೆ.
