ಮೈಸೂರು: ಕನ್ನಡ ಸಾಹಿತ್ಯ ಲೋಕದಲ್ಲಿ ತಮ್ಮ ಮನೋಜ್ಞ ಬರವಣಿಗೆಯ ಮೂಲಕ ಕೋಟ್ಯಂತರ ಓದುಗರ ಹೃದಯ ತಟ್ಟಿದ್ದ ಹಿರಿಯ ಲೇಖಕಿ ಸಿ.ಎನ್. ಮುಕ್ತಾ (77) ಅವರು ಇಂದು ಮೈಸೂರಿನಲ್ಲಿ (Big News) ನಿಧನರಾಗಿದ್ದಾರೆ. ವಯೋಸಹಜ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದ ಅವರು ಚಿಕಿತ್ಸೆ ಫಲಕಾರಿಯಾಗದೆ ಕೊನೆಯುಸಿರೆಳೆದಿದ್ದಾರೆ. ಐದು ದಶಕಗಳ ಕಾಲ ಕಥೆ-ಕಾದಂಬರಿಗಳ ಮೂಲಕ ಸಾಹಿತ್ಯ ಪ್ರಿಯರನ್ನು ರಂಜಿಸಿದ್ದ ಸರಸ್ವತಿ ಪುತ್ರಿಯ ಅಗಲಿಕೆಗೆ ಇಡೀ ಸಾಹಿತ್ಯ ವಲಯ ಕಂಬನಿ ಮಿಡಿದಿದೆ.
ಮನೆಯಲ್ಲೇ ಅರಳಿದ ಪ್ರತಿಭೆ: 1951 ರ ಏಪ್ರಿಲ್ 30 ರಂದು ಚಿತ್ರದುರ್ಗದಲ್ಲಿ ಜನಿಸಿದ ಮುಕ್ತಾ ಅವರಿಗೆ ಬಾಲ್ಯದಿಂದಲೇ ಸಾಹಿತ್ಯದ ಸಾರ ಸಿಕ್ಕಿತ್ತು. ತಂದೆ ಸಿ.ಬಿ. ನರಸಿಂಹಮೂರ್ತಿ ಅವರು ಹೆಡ್ಮಾಸ್ಟರ್ ಆಗಿದ್ದರೆ, ಸೋದರ ಸಿ.ಬಿ. ಜಯರಾವ್ ರಂಗಭೂಮಿಯ ಹೆಸರಾಂತ ನಟರಾಗಿದ್ದರು. ತಾಯಿ ಕಮಲಮ್ಮ ಹಾಗೂ ಕುಟುಂಬಸ್ಥರ ಪ್ರೇರಣೆಯಿಂದ ವಿದ್ಯಾಭ್ಯಾಸ ಮುಂದುವರಿಸಿದ ಮುಕ್ತಾ, ಮೈಸೂರಿನ ಮಹಾರಾಣಿ ಕಾಲೇಜಿನಲ್ಲಿ ಬಿ.ಎ. ಹಾಗೂ ಬಳಿಕ ಬಿ.ಎಡ್ ಪದವಿ ಮುಗಿಸಿದರು. ನಂತರ ತಂದೆಯಂತೆಯೇ ಶಿಕ್ಷಣ ಕ್ಷೇತ್ರ ಆಯ್ದುಕೊಂಡು, ಪ್ರೌಢಶಾಲಾ ಶಿಕ್ಷಕಿಯಾಗಿ ಮತ್ತು ಮುಖ್ಯಶಿಕ್ಷಕಿಯಾಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದರು.
ಅಕ್ಕನ ಪ್ರೇರಣೆ, ತ.ರಾ.ಸು ಪ್ರಭಾವ: ಪ್ರಾಥಮಿಕ ಶಾಲೆಯಲ್ಲಿದ್ದಾಗ ಗುರುಗಳು ಹೇಳುತ್ತಿದ್ದ ಕಥೆಗಳು ಹಾಗೂ ಕಾದಂಬರಿ ಸಾರ್ವಭೌಮ ತ.ರಾ.ಸು ಅವರ ‘ಚಂದವಳ್ಳಿಯ ತೋಟ’ ಕೃತಿ ಇವರಲ್ಲಿ ಸಾಹಿತ್ಯದ ಬೀಜ ಬಿತ್ತಿದ್ದವು. ಅಕ್ಕ ಪದ್ಮಜಾ ಸುಂದರೇಶ್ ಅವರ ಬರಹಗಳಿಂದ ಪ್ರಭಾವಿತರಾಗಿ ಲೇಖನಿ ಹಿಡಿದ ಮುಕ್ತಾ, ‘ಆಶ್ರಯ’ ಎಂಬ ಕಾದಂಬರಿಯ ಮೂಲಕ ಸಾಹಿತ್ಯ ಕೃಷಿ ಆರಂಭಿಸಿದರು. ಇವರ ಕಥೆಗಳು ಅಂದಿನ ಕಾಲದ ಪ್ರಮುಖ ವಾರಪತ್ರಿಕೆಗಳಲ್ಲಿ ಮುಂಚೂಣಿಯಲ್ಲಿ ಪ್ರಕಟವಾಗುತ್ತಿದ್ದವು.
ಪತ್ರಿಕೆಗಳಿಂದ ಬೆಳ್ಳಿಪರದೆಯವರೆಗೆ: ಸುದೀರ್ಘ ಸಾಹಿತ್ಯ ಜರ್ನಿಯಲ್ಲಿ ಮುಕ್ತಾ ಅವರು ‘ಅನಾವರಣ’, ‘ಅಪರಿಚಿತರು’, ‘ಜೀವನ ಚಕ್ರ’, ‘ಅಮೃತಮಯಿ’ ಸೇರಿದಂತೆ 75 ಕ್ಕೂ ಹೆಚ್ಚು ಕಾದಂಬರಿ ಹಾಗೂ ಕಥಾಸಂಕಲನಗಳನ್ನು ಕನ್ನಡ ನಾಡಿಗೆ ನೀಡಿದ್ದಾರೆ. ಸುಧಾ, ಮಲ್ಲಿಗೆ, ಮಂಗಳ, ಕರ್ಮವೀರದಂತಹ ಜನಪ್ರಿಯ ಪತ್ರಿಕೆಗಳಲ್ಲಿ ಇವರ ಕಥೆಗಳು ಧಾರಾವಾಹಿಯಾಗಿ ಮೂಡಿಬಂದು ಮನೆಮಾತಾಗಿದ್ದವು.
ಇವರ ಕಲ್ಪನೆಯ ಬರವಣಿಗೆ ಕೇವಲ ಪುಸ್ತಕಗಳಿಗಷ್ಟೇ ಸೀಮಿತವಾಗದೆ ದೃಶ್ಯ ಮಾಧ್ಯಮದಲ್ಲೂ ಮೈದಳೆದಿತ್ತು. ‘ಸುಖದ ಸೋಪಾನ’ ಮತ್ತು ‘ಕ್ಷಮಯಾಧರಿತ್ರಿ’ ಕಾದಂಬರಿಗಳು ಕಿರುತೆರೆಯಲ್ಲಿ ಮೆಗಾ ಸೀರಿಯಲ್ ಆಗಿ ಪ್ರಸಾರವಾಗಿದ್ದರೆ, ಇವರ ಕೃತಿಗಳ ಆಧಾರಿತ ‘ದೋಣಿ ಸಾಗಲಿ’ (ರಾಜೇಂದ್ರಸಿಂಗ್ ಬಾಬು ನಿರ್ದೇಶನ) ಹಾಗೂ ‘ಮಿಸ್ ಕ್ಯಾಲಿಫೋರ್ನಿಯಾ’ (ಕೋಡ್ಲು ರಾಮಕೃಷ್ಣ ನಿರ್ದೇಶನ) ಕಾದಂಬರಿಗಳು ಹಿಟ್ ಚಲನಚಿತ್ರಗಳಾಗಿ ಬೆಳ್ಳಿಪರದೆಯ ಮೇಲೂ ಅಬ್ಬರಿಸಿದ್ದವು.
ಗೌರವ-ಪ್ರಶಸ್ತಿಗಳ ಗರಿ: ಅವರ ಸುದೀರ್ಘ ಸಾಹಿತ್ಯಿಕ ಮತ್ತು ಶೈಕ್ಷಣಿಕ ಸೇವೆಯನ್ನು ಗುರುತಿಸಿ ಕರ್ನಾಟಕ ಸರ್ಕಾರ ಪ್ರತಿಷ್ಠಿತ ರಾಜ್ಯೋತ್ಸವ ಪ್ರಶಸ್ತಿ ನೀಡಿ ಗೌರವಿಸಿತ್ತು. ಇದರೊಂದಿಗೆ ಅತ್ತಿಮಬ್ಬೆ ಪ್ರಶಸ್ತಿ, ತ್ರಿವೇಣಿ ಪ್ರಶಸ್ತಿ, ಆರ್ಯಭಟ ಪ್ರಶಸ್ತಿ ಹಾಗೂ ಶಿಕ್ಷಕಿಯರಿಗೆ ನೀಡುವ ಬನಶಂಕರಮ್ಮ ಪ್ರಶಸ್ತಿಗಳು ಇವರಿಗೆ ಒಲಿದಿದ್ದವು. ಸಿ.ಎನ್. ಮುಕ್ತಾ ಅವರ ನಿಧನದಿಂದ ಕನ್ನಡ ಸಾಹಿತ್ಯದ ಒಂದು ಸುವರ್ಣ ಅಧ್ಯಾಯ ಮುಕ್ತಾಯಗೊಂಡಂತಾಗಿದೆ.
