ಚೆನ್ನೈ: ತಮಿಳುನಾಡು ವಿಧಾನಸಭಾ ಚುನಾವಣೆಯ ಫಲಿತಾಂಶ ಈಗ ಇಡೀ ದೇಶದ ಗಮನ ಸೆಳೆದಿದೆ. ನಟ ವಿಜಯ್ ನೇತೃತ್ವದ ಟಿವಿಕೆ (TVK) ಪಕ್ಷವು ಅಕ್ಷರಶಃ ಹೊಸ ಇತಿಹಾಸ ಬರೆಯುವತ್ತ ದಾಪುಗಾಲು ಹಾಕುತ್ತಿದ್ದು, ಸದ್ಯದ ಟ್ರೆಂಡ್ ಪ್ರಕಾರ 108ಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದೆ. ದಶಕಗಳಿಂದ ರಾಜ್ಯವನ್ನಾಳಿದ ದ್ರಾವಿಡ ಪಕ್ಷಗಳ ನಿದ್ದೆಗೆಡಿಸಿರುವ ಈ ಅಭೂತಪೂರ್ವ ಯಶಸ್ಸಿನ ಬೆನ್ನಲ್ಲೇ ವಿಜಯ್ (Vijay) ತಾಯಿ ಶೋಬಾ ಚಂದ್ರಶೇಖರ್ ಮೊದಲ ಬಾರಿಗೆ ಮಾಧ್ಯಮಗಳ ಮುಂದೆ ಬಂದು ಮಗನ ಸಾಧನೆಯನ್ನು ಕೊಂಡಾಡಿದ್ದಾರೆ.
ಮಗನ ರಾಜಕೀಯ ಏಳಿಗೆ ಕಂಡು ಕಣ್ತುಂಬಿಕೊಂಡ ಅಮ್ಮ
ಆರಂಭದಲ್ಲಿ ಮಗ ರಾಜಕೀಯಕ್ಕೆ ಪ್ರವೇಶಿಸಿದಾಗ ಒಬ್ಬ ತಾಯಿಯಾಗಿ ಶೋಬಾ ಅವರಿಗೆ ತುಸು ಆತಂಕವಿತ್ತು. ಆದರೆ ಇಂದು ಜನತೆ ತೋರುತ್ತಿರುವ ಅಭೂತಪೂರ್ವ ಪ್ರೀತಿ ಕಂಡು ಅವರು ಭಾವುಕರಾಗಿದ್ದಾರೆ. “ನನಗೆ ಈ ಫಲಿತಾಂಶ ನೋಡಿ ಬಹಳ ಖುಷಿಯಾಗುತ್ತಿದೆ” ಎಂದು ಸರಳವಾಗಿ ಹೇಳುವ ಮೂಲಕ ಮಗನ ಯಶಸ್ಸನ್ನು ಸ್ವಾಗತಿಸಿದ್ದಾರೆ. ವಿಜಯ್ ಸದ್ದಿಲ್ಲದೆ ನಡೆಸಿದ್ದ ‘ಗ್ರೌಂಡ್ ವರ್ಕ್’ ಇಂದು ಫಲ ನೀಡಿದ್ದು, ಮಗ ಇಡೀ ರಾಜ್ಯಕ್ಕೆ ನಾಯಕನಾಗಿ ಹೊರಹೊಮ್ಮುತ್ತಿರುವುದನ್ನು ಕಂಡು ತಂದೆ ಎಸ್.ಎ. ಚಂದ್ರಶೇಖರ್ ಕೂಡ ಅಪಾರ ಸಂತಸ ವ್ಯಕ್ತಪಡಿಸಿದ್ದಾರೆ.
ರಾಜಕೀಯ ಅಖಾಡದಲ್ಲಿ ಸೂಪರ್ ಹಿಟ್ ‘ಸ್ಕ್ರೀನ್ ಪ್ಲೇ’
ಯಾವುದೇ ಅಬ್ಬರವಿಲ್ಲದೆ 108 ಕ್ಷೇತ್ರಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿರುವುದು ಸಣ್ಣ ವಿಷಯವಲ್ಲ. ಹಿರಿಯ ರಾಜಕಾರಣಿಗಳನ್ನೇ ಮಕಾಡೆ ಮಲಗಿಸಿರುವ ವಿಜಯ್, ಜನರ ನಾಡಿಮಿಡಿತ ಅರಿತು ರೂಪಿಸಿದ ತಂತ್ರಗಾರಿಕೆ ಇಂದು ರಾಜಕೀಯದಲ್ಲಿ ಸೂಪರ್ ಹಿಟ್ ಆಗಿದೆ. ವಿಶೇಷವಾಗಿ ಯುವ ಸಮೂಹ ಮತ್ತು ಮಹಿಳಾ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿ ಟಿವಿಕೆಯನ್ನು ಕೈಹಿಡಿದಿರುವುದು ಈ ಬೃಹತ್ ಮುನ್ನಡೆಗೆ ಕಾರಣ ಎನ್ನಲಾಗಿದೆ. ವಿಜಯ್ ನಿವಾಸದ ಮುಂದೆ ಅಭಿಮಾನಿಗಳ ಸಾಗರವೇ ಹರಿದು ಬರುತ್ತಿದ್ದು, ಸಿನಿಮಾ ರಿಲೀಸ್ ಸಮಯಕ್ಕಿಂತಲೂ ಹೆಚ್ಚಿನ ಸಂಭ್ರಮದ ವಾತಾವರಣ ಮನೆಮಾಡಿದೆ.
ಚಿತ್ರರಂಗಕ್ಕೆ ದಳಪತಿ ಶಾಶ್ವತ ವಿದಾಯ?
ವಿಜಯ್ ಅವರ ರಾಜಕೀಯ ಪಯಣ ಸುಗಮವಾಗಿರಲಿಲ್ಲ. ಕಳೆದ ದಶಕದಿಂದ ಅವರ ಸಿನಿಮಾಗಳು ಕೇವಲ ಮನರಂಜನೆಯಾಗದೆ, ಸಮಾಜದ ಅಂಕುಡೊಂಕುಗಳನ್ನು ತಿದ್ದುವ ಧ್ವನಿಯಾಗಿದ್ದವು. ವಿಶೇಷವಾಗಿ ಅವರ ‘ಜನ ನಾಯಗನ್’ ಚಿತ್ರ ಬಿಡುಗಡೆಯ ವೇಳೆ ಎದುರಾದ ಅಡೆತಡೆಗಳು ಮತ್ತು ಸೆನ್ಸಾರ್ ಮಂಡಳಿಯ ವಿವಾದಗಳೇ ವಿಜಯ್ ಅವರಿಗೆ ರಾಜಕೀಯ ಮೈಲೇಜ್ ತಂದುಕೊಟ್ಟವು. ಸದ್ಯ ಅವರು ಮುಖ್ಯಮಂತ್ರಿ ಗದ್ದುಗೆಯ ಸನಿಹದಲ್ಲಿರುವ ಕಾರಣ, ಜನಸೇವೆಯಲ್ಲಿ ಪೂರ್ಣಪ್ರಮಾಣದಲ್ಲಿ ತೊಡಗಿಸಿಕೊಳ್ಳಲು ಚಿತ್ರರಂಗಕ್ಕೆ ಶಾಶ್ವತವಾಗಿ ಗುಡ್ಬೈ ಹೇಳಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಇದು ಅಭಿಮಾನಿಗಳಲ್ಲಿ ತುಸು ಬೇಸರ ಮೂಡಿಸಿದ್ದರೂ, ರಾಜ್ಯದ ಭರವಸೆಯ ನಾಯಕನಾಗಿ ಅವರ ಮುಂದಿನ ಹೆಜ್ಜೆ ಇತಿಹಾಸ ಸೃಷ್ಟಿಸಲು ಸಜ್ಜಾಗಿದೆ.
