ಪ್ರಪಂಚದಾದ್ಯಂತ ಭಾರೀ ವಿನಾಶವನ್ನು ಉಂಟುಮಾಡಿದ್ದ ಕೊರೊನಾ ಸಾಂಕ್ರಾಮಿಕ ರೋಗದ ಭಯಾನಕ ದೃಶ್ಯಗಳು ಇನ್ನೂ ನಮ್ಮ ಕಣ್ಣ ಮುಂದೆ ಹಾಗೆಯೇ ಇದೆ. ಈ ಸಾಂಕ್ರಾಮಿಕ ರೋಗ ಬಂದು ಐದು ವರ್ಷಗಳಾಗಿವೆ. ಇದೀಗ ಮತ್ತೆ ಅದೇ ರೀತಿಯ ವೈರಸ್ ಚೀನಾದಲ್ಲಿ ಏಕಾಏಕಿ ಕಾಣಿಸಿಕೊಂಡಿದೆ. ಇದನ್ನು (Human Metapneumovirus) ಹ್ಯೂಮನ್ ಮೆಟಾಪ್ನ್ಯೂಮೋವೈರಸ್ (HMPV ವೈರಸ್) ಎಂದು ಹೆಸರಿಸಲಾಗಿದೆ.
ಈ ಕಾಯಿಲೆಯಿಂದಾಗಿ ಚೀನಾದ ಆಸ್ಪತ್ರೆಗಳು ತುಂಬಿ ತುಳುಕುತ್ತಿವೆ, ಮೃತದೇಹಗಳು ಸ್ಮಶಾನ ಸಿಗದೇ ರಾಶಿ ಬೀಳುತ್ತಿವೆಯಂತೆ. ಈ ರೀತಿ ಹಲವು ಮಾಧ್ಯಮ ವರದಿಗಳಲ್ಲಿ ಹೇಳಿಕೊಂಡಿದೆ. ಹೀಗಿರೋವಾಗ ಮತ್ತೊಂದು ಕೊರೊನಾ ರೀತಿಯ ಸಾಂಕ್ರಾಮಿಕ ರೋಗ ಹರಡಲಿದೆಯೇ? ಎಚ್‌ಎಂಪಿವಿ ವೈರಸ್ ಎಂದರೇನು? ಕೊರೊನಾದಿಂದ ಇದು ಎಷ್ಟು ಭಿನ್ನವಾಗಿದೆ? ಚಳಿಗಾಲಕ್ಕೂ ಇದಕ್ಕೂ ಏನಾದರೂ ಸಂಬಂಧವಿದೆಯೇ ಎಂಬುದರ ಕುರಿತಾದ ಗೊಂದಲಗಳಿಗೆ ಇಲ್ಲಿದೆ ಉತ್ತರ.
HMPV ವೈರಸ್ ಎಂದರೇನು?
HMPV ಒಂದು ಆರ್‌ಎನ್ಎ ವೈರಸ್, ಇದು ನ್ಯುಮೊವಿರಿಡೆ ಕುಟುಂಬದ ಮೆಟಾಪ್ನ್ಯೂಮೊವೈರಸ್ ವರ್ಗಕ್ಕೆ ಸೇರಿದೆ. 2001 ರಲ್ಲಿ ಡಚ್ ಸಂಶೋಧಕರು ಇದನ್ನು ಮೊದಲ ಬಾರಿಗೆ ಕಂಡುಹಿಡಿದರು. ಇದು ನ್ಯುಮೋನಿಯಾವನ್ನು ಉಂಟುಮಾಡುವ ಅದೇ ವೈರಸ್ ಕುಟುಂಬದಿಂದ ಬರುತ್ತದೆ
ಇದರಿಂದ ಉಂಟಾಗುವ ಸೋಂಕು ಮೇಲಿನ ಮತ್ತು ಕೆಳಗಿನ ಉಸಿರಾಟದ ಕಾಯಿಲೆಗಳಿಗೆ ಕಾರಣವಾಗಬಹುದು. ಇದು ಸಾಮಾನ್ಯ ಉಸಿರಾಟದ ಕಾಯಿಲೆಯಾಗಿದ್ದು, ಇದು ಪ್ರಪಂಚದಾದ್ಯಂತ ಹರಡಿದೆ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಮಕ್ಕಳು, ವೃದ್ಧರು ಮತ್ತು ದುರ್ಬಲ ರೋಗನಿರೋಧಕ ಶಕ್ತಿ ಹೊಂದಿರುವವರು ಹೆಚ್ಚಿನ ಅಪಾಯದಲ್ಲಿದ್ದಾರೆ. ಇದರ ಲಕ್ಷಣಗಳು ಹೆಚ್ಚಾಗಿ ಕೊರೊನಾವನ್ನು ಹೋಲುತ್ತವೆಯಂತೆ.
